Dźmitryj Palijenka. Fota PC «Viasna»
U Minsku kala dziasiataj hadziny ranicy 20 sakavika ŭ svajoj kvatery byŭ zatrymany aktyvist Źmicier Palijenka. Jaho padazrajuć u ździajśnieńni złačynstva pa artykule 339, č.3 KK RB («Asabliva złosnaje chulihanstva»). Padrabiaznaści zatrymańnia PC «Viasna» raspaviała siabroŭka Źmitra Nasta Husieva.
«Kala 10 ranku ŭ kvateru brutalna ŭvarvalisia ludzi z aŭtamatami, ŭ broniekamizelkach i maskach. Adrazu pavalili Źmitra na padłohu tvaram uniz, adzieli kajdanki. Zatym vybili dźviery ŭ susiedni pakoj, pačali pravodzić vobšuk. Paviedamili, što suprać Źmitra zaviedziena novaja kryminalnaja sprava za «asabliva złosnaje chulihanstva».
Supracoŭniki paviedamili, što sprava nibyta źviazana ź incydentam tydniovaj daŭniny.
«Prykładna tydzień tamu Źmicier čakaŭ svajho siabra na leśvičnaj kletcy i da jaho staŭ čaplacca pjany ahresiŭny mužčyna. Tamu prosta nie padabałasia, što toj tam staić. Jon abražaŭ Źmitra, a zatym udaryŭ jaho pa tvary. Tady Źmicier raspyliŭ piarcovy bałončyk», — pierakazała historyju Nasta.
Vobšuk u kvatery Źmitra ciahnuŭsia kala hadziny. U aktyvista kanfiskavali ŭsiu techniku (kampjutar, mabilny telefon), litaraturu, ulotki, nalepki i h.d. U Nasty Husievaj, jakaja znachodziłasia ŭ toj momant u kvatery, taksama kanfiskavali mabilny telefon.
Viersija śledstva zusim inšaja. U SK paviedamili, što žychar doma zaŭvažyŭ na leśvičnaj placoŭcy nieznajomaha chłopca. Chłopiec kuryŭ. Mužčyna zrabiŭ zaŭvahu, za što jamu ŭ tvar adrazu pyrsnuli z hazavaha bałončyka.
Pa dadzienych śledstva, adbyłosia ŭsio 13 sakavika pryblizna kala 20:00 na leśvičnaj placoŭcy adnaho z damoŭ pa vulicy Hurskaha ŭ Minsku. Tym chłopcam, jak padazrajuć śledčyja, byŭ Źmicier Palijenka, jakoha zatrymali 20 sakavika.
Rasśledavańnie kryminalnaj spravy praciahvajecca, paviedamlaje SK.
Pamiatajecie pravakatara i danosčyka Jaŭhiena Kakojtu? Jon ciapier taksama palitviazień13
Kamientary