Dziaržsakratar Rady Biaśpieki: Patryjatyzm pavinien zakładvacca va ŭsie śfiery žyćciadziejnaści dziaržavy
Dziaržaŭny sakratar Rady biaśpieki Stanisłaŭ Zaś daŭ vialikaje intervju haziecie «SB. Biełaruś siehodnia». Tema intervju — patryjatyzm i jaho miesca ŭ siońniašnim śviecie i Biełarusi.
«Tezis ab sastareńni paniaćcia patryjatyzmu, navat u naš viek hłabalizacyi i prahmatyzmu, — u korani niasłušny. Viadučyja pazicyi ŭ sučasnym śviecie zajmajuć mienavita krainy z ustojlivaj nacyjanalnaj identyčnaściu i vysokim uzroŭniem raźvićcia patryjatyzmu», — adznačaje Zaś.
Admietna, što va ŭsim vialikim intervju nivodnaha razu ničoha nie było skazana pra biełaruskuju movu, nibyta jana nie źjaŭlajecca častkaj patryjatyčnaha vychavańnia.
«Zakliki admovicca ad nacyjanalnaha patryjatyzmu jak pieražytku minułaha, razmyvańnie isnujučaj sistemy kaštoŭnaściaŭ źjaŭlajucca kampanientami tak zvanaj «miakkaj siły», jakaja dazvalaje efiektyŭna kiravać značnymi masami nasielnictva ŭ krainach — abjektach infarmacyjna-psichałahičnaha ŭździejańnia», — adznačaje čynoŭnik.
A jakim čynam sprabujuć razmyć paniaćci patryjatyzmu? Stanisłaŭ Zaś upeŭnieny, što ŭniadreńniem idej kasmapalityzmu.
«SSSR mnohija hady ŭ vačach svaich hramadzian paŭstavaŭ suśvietnym lidaram z samym pieradavym hramadskim ładam, avanhardam «prahresiŭnaha» čałaviectva, krainaj z najlepšymi ludźmi, navukaj, technikaj, ekanomikaj, šmatlikimi dasiahnieńniami ŭ roznych halinach. Saviecki Sajuz sapraŭdy było za što šanavać. I jaho šanavali da taho času, pakul narod nie rasčaravaŭsia ŭ samich idejach sacyjalizmu i kamunizmu. Stvaryłasia adčuvańnie, što takuju krainu niama za što lubić, tamu, kali jana pačała razburacca ŭ 1991 hodzie, jaje cełasnaść nichto realna nie abaraniŭ», — adznačaje Zaś.
Niezaležnaść sa słovaŭ Zasia paŭstaje hałoŭnaj kaštoŭnaściu.
«Vyvad z hetaha zrabili praktyčna ŭsie byłyja savieckija respubliki, jakija ŭklučyli ŭ lik svaich idejnych pryjarytetaŭ pryncypy kansalidacyi nacyi i hramadskaha ŭśviedamleńnia suvierenitetu».
«U Biełarusi nieadnaznačna spałučajucca dosyć supiarečlivyja tendencyi zachavańnia kaštoŭnaściaŭ savieckaj epochi i ŭkaranieńnia zachodnich standartaŭ. Choć zusim nie abaviazkova kateharyčna vybirać pamiž pieršym i druhim — bo my i sami majem prava kanstrujavać i vytrymlivać nieabchodnyja nam matrycy kaštoŭnaściaŭ. Taksama šmat u čym nazirajecca prajhravańnie sastarełych sensaŭ zamiest aktualnych tem i siužetaŭ. Prykład tamu — šyroka raspaŭsiudžany litaraturny simvał biełarusaŭ jak «ludziej na bałocie». U imklivym śviecie vysokich technałohij vielmi sumnieŭna, što moładź budzie pracavać na roskvit dziaržavy z takim vobrazam», — adznačaje Stanisłaŭ Zaś.
Pa jahonych słovach, niemahčyma budavać krainu i na staronkach ź minułaha, jak VKŁ, Reč Paspalitaja, Rasijskaja impieryja ci BSSR, bo ŭ krainie niama kansensusu pa hetych staronkach. Adzinaja tema, jakaja nie vyklikaje sprečak — Vialikaja ajčynnaja vajna.
«Mienavita tamu jana abranaja ŭ jakaści kansalidujučaha histaryčnaha pieryjadu, u tym liku farmiruje nacyjanalnuju identyčnaść, patryjatyzm i adzinstva biełaruskaha hramadstva», — zaznačaje Zaś.
«Viadoma ž, pry realizacyi patryjatyzmu jak nacyjanalnaj kaštoŭnaści varta paźbiahać krajnich formaŭ jaho vyražeńnia, zdolnych u vyniku pieratvaryć patryjatyzm u radykalny nacyjanalizm. Varta kiravacca razumieńniem taho, što raźvićcio patryjatyčnaj idei, jaje pastajannaje pryvićcio hramadstvu, vychavańnie patryjatyzmu pavinna nasić nie płanavy i navat nie prahramny, a pastajanny charaktar. Patryjatyzm pavinien stanavicca prykmietaj dobraha tonu, stałaści i zakładvacca va ŭsie śfiery žyćciadziejnaści dziaržavy», — adznačaje dziaržsakratar Rady biaśpieki.
Apytanka
Ciapier čytajuć
Anžaliku Mielnikavu bačyli ŭ Minsku ŭ «Dana Mole»58
Kamientary