«Nam udałosia viarnuć našych chłopcaŭ dadomu». MZS Małdovy dziejničała dla vyzvaleńnia aficeraŭ pa ŭkazańni prezidenta Sandu
«Heta była kamandnaja praca, jakaja doŭžyłasia niekalki miesiacaŭ», — skazaŭ ministr zamiežnych spraŭ Małdovy.
Małdova pa ŭkazańni prezidenta Mai Sandu pačała šukać sposaby vyzvalić dvuch aficeraŭ Słužby infarmacyi i biaśpieki (SIB) adrazu paśla ich zatrymańnia ŭ Rasii. Pra heta raspavioŭ ministr zamiežnych spraŭ Małdovy Michaj Papšoj u efiry Rlive, piša Newsmaker.
Jon padziakavaŭ prezidentu ZŠA Donaldu Trampu, a taksama partnioram z Rumynii i Polščy za supracoŭnictva, jakoje dazvoliła pravieści mižnarodny abmien. Pavodle jaho słoŭ, pieramovy doŭžylisia «niekalki miesiacaŭ», a vynik zabiaśpiečyli «sumiesnyja namahańni ŭsich bakoŭ».
«Ź pieršaha dnia, kali zatrymali našych hramadzian, našych aficeraŭ, my pa ŭkazańni spadaryni prezidenta pačali šukać rašeńnie dla ich vyzvaleńnia.
Dziakujučy nadziejnym kantaktam, u tym liku z amierykanskimi partniorami, my znajšli hetuju formułu, i na asnovie prapanovy, jakaja pastupiła pa dypłamatyčnych kanałach, zatym pačali šukać rašeńni i praź SIB. (…) Heta była kamandnaja praca, jakaja doŭžyłasia niekalki miesiacaŭ, ale siońnia [u aŭtorak — NN] nam udałosia viarnuć našych aficeraŭ, našych chłopcaŭ, dadomu», — skazaŭ Papšoj.
Adkazvajučy na pytańnie pra mahčymyja ryzyki pieradačy byłoha namieśnika dyrektara SIB Alaksandra Bełana, jaki mieŭ dostup da sakretnaj infarmacyi i atrymaŭ pamiłavańnie ŭ ramkach abmienu ŭ Biełaruś (a zatym, imavierna, u Rasiju), Papšoj zajaviŭ, što takija rašeńni zastajucca składanymi, ale ich prymajuć u intaresach hramadzian.
«Heta možna adnieści da acenačnych mierkavańniaŭ. Vidavočna, što ŭ takich składanych rašeńniach pryjarytet atrymlivajuć fizičnaja cełasnaść, dabrabyt i biaśpieka našych hramadzian, jakija nie parušali zakon, słužać Małdovie i pryśviačajuć svaju prafiesijnuju dziejnaść biaśpiecy kožnaha hramadzianina Małdovy. Tamu my pavinny dziejničać adkazna. Heta składanyja rašeńni, ale jany ŭ nacyjanalnych intaresach Małdovy i našych hramadzian», — skazaŭ Papšoj.
U vyniku abmienu źniavolenymi Małdova viarnuła dvuch aficeraŭ Słužby infarmacyi i biaśpieki, jakich raniej aryštavali ŭ Rasii. Pra abmien paviedamiła ŭ Facebook prezident Maja Sandu.
Jana nie nazvała imionaŭ aficeraŭ, ale raniej deputat i lidar «Našaj partyi» Renata Usaty śćviardžaŭ, što havorka idzie pra Viktara Cura i Dyjanisija Banara.
Uzamien Biełarusi pieradali byłoha namieśnika dyrektara SIB Małdovy Alaksandra Bełana, jakoha abvinavačvajuć u dziaržaŭnaj zdradzie ŭ intaresach KDB Biełarusi. Bełana raniej zatrymali ŭ Rumynii, zatym ekstradavali ŭ Małdovu, dzie sud prysudziŭ jamu paŭtara hoda pazbaŭleńnia voli. Pierad praceduraj abmienu prezident Sandu padpisała ŭkaz ab jaho pamiłavańni.
Pavodle viersii śledstva, u 2024 i 2025 hadach Bełan dvojčy sustrakaŭsia ŭ Budapiešcie z supracoŭnikami biełaruskaj raźviedki, i heta stvaryła pahrozu nacyjanalnaj biaśpiecy Rumynii. Padčas sustreč jon nibyta pieradavaŭ sakretnuju infarmacyju ŭ abmien na hrošy i atrymlivaŭ dalejšyja instrukcyi. Sumy, pra jakija išła havorka, nie raskryvajucca.
Akramia taho, Małdova pieradała Rasii hramadzianku Rasii Ninu Papovu, žonku adnaho z aficeraŭ rasijskaj armii, jakaja sprabavała padkupić supracoŭnika pahraničnaj palicyi, kab trapić na terytoryju Małdovy. Za heta jaje aryštavali i asudzili na hod pazbaŭleńnia voli. Za dzień da abmienu, 27 krasavika, Apielacyjnaja pałata Kišyniova admianiła prysud.
Ciapier čytajuć
Anžalicy Mielnikavaj vydali pašpart prykryćcia na imia Anhieliny Radzivonavaj?13
Kamientary