Jaŭka skłała 42,3%.
Žychary Katałonii prahałasavali za niezaležnaść rehijona i jaho adździaleńnie ad Ispanii. Pra heta zajaviŭ aficyjny pradstaŭnik urada Katałonii Žordzi Turul, pieradaje Reuters.
Pavodle jaho słoŭ, za vychad aŭtanomii sa składu Ispanii addali svaje hałasy 2 miljony 20 tysiač 144 čałavieki, što składaje 90% ad tych, chto pryjšoŭ na ŭčastki dla hałasavańnia. «Nie» adznačyli ŭ błankach na refierendumie 176 566 čałaviek (7%), bolš za 45 tys. biuleteniaŭ byli pustymi (2%), jašče kala 20 tys. błankaŭ pryznali niesapraŭdnymi.
Hetyja vyniki, dadaŭ Turul, praktyčna źjaŭlajucca kančatkovymi. Jaŭka skłała 42,3%.
«Heta ličby, jakija ŭ nas jość da ciapierašniaha času. Jašče zastajecca niedaličanaj niekalki tysiač biuleteniaŭ, ale ŭ cełym možna skazać, što heta vynikovyja ličby, jany amal nie źmieniacca», — zapeŭniŭ jon.
U centry Barsiełony viečaram u niadzielu sabralisia tysiačy prychilnikaŭ niezaležnaści Katałonii.
«U hety dzień nadziei i pakut hramadzianie Katałonii zavajavali prava abviaścić niezaležnuju dziaržavu ŭ vyhladzie respubliki», — zajaviŭ Karles Pučdemon u zvarocie, što tranślavaŭsia pa telebačańni.
«U najbližejšyja niekalki dzion moj urad nakiruje vyniki siońniašniaha hałasavańnia ŭ parłamient Katałonii, jaki pradstaŭlaje suvierennyja pravy našaha naroda, z tym, kab jon moh dziejničać u adpaviednaści z zakonam ab refierendumie», — zajaviŭ kiraŭnik urada Katałonii.
Urad Ispanii abiacaŭ nie dapuścić praviadzieńnia refierendumu, abvieščanaha niezakonnym Kanstytucyjnym sudom krainy. Katałonskaja palicyja (Mossos d'Esquadra) była pieraviedziena pad kamandavańnie Madryda, ale, pa słovach vidavočcaŭ, katałonskija palicyjanty nie sprabavali ŭžyvać siłu suprać nasielnictva
Na mnohich vybarčych učastkach palicyi ŭdałosia nie dać ludziam hałasavać. Palicyjanty taksama kanfiskoŭvali skryni ź biuleteniami.
Katałonskija ŭłady śćviardžajuć, što nacyjanalnaj palicyi ŭdałosia zakryć 319 z 2300 vybarčych učastkaŭ. Ministerstva ŭnutranych spraŭ Ispanii śćviardžaje, što začyniena było 92 ŭčastki.
Adrazu paśla zakančeńnia hałasavańnia premjer-ministr Ispanii Maryjana Rachoj zajaviŭ, što nie pryznaje lehitymnaści hetaha refierendumu. Pavodle jaho słoŭ, katałoncaŭ padmanam prymusili ŭdzielničać u niezakonnym plebiscycie. Jon nazvaŭ refierendum naśmieškaj nad demakratyjaj.
Kamientary