Źmicier Vajciuškievič prezentuje ŭ miežach prajektu «(Nie)rasstralanaja paezija» partału TuzinFM niečakany trek, napisany na słovy Ŭładzisłava Hałubka, zasnavalnika biełaruskaha sučasnaha teatru i pieršaha narodnaha artysta krainy.
Uładzisłaŭ Hałubok uvajšoŭ u historyju jak paet, prazaik, dramaturh, režyser, aktor, mastak. Jon pačaŭ drukavacca ŭ «Našaj Nivie» u 1908 hodzie, stvaryŭ kala 40 pjesaŭ, na pačatku 1920-ch stvaryŭ biełaruski vandroŭny teatar, jaki praź niekalki hod atrymaje status dziaržaŭnaha. Mienavita Hałubok pieršym u historyi krainy atrymaje zvańnie Narodnaha artysta Biełarusi (1928), praŭda praktyčna paśla hetaha pačniecca jahony pieraśled. Hałubka rasstralajuć u 1937-m, trochi raniej čym bolšaść jahonych kalehaŭ, 28 vieraśnia (pa inšych źviestkach jon pamior u turmie). Razam z tym aryštavanyja i represavanyja ŭsie, chto hraŭ u jahonym teatry (BDT-3). Padrabiaźniej pra žyćcio i tvorčaść Uładzisłava Hałubka raspaviadzie Vasil Drańko-Majsiuk na lekcyi ŭ kniharni «Łohvinaŭ» 3 listapada.
Mienavita na vierš Uładzisłava Hałubka stvaryŭ svaju pieśniu ŭ miežach prajektu «(Nie)rasstralanaja paezija» Źmicier Vajciuškievič: «Ja viedaŭ, što jon stvaralnik biełaruskaha teatru, ale akrom hetaha faktu chiba što ničoha. Siarod tych vieršaŭ, jakija dajšli da nas, ja šukaŭ niešta pazytyŭnaje. I na ščaście znajšoŭ! Budučyniu!».
PADTRYMAĆ PRAJEKT NA TALAKA.BY
Vierš Hałubka «Budučynia» datavany 1912 hodam. Vajciuškievič nazyvaje hety tvor apoviedam pra našyja biełaruskija mary. «Tut usio supała — i zaklik Hałubka adbudavać svoj sapraŭdny dom, i majo zacikaŭleńnie kamputarnymi technalohijami dy symfaničnaj muzykaj, pahatoŭ ja maju klasyčnuju adukacyju», — kaža Źmicier. U zapisie pieśni na studyi Everest paŭdzielničali taksama Aleś-Francišak Myškievič (bas) i Pavał Mamonaŭ (bubny).
Užyvuju Vajciuškieviču chočacca jaje vykonvać ź videašeraham, instalacyjami i performansami. I kab zala padpiavała: «Budujem novy dom!».
NABYĆ KVITOK NA KANCERTNUJU PREZENTACYJU PRAJEKTU «(NIE)RASSTRALANAJA PAEZIJA»
Źmicier Vajciuškievič — Budučynia
muzyka Źmitra Vajciuškieviča, słovy Ŭładzisłava Hałubka
Kipić rabota, płyvie pot,
I kryk i huł, jak hrom;
Tudy, siudy snuje narod.
Budujuć novy dom.
Łapaty režuć hłyb ziamli,
Źvinić stalovy łom;
Na miescy daŭniaj staryny
Budujuć novy dom.
Štodzień uhoru ścieny jduć,
Ušyr i ŭdoŭž kruhom;
Balić mazol, i rviecca hrudź,
A ŭsio ž budujuć dom!
Nastanie dzień, nadojdzie čas,
My krepku stol źviadziom,
I lepšaj pryšłaściu dla nas
Być musić novy dom!
Pracujma, braćcia! Chaj chutčej
Naš ljecca pot curkom:
Pryždžem i my śviatlejšych dniej,
Jak skončym stroić dom!..
(1912)
Kamientary