Kab źziać: 5 varyjantaŭ śviatočnaha makijažu dla tych, chto lubić vyłučacca z natoŭpu
Razam z vizažystkaj Ładaj Bałakiravaj padrychtavali dla vas niekalki niebanalnych bjuci-šparhałak, jakija dapamohuć na navahodnija śviaty stać zorkaj luboj viečaryny.
Usie varyjanty nie patrabujuć surjoznych finansavych vydatkaŭ i ich lohka zmoža paŭtaryć navat navičok u makijažy.
Hety mejk kruty z usich bakoŭ: jon dosyć niejtralny, adnosna chutka robicca, padydzie dla absalutna lubych vačej (navat dla navisłaha pavieka, jakoje čamuści lubiać sabie prypisvać biez asablivych na toje pryčyn našy dziaŭčaty). I kaśmietyčnych srodkaŭ patrabujecca minimum. Ja vykarystoŭvała rassypisty hlitar Essence, jaki ŭjaŭlaje saboj miks z hałahrafičnych sierabrystych małanak i čyrvonych zoračak, jon niedarahi i paŭsiudna pradajecca ŭ Biełarusi. U sieryi ich niekalki, tak što možna abrać na svoj hust. Kali hlitar nie pryžyviecca ŭ vašym makijažy — śmieła vykarystoŭvajcie na paznohci pad prazrysty łak!
Kab zamacavać hlitar na paviekach, možna ŭziać śpiecyjalny prajmier, klej dla paviek ci navat łubrykanty (mienavita tak pastupiła ja). Zusim ekstremalny, zatoje ahulnadastupny varyjant — vazielin ci balzam dla vusnaŭ.
Hlitar prylipnie, ale nie ździŭlajciesia, kali elemienty mejkapa z časam paspaŭzajuć ad haračych tancaŭ i pyrskaŭ šampanskaha ŭ tvar.
Kreatyŭny makijaž vačej možna dapoŭnić pamadaj u ton — hatova, vy raskošny!
Novy hod = źziańnie, i kali ŭ ofisnaj rucinie nie zaŭsiody atrymlivajecca być jarkaj, to ŭ noč z 31-ha na 1-je možna adarvacca. Pryčym dla hetaha dastatkova skambinavać dva jarkija pradukty, jakija zatym na praciahu hoda možna paśpiachova vykarystoŭvać asobna ŭ štodzionnym makijažy (jak bačycie, vytvorčaść biezadchodnaja).
Nam spatrebiacca vadkija bliskučyja cieni (u mas-markiecie ich mnostva: źviarnicie ŭvahu na marki Essence, Catrice i Eveline, a taksama na biełaruskija pamady-mietalik), tonki sintetyčny pendźlik i tuš na vaš vybar — čornaja abo kalarovaja. Ja lublu biełaruskija kalarovyja tušy, błakitnuju Secret ad LuxVisage i voś hetuju pylnuju zialonuju Mascarad ad Relouis. Farbavacca imi možna husta, u niekalki słajoŭ dla vaŭ-efiektu, ci tolki źlohku adcianiać končyki viejek.
Kali maluješ strełki vadkaj padvodkaj, cieniami ci pamadaj, hałoŭnaje — maksimalna akuratna mirhać, kab pradukt nie adlustravaŭsia na paviekach i nie papłyŭ u zmorščynki. Moj sakret prosty: ja staŭlu lusterka na ŭzroŭni padbarodka i hladžu ŭ jaho źvierchu ŭniz.
Dadajom niejtralnuju pamadu, troški (ci nie) chajłajtara — i navat navahodniaja jalinka pamierknie ŭ paraŭnańni z vami.
Kali vy pabojvajeciesia jarkich pamad ci nie farbujecie vusny zusim, navahodniaja viečarynka — samy čas usio ž niešta pasprabavać. Ryzyka, što vam vielmi spadabajecca, dosyć vialikaja. Kłasnych pamad u mas-markiecie mnostva, ź biudžetnych možna nabyć biełaruskija PinUp ad LuxVisage (vadkija) abo Alta Moda ad Relouis (u ścikach), a taksama žalezabietonnyja matavyja Maybelline SuperStay Ink.
Zrabić makijaž vusnaŭ jašče bolš śviatočnym dapamoža kontur kantrasnaha koleru, a jašče lepš — bliskučy. Kab akreślić jaho, ja vykarystoŭvała suchija cieni, naniesienyja vilhotnym pendźlikam. Ale heta varyjant dosyć składany, kudy praściej uziać ałovak dla vačej (kłasnyja mietaliki dakładna jość u Essence i Catrice pa dastupnych cenach). Pry žadańni kontur možna rastušavać unutr i atrymać efiekt ambre. A voś farbavać vusny bližej da ślizistaj čymści takim źziajučym ja b nie raiła: jak aliŭje jeści potym? Ad ježy, kuflaŭ i pacałunkaŭ unutranaja častka abaviazkova papaŭzie, a padpravić heta ŭ palavych umovach budzie prablematyčna. My ŭsio ž taki za toje, kab makijaž nasiŭsia doŭha.
Kali jašče dazvoliš sabie takuju «cyhanščynu», jak nie na Novy hod? Spatrebiacca ŭsiaho tolki samaklejkija strazy (ich lohka kupić u knižnym ci kramie z tavarami dla tvorčaści i rukadziella). Ja namalavała toŭstyja strełki čyrvonymi cieniami (u maim vypadku Colourpop, lohka možna zamianić vadkaj pamadaj, ale budźcie aściarožnyja, kali ŭ vas dalikatnyja vočy), dadała pryblizna tonu chajłajtaru na ŭvieś tvar (kali być bolš dakładnaj, bliskučych cieniaŭ Relouis Pro ŭ adcieńni 53) i minimalistyčny ŭzor sa strazaŭ. Miesca, kudy vy źbirajeciesia ich lapić, lepš papiarednie abiastłuścić vatnaj pałačkaj, zmočanaj tonikam dla tvaru ci micelarnaj vadoj. Pry hetym kolery i formy mohuć być lubymi. Ja abrała čyrvony i zialony jak tradycyjnyja navahodnija, ale vy možacie spałučać ich sa svaim uboram ci koleram vačej.
Praviłaŭ niama!
Pratrymajecca taki mejk stoadsotkava stolki, kolki treba. Tak što rekamienduju, kali płanujecca niešta vielmi haračaje.
Nu i, narešcie, možna prosta pieraapranucca va ŭsio najlepšaje adrazu, sabraŭšy trendy roznaj stupieni aktualnaści. Tut u mianie drejpinh rumianami koleru «žyvy karał» (dobryja jość u Wet'n'wild, možna kupić na Wildberries), doŭhaja hłem-strełka (Deer Eyes ad Relouis niama roŭnych na rynku pa suadnosinach košt-jakaść) i hlitarnyja brovy.
Kali łaska, budźcie aściarožnyja z hlitaram: heta ŭsio jašče mikrapłastyk, niebiaśpiečny dla navakolnaha asiarodździa. Na žal, znajści bijaraskładalny ŭ Biełarusi mnie nie ŭdałosia.
Akramia taho, abirajcie bliskaŭki, admysłova stvoranyja dla makijažu, astatnija (naprykład, dla skrapbukinha ci nejł-artu) na tvar i asabliva vobłaść vačej nanosić ni ŭ jakim razie nielha. Akramia brovaŭ, hlitaram možna ŭpryhožyć karani vałasoŭ na skroniach abo prabor (pasadziŭšy na hiel dla ŭkładki). Ale budźcie hatovyja da taho, što jon stanie vašym viernym spadarožnikam na bližejšyja paru dzion i budzie raptoŭna źjaŭlacca ŭ samych niečakanych miescach. Zatoje jak pryhoža!
Ci patrebnaja biełaruskaja mova tym, chto razmaŭlaje pa-rusku? Azaronak zadaŭsia takim pytańniem na STB, a vypusknik Akademii MUS prapanavaŭ zamianić uroki fakultatyvami4444
Kamientary