Feljeton Lolika Uškina.
Feljeton Lolika Uškina.
Zasnavalniki BRSM — maje adnahodki (im prykładna hadoŭ pa 30—35). I kali siońnia ja baču na praspekcie raściažki «40‑y źjezd BRSM. 90 hadoŭ kamsamołu», mianie trochi vyrubaje.
Varyjant pieršy — zasnavalniki BRSM ad 1998 hodu adzinaje, što rabili, — pravodzili źjezdy. Za dziesiać hadoŭ isnavańnia łukamołu jany ŭmudrylisia 39 razoŭ sabrać svoj aktyŭ. Ličba, vartaja knihi rekordaŭ Hinesa.
U heta słaba vierycca, pakolki siabry BRSM, jak my viedajem, nie kantorskija pacuki. Jany ŭvieś čas iduć u masy, nie puskajuć ludziej u internaty paśla 23‑j, kapajuć kanały i ramantujuć opernyja teatry. U lubym vypadku navat technična pravieści źjezd bolš, čym raz na hod, składana.
Zastajecca varyjant — BRSM sapraŭdy była zasnavanaja jak minimum sorak hadoŭ tamu ludźmi, jakim ciapier hadoŭ 30—35.
Blin, jak chočacca pabačyć toj histaryčny pieršy źjezd. Razynka sytuacyi ŭ tym, što na toj momant, za piać hadoŭ da svajho naradžeńnia, aktyvisty BRSM jašče nie mahli być pradstaŭlenyja navat u formie kletačnych struktur čałaviečaha arhanizmu.
Prablemu dazvalaje rastłumačyć kancepcyja prychilnikaŭ Budy, jakija ličać, što dušu čałaviek nabyvaje pry naradžeńni ad inšaj žyvoj istoty. Jak praviła havorka idzie pra raśliny abo žyvioł.
Takim čynam, ideja BRSM naradžałasia ŭ pošumie kanaplanych paloŭ, čułasia ŭ rykańni statkaŭ na małočna‑tavarnych fermach, u rochkańni mahutnych śvinakompleksaŭ poźniaha beseseru.
Ale apuścim budyscki etap. Ad šostaha zbory BRSM ujavić kudy lahčej. Prynamsi na hety čas łukamolcy byli aformlenyja ŭ vyhladzie spermatazoidaŭ. Chacia samo pa sabie vidovišča spermatazoidaŭ, jakija vyhaniajuć na subotnik studentaŭ, uražvaje.
Źjezdy BRSM prykładna da kanca 1970‑ch chutčej za ŭsio mieli farmat pasiadziełak u piasočnicy. Darosłyja, jakija prachodzili mima, mahli pačuć dziŭnyja repliki.
— Tavaryšy, ja chaču pastavić na źjeździe pytańnie — čamu staršynia harkamu kidaŭsia piaskom i nazvaŭ mianie «kaka»?
Baćkam, jaŭna, było niaprosta z budaŭnikami kvitniejučaj Biełarusi.
— Chočaš cukierku?
— Chaču pikiet ambasady ZŠA!
A jakija žarści kipieli na tynejdžarskich źjezdach! Chto lepšy — «metał» ci «vałna»? Remba ci Brus Li? Łukašenka ci Kiebič?..
I tolki ŭ 1990‑ia źjezdy pačali nahadvać zvyčajnyja. Salidnyja ludzi ŭ halštukach źbirajucca, piłujuć biudžet, klanucca ŭ viernaści, kryčać «Zaŭždy napierad» i h.d.
Chacia ŭ dušy, dumajecca, jany dasiul žyvuć hieraičnaj ramantykaj pieršych źjezdaŭ.
Kamientary