SK nie znajšoŭ prykmiet «daviadzieńnia da suicydu» u vypadku sa śmierciu radavoha u Słonimskim harnizonie
Śledčy kamitet admoviŭ u zaviadzieńni kryminalnaj spravy pa fakcie śmierci 20-hadovaha Alaksandra Arłova ŭ Słonimskim harnizonie vosieńniu 2018-ha. Ale rodnyja kateharyčna nie zhodnyja ź viersijaj suicydu, paviedamlaje Radyjo Svaboda.
20-hadovaha Alaksandra Arłova ź vioski Krasnaje Karelickaha rajonu pachavali 7 vieraśnia. U Miensku ŭ hety čas išoŭ praces u spravie ab śmierci Alaksandra Koržyča. Arłova, jak i Koržyča, znajšli ŭ piatli ŭ častcy, dzie jon prachodziŭ terminovuju słužbu. Cieła advieźli na ekspertyzu, paśla pieradali rodnym. Aficyjnaja versija śmierci, ahučanaja na sajcie Minabarony, — suicyd. Maci zahinułaha sałdata Volha vykazvała sumnieńni ŭ hetym užo ŭ dzień pachavańnia. Na šyi jaje syna byli vidać dźvie stranhulacyjnyja barazny, što, na jaje dumku, moža śviedčyć pra kryminalny charaktar zdareńnia.
Pravierku pa fakcie śmierci Alaksandra Arłova pravodzili va ŭpraŭleńni Śledčaha kamitetu Hrodzienskaj vobłaści. Jana pačałasia ŭ vieraśni i praciahvałasia amal piać miesiacaŭ. Pa słovach maci zahinułaha sałdata Volhi, u SK joj raskazvali pra nieabchodnaść apytać sasłužyŭcaŭ syna, a taksama pravieści vialikuju kolkaść ekspertyz. List z vynikami pravierki Volha atrymała tolki 26 studzienia 2019 hodu.
«Dasłali list. Pišuć, što schileńnia da samahubstva nie było, — raskazała Svabodzie Volha. — 17.01.2019 upraŭleńniem Śledčaha kamitetu Respubliki Biełaruś pa Hrodzienskaj vobłaści pryniataje rašeńnie admović u zaviadzieńni kryminalnaj spravy pa fakcie śmierci Arłova A. praz adsutnaść składu złačynstva. A adkul dźvie barazny na šyi i paškodžańnie skury na łbie — pra heta ničoha nie havorać. Tekstu medycynskaj ekspertyzy cieła syna mnie nichto nie pakazaŭ. Śledčaja skazała, što nia maje prava mnie jaho pakazvać. Treba pisać zajavu z prośbaj dać mahčymaść aznajomicca. Zajavu buduć razhladać, i tady prymuć rašeńnie, ci ja mahu ŭbačyć hetyja dakumenty».
Rodnyja Alaksandra Arłova źbirajucca abskardžvać pastanovu ab admovie ŭ zaviadzieńni kryminalnaj spravy.
«Napisana, što nie daviadzieńnie da samahubstva, — havoryć maci zahinułaha. — A chto jaho tady pabiŭ, chto paviesiŭ? Adkul dzirka ŭ hałavie? Zdymki ŭsie bačyli. Dźvie barazny na šyi. Heta nie realna. Atrymlivajecca, što jon siabie adzin raz padušyŭ, potym druhi raz palez. Heta ž absurd, razumiejecie?»
«Ja padniaŭ adnaho sa słabavikoŭ — i vypuściŭ jaho na asfalt». Desantnik Rusłan Akostka raskazaŭ, jak adsiedzieŭ 4 hady21
Kamientary