Pad Krapiŭnickim (Ukraina) nieviadomyja raskrali zvałku radyjeaktyŭnych adchodaŭ. Kantejniery z zabrudžanaj cezijem-137 ziamloj i mietałam 30 hadoŭ pralažali ŭ ziamli za niekalki kiłamietraŭ ad abłasnoha centra, havorycca ŭ siužecie TSN.
Zabrudžanyja radyjacyjaj ziamlu i mietał nielha było čapać prynamsi 300 hadoŭ. Paśla taho, jak złodziei razvarušyli mahilnik, prybory vymiareńnia radyjacyi pakazvajuć 70 mikrarenthien. Na miescy raskopak uzrovień radyjacyi amal u dziesiać razoŭ pieravyšaje zvyčajny fon. Vypramieńvaje jaje i toje žaleza, jakoje ŭžo vyvieźli na punkty pryjomu mietału — a heta tony łomu.
«Pracavaŭ ekskavatar na poŭnuju mahutnaść, ludzi z kuvałdami i łamami, ale tolki ja tudy pryjechaŭ, tolki spytaŭ, što vy tut robicie — adrazu ekskavatar spyniŭsia, i jany pačali ŭciakać», — raspavioŭ kiraŭnik haradskoj śpiecinśpiekcyi Andrej Maksiuta.
Adchody zakapanyja na hłybini kala 10 mietraŭ. Tam niekalki sotniaŭ kantejnieraŭ z radyjeaktyŭnym śmiećciem. Hetym polem časta chodziać ludzi, tamu mohilnika niama ni na adnoj karcie, a pobač — choć by maleńkich zaharod abo šyldaŭ z papiaredžańniem ab niebiaśpiecy. Tamu što ŭ časy SSSR tut zusim tajemna chavali nastupstvy technahiennaj avaryi na adnym z pradpryjemstvaŭ.
Padziei amal 30-hadovaj daŭniny dobra pamiataje tahačasny namieśnik staršyni Kiravahradskaha abłvykankama. Ź jaho słoŭ, dvoje rabotnikaŭ, zajadłych rybakoŭ, chacieli dastać sa złamanaha prybora śviniec dla vud i raźbili zašytyja ŭ jaho ampuły z cezijem. Mužčyny z radyjeaktyŭnymi apiokami źviarnulisia ŭ balnicu.
«Nahami raźnieśli hety ŭvieś parašok, plus na mietał tam pasypaŭsia. Sabrali kamisiju i pryniali rašeńnie, što treba likvidavać hetaje radyjeaktyŭnaje zabrudžvańnie, vyrabić jomistaści z 3-milimietrovaha žaleza, i hety ŭvieś hrunt sabrali, mietał zaražany — i pachavać», — raspavioŭ vidavočca padziej Mikałaj Suchamlin. Tracinu kantejnieraŭ, źmieściva jakich vypramieńvała bolš za 300 mikrarenthien, vyvieźli ŭ Čarnobyl, astatnija ž pachavali ŭ pryharadzie.
Tych, chto ciapier spakusiŭsia na niebiaśpiečnyja adchody, šukajuć pravaachoŭniki. Im staviać u vinu tolki kradziež dziaržaŭnaj ziamli. «Zavałodańnie hruntavym pokryvam, to bok paviarchoŭnym płastom ziamli biez dazvolnych dakumientaŭ. Asoby my vyśvietlili, ale jašče nie vyklikali ich u suviazi ź niemahčymaściu na dadzieny momant vyjavić ich faktyčnaje miescaznachodžańnie», — raspavioŭ śledčy Dzianis Vierbavy.
Tym časam u haradskoj radzie ŭžo płanujuć pierazachavać adchody, a mahilnik abharadzić. «Terminova treba znajści padradnuju arhanizacyju, jakaja maje licenziju. Zrabić abo karaby, ci niejkija inšyja technałohii, ja nie viedaju — tam i pierapachavać», — kaža v. a. načalnika ŭpraŭleńnia nadzvyčajnych situacyj Krapiŭnickaha Alaksiej Hnienny. Čynoŭniki pierakonvajuć, što na radyjacyjny fon u samim horadzie razrytyja mohilniki nijak nie paŭpłyvali, tamu zaklikajuć haradžan nie panikavać.
Ciapier čytajuć
Kola Łukašenka siadzić pobač z baćkam i Pucinym na Krasnaj płoščy5
Kamientary