Novaja moda — «vušy elfa». Što hetaje takoje, jak vyhladaje i jak taho dasiahnuć
Paŭdniovaja Kareja, jakaja daŭno zamacavała za saboj status suśvietnaj stalicy płastyčnaj chirurhii, achoplenaja novym trendam: ciapier abjektam žadańnia stali «elfijskija vušy». Žančyny i mužčyny masava robiać injekcyi-filery abo vykarystoŭvajuć śpiecyjalnyja stužki-tejpy, kab vušnyja rakaviny vyrazna vystupali ŭ baki i vyhladali bolšymi.
U toj čas jak žychary astatniaj častki śvietu nie śpiašajucca pavialičvać vušy (amierykancy, naprykład, tradycyjna imknucca prycisnuć ich da hałavy, kab zrabić mienš zaŭvažnymi), moda na adtapyranyja «vušy elfa», akramia Kitaja, zachapiła Japoniju i apantanuju pryhažościu Paŭdniovuju Kareju.
Jak tłumačać ekśpierty, sakret papularnaści hetaj manipulacyi zaklučajecca nie stolki ŭ lubovi da fentezi, kolki ŭ asablivaściach uschodnieazijackich standartaŭ pryhažości. U rehijonie, dzie šyroki tvar ličycca estetyčnym niedachopam, a vostraja V-padobnaja linija padbarodka — ideałam, vušy stali važnym instrumientam vizualnaj karekcyi. Vyśvietliłasia, što vušnyja rakaviny, jakija dobra bačnyja ŭ anfas i raźmiaščajucca krychu vyšej, stvarajuć iluziju vuziejšaha, chudziejšaha i maładžavaha tvaru.
Historyja hetaha ruchu pačałasia ŭ Kitai hadoŭ piać tamu, kali miascovaja influensierka pakazała vyniki svajoj apieracyi. Siońnia chešteh «Płastyka vušej elfa» (Elf Ear Cosmetic Surgery) u kitajskaj sacsietcy Weibo naličvaje bolš za 780 miljonaŭ prahladaŭ.
Pastupova razam z apieracyjami źjavilisia i mienš invaziŭnyja sposaby. Akramia injekcyj, ciapier aktyŭna pradajucca śpiecyjalnyja klejkija stužki, jakija macujucca za vušami i prymušajuć ich bolš vystupać.
U Paŭdniovaj Karei cikavaść da hetaj temy rezka vyrasła letaś paśla taho, jak śpiavačka Mimi z K-pop-hurta Oh My Girl pryznałasia, što karystajecca takimi tejpami. Heta pryviało da taho, što na karejskaj płatformie BarbieTalk kolkaść zapytaŭ na «filer dla vušej» uźlacieła na 1200%.
Rynak imhnienna adreahavaŭ na popyt. Ciapier u Sieule, u rajonie, viadomym jak «Pojas pryhažości» (dzie klinik płastyčnaj chirurhii bolš, čym u Łos-Andželesie, Majami i Rya-de-Žanejra razam uziatych), daktary prapanujuć jak injekcyjnyja mietady, tak i chirurhičnyja ŭmiašańni.
Injekcyja fileru na asnovie hiałuronavaj kisłaty ŭ chrastok vucha kaštuje kala 70 dalaraŭ.
Płastyčny chirurh Čon Hiu Sik (Jung Gyu-sik) pryznajecca, što moža vykonvać da 20 takich pracedur u dzień. Bolš za toje, jon navat apublikavaŭ navukovy artykuł ab «technicy ŭźniaćcia vušej» u amierykanskim prafiesijnym časopisie.
Pavodle chirurha, pracedura vielmi chutkaja, ale pry hetym daje vidavočny efiekt. Ciapier jaje ŭsio čaściej usprymajuć jak častku antyŭzrostavaj terapii.
Dla tych ža, chto nie choča ŭkołaŭ, rynak prapanuje tannyja tejpy pa 3 dalary za ŭpakoŭku, choć karystalniki adznačajuć, što ich doŭhaje našeńnie vyklikaje fizičny dyskamfort i bol.
Ekśpierty źviazvajuć burny roskvit industryi pryhažości z reformami achovy zdaroŭja ŭ kancy 1980‑ch hadoŭ. Paśla ŭviadzieńnia dziaržaŭnaj sistemy miedycynskaha strachavańnia mnohija karejskija daktary pierajšli ŭ śfiery, dzie pacyjenty płaciać samastojna. Kolkaść klinik i pasłuh pačała imkliva raści pa miery taho, jak kraina bahacieła, a sacyjalnaja kankurencyja ŭzmacniałasia.
Jak zaŭvažaje prafiesar Sieulskaha nacyjanalnaha ŭniviersiteta Džon P. DyMoja (John P. DiMoia), siońnia mnohija jaho studenty nie saromiejucca pryznavacca ŭ zroblenych apieracyjach. Pavodle jaho słoŭ, dla karejcaŭ płastyka daŭno pierastała być pytańniem eha — heta, chutčej, prahmatyčny instrumient, nieabchodny navat dla paśpiachovaha prachodžańnia sumoŭjaŭ pry pryjomie na pracu.
«Elfijskija vušy» stali jašče adnym prykładam taho, jak raźvitaja industryja pastajanna šukaje novyja krynicy prybytku. Ceny na mnohija tradycyjnyja pasłuhi źnizilisia praz vysokuju kankurencyju, a pakolki mnohija karejcy ŭžo zrabili sabie «standartny nabor» (vialikija vočy, vysokuju pieranosicu i vostry padbarodak), chirurhi pačali aktyŭna asvojvać novyja zony čałaviečaha cieła.
Kamientary