Viktar Prakapienia: Što novy IT-dekret daść prostym ludziam

U čym praktyčnaje značeńnie IT-haliny dla krainy? Jakoje jaje prykładnoje prymianieńnie ŭ roznych siehmientach ekanomiki i žyćcia? Pytańnie ab novych pierśpiektyvach sb.by adrasavaŭ vykanaŭčamu dyrektaru kampanii VP Capital, doktaru ekanamičnych navuk Viktaru Prakapieniu.

— Što novy dekret daść zvyčajnym ludziam, nieajcišnikam?

— Z majho punktu hledžańnia, u sučasnaj ekanomicy nielha ničoha dać — možna tolki ŭziać. Kali dasi adnapakajovuju kvateru — spytajuć, čamu nie dva pakoi. Daješ 500 dalaraŭ zarpłaty — spytajuć, čamu nie 1.000. Tamu, jak mnie zdajecca, važna rastłumačyć ludziam, što žyćcio samo im ničoha nie daść. U žyćci možna siońnia tolki ŭziać. U ramkach zakona, zrazumieła. Uziać svaimi viedami, prafiesijanalizmam, matyvacyjaj. I dla hetaha siońnia dziaržava stvaryła najlepšyja ŭmovy.

— Heta značyć, pierachod da ličbavaj ekanomiki — heta pieravarot nie stolki ŭ vytvorčaści, kolki ŭ hałavie?

— Možna skazać i tak. U novym śviecie hałoŭnaja praca budzie zaklučacca ŭ tym, kab za košt viedaŭ vyrablać novyja viedy. Ludziam varta zrazumieć: zadača dziaržavy — nie zabiaśpiečvać im kavałak chleba, a stvaryć umovy, u jakich jany sami mohuć zarablać na jakasnaje žyćcio.

— Jašče ŭ 2015 hodzie śpiecyjalisty «Skołkava» padrychtavali Atłas novych prafiesij — daviednik, jaki adlustravaŭ jak pierśpiektyŭnyja, tak i prafiesii, jakija admirajuć. Apošnich vydzielena až 57: archivaryus, dyśpietčary, miedycynskija dyjahnosty, turahienty, buchhałtary, mieniedžary, jurysty, žurnalisty i navat inśpiektary darožnaha ruchu. Ličba zamienić čałavieka?

— Całkam. Robaty robiać prostyja apieracyi našmat bolš efiektyŭna, čym ludzi. Praz 20 hadoŭ nie budzie i takoj prafiesii, jak kiroŭca. Vadzić mašyny buduć robaty. Ale nie varta kazać pra vyciaśnieńni ludziej — prosta ludzi zmohuć pracavać na inšych, časta bolš cikavych pracoŭnych miescach. Toje ž samaje adbudziecca ź vialikaj kolkaściu inšych prafiesij. Chočam my taho ci nie, ale rabatyzacyja ŭžo adbyvajecca, pryčym jaje temp budzie tolki paskaracca.

— Jak ža nie adstać ad hetaha pracesu, nie zastacca na ŭzbočynie tych źmianieńniaŭ, što adbyvajucca?

— Dla hetaha nieabchodna pastajanna i efiektyŭna vučycca. Takoha, jak było raniej — atrymaŭ adnu prafiesiju raz i nazaŭsiody i kropka, — bolš nie budzie. Atrymlivać novyja viedy treba pastajanna. Śviet viedaŭ havoryć na anhlijskaj movie. Tamu žyćciova nieabchodna jaje vučyć. Kožnaje dzicia, zakančvajučy škołu, pavinna viedać anhielskuju movu na vysokim uzroŭni. Samyja sučasnyja kursy siońnia dastupnyja ŭ internecie, pryčym biaspłatna. Tak, niaprosta prymusić siabie vučyć niešta novaje, asabliva dla ludziej stałaha ŭzrostu. Ale treba vyjści z zony kamfortu, prymusić siabie. Tym bolš što Biełaruś — adno z najlepšych miescaŭ u śviecie dla realizacyi siabie ŭ novaj ekanomicy.

— Možacie patłumačyć?

— Dziaržava zabiaśpiečvaje spakoj i biaśpieku. Daje mahčymaść atrymlivać adukacyju i stvaraje lepšyja ŭmovy dla prafiesijnaj realizacyi. Usio astatniaje zaležyć ad vas. Samaja hałoŭnaja kaštoŭnaść u sučasnym śviecie nie pryrodnyja resursy i nie zołatavalutnyja reziervy. Bahaćcie stvarajuć ludzi, pryčym — adukavanyja ludzi. Heta hałoŭny resurs i hałoŭny rezierv. Znachodziačysia ŭ epicentry suśvietnaj kankurencyi, vyjhraje toj, chto zabiaśpiečyć najlepšuju adukacyju.

• 0
• 0
• 0
• 0
• 0
• 0
• 0
• 0