22 červienia kamanda kraŭdfandynh-kampanii «Vazok dla Dašy» spyniła zbor srodkaŭ na elektravazok dla piśmieńnicy i žurnalistki Darji Lis z Zaleśsia (Smarhonski rajon).
Metaj dabračynnaha prajektu było sabrać blizu 15 tysiačaŭ jeŭra na niamiecki vazok, jaki palepšyŭ by jakaść žyćcia Darji, jakaja maje dyjahnaz SMA, i daŭ by joj svabodu tvorčaści. Ahułam dziakujučy kampanii było sabrana 15170 rubloŭ abo 8 000 jeŭra abo kala 50% ad patrebnaj sumy, paviedamlaje błoh kampanii na talaka.by.
Ale taksama ŭ pracesie zboru vyśvietliłasia, što vazok ź viertykalizataram nie vyrašyć usich prablemaŭ.
Kampanija dapamahła Darji daviedacca pra litoŭskuju firmu teida.lt, jakaja zajmajecca impartam miedycynskaha abstalavańnia. Dziakujučy ich pasłuham, Darja zmoža nabyć vazok Invacare TDX SP2 Ultra Low Maxx.
Heta vazok bieź viertykalizatara — zatoje z «haryzantalizataram» — dazvalaje razhružać pazvanočnik, nie kładučysia na łožak. Dla Darji heta taksama vielmi važna i karysna.
U Litvie vazok budzie kaštavać krychu bolš za 10 tysiačaŭ jeŭra. Krychu mienš za 80% hetaj sumy kampiensujuć srodki, sabranyja dziakujučy kampanii. Sumu, jakoj nie staje, pahadziŭsia kampiensavać siabra Darji, jaki nie pažadaŭ, kab my nazyvali jaho imia.
Aproč taho nie treba vypisvać zapčastki ź Niamieččyny. Siervisnaje absłuhoŭvańnie dastupnaje ŭ Vilni abo Koŭnie, što vielmi blizka ad Zaleśsia. Heta zrobić karystańnie novym vazkom bolš kamfortnym i mienš nakładnym dla siamji Lis.
Darja pieradaje ŭsim ščyryja vitańni i zaprašaje ŭ Zaleśsie.
Paśla nabyćcia vazka jana abiacaje być vašym asabistym hidam pa miastečku i siadzibie Michała Kleafasa Ahinskaha, adznačajuć aŭtary kampanii i ščyra dziakujuć usim, «chto spryčyniŭsia da zboru srodkaŭ słovami i spravami. I asabliva - Julii Čarniaŭskaj i Juryju Zisieru, Žańnie i Michaelu Kromieram, Michału Aniempadystavu, Uładzimiru Arłovu, Inie i Iharu Karniejam, Volzie Lipkovič, Darji Caryk, Hańnie Hierynaj… Fejsbučnym frendam, siabram i znajomym Darji ŭ «realnym» žyćci, kaleham-žurnalistam i kaleham-litarataram, a taksama rodnaj škole Darji ŭ Zaleśsi. Pieraličyć usich, chto spryčyniŭsia, prosta niemahčyma».
Kamientary