Staršyni Partyi BNF Ryhoru Kastusiovu 17 listapada vypłacili pieršuju piensiju. SMS pra naličeńnie i pieraličeńnie na bankaŭskuju kartku pieršaj piensii pryjšło na jaho mabilny telefon, piša Radyjo Svaboda.
«Heta pieršaja piensija ŭ maim žyćci, ciapier ja aficyjny piensijanier. Ale dla taho, kab atrymać hetuju piensiju i znajści hady majho stažu, što ja sumlenna adpracavaŭ z 1974 hoda, mnie daviałosia prajści ceły šlach «pakutaŭ» praz prakuraturu, praz sud, praz dva rajonnyja fondy sacyjalnaha zabieśpiačeńnia».
Ryhor Kastusioŭ raspavioŭ, što adpracavaŭ na pradpryjemstvach u Škłovie i Mahilovie hałoŭnym inžynieram i dyrektaram saŭhasa ŭ Białynickim rajonie.
«Mienavita z antyčałaviečaj sistemaj ja sutyknuŭsia ŭ Białynickim rajonie. Ja pracavaŭ hałoŭnym inžynieram u saŭhasie «Druć», jon zaraz OAO «Novaja Druć», i saŭhasie «Iskra» dyrektaram. Hetyja haspadarki ciapier abjadnanyja. Pa daviedki ŭ hetuju haspadarku mnie daviałosia chadzić čatyry miesiacy. Ja patrabavaŭ dać mnie daviedku z ulikam usich maich hrašovych vypłat padčas pracy hałoŭnym inžynieram i dyrektaram, a heta zarobak, premii, dapłaty pa vynikach pracy za hod. Ale mnie imknulisia dać tolki źviestki pra zarobak, akład. Na majo patrabavańnie ŭličyć dapłaty i premii, a jany składali ad 500-700 rubloŭ da paŭtary tysiačy, u buchhałteryi OAO «Novaja Druć»
prahučaŭ zabojny arhumient: «Kali my heta ŭsio ŭličym, to dla vas duža mnoha budzie».
Tolki paśla zvarotu ŭ prakuraturu i adździeł sacyjalnaha zabieśpiačeńnia Białynickaha rajona, a paśla ŭ sud Škłoŭskaha rajona, dzie adbylisia try pasiedžańni, Ryhoru Kastusiovu ŭdałosia damahčysia ŭklučeńnia premij i dapłat u naličeńnie piensii.
«Heta cełaja epapeja. Bo tam było takoje, što zhubili niekatoryja hady i miesiacy. Ale dziakuj bohu, sud da hetaha pastaviŭsia stanoŭča i razabraŭsia va ŭsich niuansach. Ale heta ja zmoh damahčysia, bo pracavaŭ na pasadach i razumieju situacyju. A kolki ž ludziej zastalisia ź nie ŭličanymi zarobkami?!Tamu tut, vidać, varta ŭmiašacca Kamitetu dziaržkantrolu i respublikanskaj prakuratury. Bo ja dumaju, što paciarpieli nie adzinki, a moža dziesiatki i sotni čałaviek na pradpryjemstvie, jakoje ciapier achoplivaje pałovu Białynickaha rajona. Darečy, kiruje OAO «Novaja Druć» senatar Anatol Drazdoŭ. Ale ja dumaju, što takaja situacyja moža być i pa ŭsioj krainie. Heta prosta «kidałava».
Ryhor Kastusioŭ aficyjna vyjšaŭ na piensiju 17 kastryčnika 2017 hoda.
Kamientary