Biełaruś u rekordnych daŭhach

Biełaruskija ŭłady pajšli na pakłon da Mižnarodnaha valutnaha fondu dziela ŭratavańnia ekanamičnaj stabilnaści. Adnačasova jany biaruć čarhovy hihancki kredyt u Maskvie. U vyniku hetaha zapazyčanaść krainy pabje rekordy.

Rasiejski ŭrad pryniaŭ pryncypovaje rašeńnie vydać Biełarusi $2 miljardy stabilizacyjnaha kredytu. Pra heta paviedamiŭ ministar finansaŭ Rasiei Alaksiej Kudryn.

Jon ŭdakładniŭ, što adzin miljard pierakažuć ciapier, a jašče adzin — ciaham nastupnaha hodu, pieradaje ahienctva «Prajm-TASS».

Bolš za toje, na nastupny dzień paśla viestki z Maskvy stała viadoma, što Nacyjanalny bank Biełarusi źviarnuŭsia da Mižnarodnaha valutnaha fondu z prośbaj vydzielić rezervavy kredyt u pamiery 2 młrd dalaraŭ ZŠA. Heta moža być śviedčańniem narastańnia prablemaŭ u finansavaj sfery krainy.

Biełaruś abychodziłasia biez kredytaŭ MVF ad siaredziny 90-ch, navat u skrutnyja časy rasijskaha defołtu. Varta zaznačyć, što ŭ pačatku 2004 hodu Biełaruś zajaŭlała ab svajoj admovie pravodzić dalejšyja pieramovy z MVF ab vydzialeńni rezervavych kredytaŭ. Niezdarma niekatoryja rasijskija ekanamisty prahnazavali, što ciapierašni ekanamičny kryzis akažacca hłybiejšym za abvał 1998 hodu.

«Kredyt nieabchodny dla papaŭnieńnia zołatavalutnych rezervaŭ krainy», — rastłumačyŭ dla ahienctva BiełaPAN načalnik upraŭleńnia infarmacyi Nacbanku Anatol Drazdoŭ. Pavodle jaho słoŭ, «reakcyi MFV pakul niama, tamu što adozva była dasłana na hetym tydni».

Jak paviedamlałasia raniej, rezervavyja aktyvy Biełarusi u nacyjanalnym vyznačeńni skaracilisia za vierasień na 11,8% (na 658,9 młn dalaraŭ) i skłali na pačatak kastryčnika 4 młrd 944,2 młn dołaraŭ. Pry padliku pavodle metodyki MVF aktyvy za vierasień skaracilisia trochi mienš, na 10% (460 młn.) i skłali 4 młrd. 119,9 młn. dalaraŭ.

Kastryčnickija źviestki stanuć viadomyja ŭ siaredzinie listapada — nia fakt, darečy, što ich paviedamiać praŭdziva. Bo pytańniami kryzisu zanialisia siłavyja struktury, jakija pieradusim majuć na mecie nie dapuścić paniki na rynku bankaŭskich pasłuh.

2-miljardny kredyt Rasiei — heta rekordnaje pazyčańnie Biełarusi. U kancy 2007 hodu Biełaruś atrymała ad Maskvy 15-hadovy kredyt na 1,5 miljarda dalaraŭ pad staŭku LIBOR + 0,75% ź piacihadovaj adterminoŭkaj spłaty asnoŭnaha doŭhu. Sioletni kredyt pieraŭzyšoŭ toj papiaredni. Umovy jaho pakul nie paviedamlajucca.

Novaje pazyčańnie daviadzie zamiežny doŭh našaj krainy da rekordnaha ŭzroŭniu: minimum 17 młrd dalaraŭ na kaniec hetaha hodu, abo 1700 dalaraŭ na kožnaha hramadzianina krainy, z małymi ŭłučna, kali nia bolš. A heta rost amal utraja za dva hady! Pa stanie na 1 studzienia 2007 hodu sukupnaja zamiežnaja zapazyčanaść (uradu, bankaŭ i pradpryjemstvaŭ) składała 6,8 młrd, na 1 studzienia 2008 hodu — užo 12,5 młrd dalaraŭ, a na 1 lipienia 2008 hodu —14,1 młrd.

Tym časam finansavy kryzis u śviecie pierarastaje ŭ pramysłovy. Hetak, spyniŭ pracu Ŭładzimirski traktarny zavod. Praź źnižeńnie popytu na metał zhaśli piečy ŭkrainskich metałurhičnych zavodaŭ i Mahnitki. Siarod apošnich tryvožnych navinaŭ — niamiecki partnior «Biełarusbanku» akazaŭsia na miažy bankructva. Jak paviedamlaje niamieckaje vydańnie Sueddeutsche Zeitung, Bayerische Landesbank (BayernLB), jaki z 2006 hodu ščylna kredytuje biełaruskija banki, byŭ vymušany śpisać 4 młrd eŭra ŭkładańniaŭ.

Ciapierašni ŭzrovień zapazyčanaści jašče nie fatalny dla haspadarki Biełarusi, ale dola karotkaterminovych pazykaŭ moža vyklikać peŭny kłopat. Zatoje 2- ci 4-miljardnaja pazyka stanie nadziejnaj paduškaj na čas suśvietnaha finansavaha kryzisu. A što budzie praź piać hadoŭ, paśla nas? Moža i patop.

* * *

Brania krapka, i tanki našy bystry

Łord Beł ci nia łord Beł, ale voś aficyjnaja spravazdača pra čarhovuju sustreču Alaksandra Łukašenki z kiraŭnikom Nacbanku Piatrom Prakapovičam: «U Biełarusi budzie harantavana poŭnaje viartańnie ŭsich układaŭ u bankach. Takaja mahčymaść budzie praduhledžana ŭ Dekrecie Prezydenta Respubliki Biełaruś, prajekt jakoha daručana ŭ ścisłyja terminy padrychtavać Nacyjanalnamu banku. Piotr Prakapovič adznačyŭ, što padrychtoŭka hetaha dakumentu vyklikana taksama i tym faktaram, što

apošnim časam u suviazi z padziejami ŭ susiednich krainach da nas stała źviartacca vielmi šmat zamiežnych hramadzian z prośbaj raźmiaścić svaje ŭkłady ŭ bankaŭskaj systemie Respubliki Biełaruś».

• 0
• 0
• 0
• 0
• 0
• 0