10 padpisantaŭ Dekłaracyi niezaležnaści Izraila — ludzi ź Biełarusi

19 krasavika ŭ Izraili adznačyli 70-hodździe niezaležnaści. Deklaracyju niezaležnaści Izrailu padpisali 37 čałaviek: 9 ź ich naradzilisia na terytoryi ciapierašniaj Ukrainy, 7 — Polščy, 3 — Małdovy, pa 2 — Niamieččyny i Litvy i pa 1 — Vuhorščyny, Danii, Jemenu i Palestyny (u składzie Asmanskaj imperyi). A najbolš padpisantaŭ — 10 — pachodziać ź Biełarusi.

Voś jany:

Elijahu Berlin (1866, Mahiloŭ — 1959, Tel Aviŭ). Hramadzki i palityčny dziajač, skončyŭ jurydyčny fakultet Maskoŭskaha ŭniversytetu. Udzielnik Pieršaha sijanisckaha kanhresu. Pierajechaŭ u Palestynu ŭ 1907 hodzie.

Elijahu Dobkin (1898, Babrujsk — 1976, Tel Aviŭ). Adzin ź lideraŭ ruchu rabočych sijanistaŭ. Vučyŭsia ŭ Charkavie, paśla Pieršaj suśvietnaj vajny pierabraŭsia ŭ Biełastok. U 1932 hodzie emihravaŭ u padmandatnuju Palestynu. Padčas Druhoj suśvietnaj vajny arhanizoŭvaŭ nielehalnuju imihracyju eŭrapiejskich habrejaŭ u Palestynu. Zasnavalnik Muzeju Izrailu.

Zejeŭ Hołd (1889, Ščučyn, — 1956, Jerusalim). Rabin u vośmym pakaleńni. U 1907 emihravaŭ u ZŠA, dzie byŭ adnym ź pijaneraŭ artadaksalnaha judaizmu. U 1935 hodzie emihravaŭ u Palestynu.

Eliezer Kapłan (1891, Miensk — 1952, Tel Aviŭ). Palityk, sijaniscki aktyvist. Skončyŭ vučobu ŭ 1917 hodzie ŭ Maskvie pa śpiecyjalnaści inžynier-budaŭnik. Udzielnik delehacyi UNR na Paryskaj mirnaj kanferencyi. U 1920 hodzie imihravaŭ u Palestynu. Paśla abviaščeńnia niezaležnaści zajmaŭ pasty ministra finansaŭ, ministra handlu i pramysłovaści, u 1952 byŭ vice-premjeram Izrailu.

Aŭram Kacnelson (1888, Babrujsk — 1956). Vučyŭsia va ŭniviersitetach Pieciarburha i Maskvy, doktar medycyny. Padčas Pieršaj suśvietnaj vajny — lekar u rasiejskim vojsku. Z 1924 hodu ŭ Palestynie. Paśla abviaščeńnia niezaležnaści — na dyplamatyčnaj pracy ŭ AAN, Švecyi.

Moše Kol (1911, Pinsk — 1989). Palityk, sijaniscki aktyvist. Imihravaŭ u Palestynu ŭ 1932 hodzie. U 1960-70-ch hadach zajmaŭ pasady ministra turyzmu i ministra raźvićcia. Aŭtar niekalkich knih pra izrailskuju źniešniuju i ŭnutranuju palityku.

Moše David Remez (1889, Kopyś — 1951, Jerusalim). Palityčny i dziaržaŭny dziajač. Pierajechaŭ u asmanskuju Palestynu ŭ 1913 hodzie. Za časy brytanskaha mandatu adzin z zasnavalnikaŭ levaj partyi Mapaj, lider prafsajuznaha ruchu. Paśla abviaščeńnia niezaležnaści zajmaŭ pasady ministra transpartu, paśla ministra adukacyi. Pisaŭ artykuły i vieršy, uvioŭ u sučasny iŭryt niamała novych słovaŭ i vyrazaŭ.

Chaim Moše Šapira (1902, Horadnia — 1970). Palityčny i dziaržaŭny dziajač, palityčny lider relihijnaha sijanizmu. Paśla Pieršaj suśvietnaj vajny žyŭ u Koŭnie, Vilni, Varšavie, Berlinie. U 1925 hodzie imihravaŭ u Palestynu. U 1938 hodzie byŭ nakiravany ź misijaj ratavańnia habrejaŭ Aŭstryi paśla Anšlusu. Paśla abviaščeńnia niezaležnaści zajmaŭ pasady ministra achovy zdaroŭja, ministra ŭnutranych spravaŭ, ministra ŭ spravach relihii.

Zerach Varhaftyh (1906, Vaŭkavysk — 2002). Juryst, palityk i rabin. Skončyŭ jurydyčny fakultet Varšaŭskaha ŭniversytetu. Z pačatkam Druhoj suśvietnaj vajny ŭciok z Polščy ŭ Litvu. Padčas vajny razam ź japonskim vice-konsułam u Litvie Suhicharam arhanizavaŭ vydaču habrejskim uciekačam vizaŭ dla vyjezdu z SSSR praź Japoniju na vostraŭ Kiurasao, usiaho było vydadziena 1600 vizaŭ i ŭratavana šmat žyćciaŭ. Imihravaŭ u padmandatnuju Palestynu ŭ 1947 hodzie. Adzin z zasnavalnikaŭ Universytetu Bar-Iłana.

Aron Cyźlinh (1901, Naračevičy, Mienskaja hubernia — 1964, Ejn-Charod). Hramadzki i palityčny dziajač. U 1914 hodzie pierajechaŭ ź siamjoj u Palestynu. U 1930-ch hadach aktyvist maładziovaha ruchu, jaki zajmaŭsia ratavańniem habrejskaj moładzi ad nacystaŭ. Paśla abviaščeńnia niezaležnaści byŭ pieršym ministram sielskaj haspadarki Izrailu.

Ź Biełarusi pachodzić i šmat inšych izrailskich dziaržaŭnych, palityčnych i hramadzkich dziejačoŭ, u tym liku try prezydenty — Chaim Vejcman (pieršy, 1949-1952), Załman Šazar (treci, 1963-1973) i Šymon Peres (dziaviaty, 2007-2014).

• 0
• 0
• 0
• 0
• 0
• 0
• 0
• 0