Barysaŭski BATE startavaŭ u čarhovym rozyhryšy Lihi čempijonaŭ. Pieršym supiernikam biełaruskaha kłuba staŭ armianski «Ałaškiert». Heta toj samy kłub, jaki niekalki tydniaŭ tamu ledź-ledź adoleŭ supiernikaŭ z Andory — 1:0 i 1:1 za dva matčy. Zrešty, armianskija kłuby nikoli nie vyznačajucca dobrymi vynikami.
U bukmiekieraŭ nie było sumnievaŭ nakont pieramožcy siońniašniaha matča — tolki BATE. Pačatak hulni tolki pierakanaŭ zaŭziataraŭ biełaruskaj kamandy ŭ niezvarotnaści pieramohi. Armianie nie chavajučysia ciahnuli čas i spadziavalisia ŭtrymać nulavuju ničyju. Za pieršy tajm futbalisty z Barysava dakładna prabili pa varotach supiernikaŭ siem razoŭ, tady jak ich apanienty ni razu.
Praŭda, vynikovym staŭ tolki adzin udar. Nievysoki biełaruski pieruaniec Alaksiej Ryas adhuknuŭsia na fłanhavuju padaču Ihara Stasieviča — 1:0 na 43-j chvilinie.
U heta składana pavieryć, ale za ŭvieś druhi tajm BATE ni razu nie trapiŭ chacia b u bramu supiernika! Zaŭziatary ad pačatku hulni śmiajalisia ź niaŭdałych adkryvańniaŭ forvarda Mikałaja Sihnieviča, ale kali zamiest jaho vyjšaŭ fin Jase Tuominien, stała jašče horš. Lehijanier zusim nie trapiŭ u hulniu i biehaŭ sam pa sabie, nie stvarajučy nijakaj niebiaśpieki supierniku.
A voś «Ałaškiert» patrochi pačynaŭ napružvać biełarusaŭ, byŭ navat udar u pierakładzinu. Uvohule, misija bramnika BATE Dzianisa Ščarbickaha była ŭ tym, kab adbić toj adzin (maksimum dva) ŭdar armianaŭ, jaki dalacić da jaho varot. Ale kali na 78-j chvilinie miač prylacieŭ da jaho, Ščarbicki niazhrabna adbiŭ jaho prosta ŭ Ryasa, taho samaha hieroja pieršaha tajma. Ad taho miač adskočyŭ u varoty — 1:1…
Da kanca matča BATE tak i nie stvaryŭ nivodnaha niebiaśpiečnaha momanta kala bramy «Ałaškierta». Hulnia ŭ adkaz budzie praz tydzień. Biełarusy, vidavočna, macniejšyja, i musiać pieramahać. Paraza BATE ci nulavaja ničyja vyvieduć u nastupny raŭnd «Ałaškiert». Heta budzie trahiedyja dla biudžeta barysaŭskaha kłuba, jaki moža zastacca bieź lihačempijonskich pryzavych.
Armianie ni razu nie prabili pa varotach BATE dakładna, ale zabili hoł VIDEA
Ciapier čytajuć
Na pratestancki fiestyval u «Čyžoŭku-Arenu» jedzie amierykanski prapaviednik Franklin Hrem. Razam ź im čakajuć Koŭła z žonkaj15
Kamientary