Chojnicki rajonny sud 21 sakavika pakaraŭ administracyjnym štrafam u pamiery 10 bazavych vieličyniaŭ (230 rubloŭ) miascovaha žychara Maksima Maksimienku za repost videasiužetu z supołki «Ŭkantakcie» pad nazvaj «Revalucyjnaje dziejańnie». Toje było ŭ śniežni 2015 hodu, a administracyjny pratakoł u dačynieńni da Maksimienki milicyja skłała sioleta na pačatku sakavika.
«Sudździa, małady taki juryst, patłumačyŭ, što nijak nia moža mianie vyzvalić ad adkaznaści, bo pieršasny materyjał pastupiŭ z KDB. Kali b ja vydaliŭ hety videasiužet svoječasova sa svajoj staronki, to nijakaj spravy nie było b. A to pad im było čatyry kamentary i adzin repost. Vyhladaje, što ja spryčyniŭsia da raspaŭsiudu materyjałaŭ pad nazvaj «Revalucyjnaje dziejańnie», — kaža aštrafavany Maksimienka.
U Maksima jość dziesiać dzion, kab abskardzić pastanovu sudu na štraf za raspaŭsiud ekstremisckich materyjałaŭ. Zhadanaja anarchisckaja supołka i jaje paviedamleńni zaniesienyja ŭ śpis ekstremisckich u 2016 hodzie i zablakavanyja dla dostupu ŭ Biełarusi.
Maksimu Maksimienku 26 hadoŭ, jon technik-mechanik. Pracy ŭ Chojnikach nie znajšoŭ, jeździć u Mazyr, dzie robić hruzčykam. A ŭ vychodnyja vypraŭlajecca ź siabrami ŭ Homiel — pahulać u chakiej u ladovym pałacy. Maksim kaža, što daŭno zabyŭsia pra videasiužet, za jaki jaho ciapier aštrafavali.
Heta ŭžo druhaja za sakavik administracyjnaja sprava, jakuju milicyja zavodzić za repost videasiužetu z supołki «Ŭkantakcie», jakaja nazyvajecca «Revalucyjnaje dziejańnie». 8 sakavika analahičnuju spravu raspačali suprać invalida pieršaj hrupy Alaksandra Rabca ź miastečka Paryčy Śvietłahorskaha rajonu. Toj taksama zrabiŭ repost zhadanaha videasiužetu z supołki «Ŭkantakcie».
«Učastkovy skłaŭ na mianie administracyjny pratakoł taksama za raspaŭsiud materyjałaŭ ekstremisckaha źmiestu. Heta ŭsio, što mnie viadoma na siońniašni dzień. Bolš mianie nichto nikudy nie vyklikaŭ», — skazaŭ invalid Rabiec.
Nakolki viadoma, videa, za jakoje ciapier pieraśledujuć žycharoŭ rehijonu, było pra akcyju anarchistaŭ u Homieli: na vyjezdach z horadu jany vyviešvali plakaty z nadpisami: «U novy hod z novymi padatkami», «Padatki. Biespracoŭje. Pavyšeńnie koštaŭ. Z Novym Hodam».
15 sakavika paśla dazvolenaj haradzkimi ŭładami akcyi pratestu suprać «darmajedzkaha» dekretu № 3 u Miensku hvałtoŭna zatrymali anarchistaŭ, jakija brali ŭ joj udzieł.
Ciapier čytajuć
U dzień, kali pamiłavali palitviaźnia Daronina, jahonaj žoncy prysudzili 8,5 hadoŭ kałonii za ŭdzieł u dvarovym čacie3
Kamientary