«Katavańni, hamafobija, seksizm». U Biełarusi źniali amatarski sieryjał pra milicyju
Jon nazyvajecca «Ściapanyč» i vytrymany ŭ žanry trahifarsu. Pra što jon — stvaralniki raspaviali «Radyjo Svaboda».
Źniali sieryjał hramadskija arhanizacyi «Pravavaja inicyjatyva» i «Dzieja».
Siabra praŭleńnia «Pravavoj inicyjatyvy» i vykanaŭca zahałoŭnaj roli majora Ściapanyča Siarhiej Uścinaŭ kaža, što asnoŭnaj metaj aŭtaraŭ było achapić prablemy parušeńnia pravoŭ čałavieka z boku supracoŭnikaŭ pravaachoŭnych orhanaŭ u postsavieckich krainach.
«My vynošvali ideju vielmi doŭha. I abrali farmat mastackaha filma», — kaža Siarhiej Uścinaŭ.
Scenar tvorčaja kamanda pisała kala 5 miesiacaŭ, jon nie raz karektavaŭsia padčas zdymak. Ahułam stvareńnie sieryjału zaniało 8 miesiacaŭ.
Ci pra Biełaruś sieryjał? Nie zusim. Dziejańnie 10 sieryj razhortvajecca ŭ vydumanym horadzie Komsku ŭ Respublicy Komija. Tak vyrašyli zrabić, bo pravy čałavieka nie majuć miežaŭ i supolnyja dla ŭsich krain. Katavańni, hamafobija, seksizm, nieprymańnie zajaŭ ab złačynstvie — heta biezumoŭnyja parušeńni pravoŭ čałavieka. Stvaralniki pasprabavali paźbiehnuć asacyjacyj z peŭnaj postsavieckaj krainaj. Ale pryznajucca, što całkam heta nie vyjšła.
Pavodle ich, inakš prajekt možna było b nazvać «Budni supracoŭnika palicyi».
Usia kamanda, jakaja pracavała nad prajektam, składałasia z 24 čałaviek.
«U nas nie było biudžetu, i tamu kamanda była abmiežavanaja ŭ vybary akcioraŭ, ale namahalisia padyści z peŭnym prafiesijanalizmam. Chtości z aktoraŭ užo zdymaŭsia raniej, dla kahości «Stiepanyč» staŭ pieršym takim dośviedam. Tamu, što ŭ nas nie było hrošaj dla hanararaŭ, ja sam byŭ vymušany źniacca ŭ hałoŭnaj roli», — kaža Siarhiej Uścinaŭ.
Siarod paznavalnych tvaraŭ — były śledčy prakuratury Frunzienskaha rajona Minska, bolš viadomy jak pravaabaronca, Aleh Voŭčak, jaki ŭžo paśpieŭ źniacca nie ŭ adnym mastackim filmie na kryminalnuju tematyku.
Siarod takich debiutantaŭ — vykanaŭca hałoŭnaj žanočaj roli Julija Švabovič. Dziaŭčyna skančaje vučobu ŭ Biełaruskim dziaržaŭnym univiersitecie pa śpiecyjalnaści «Mižnarodnaje prava». Julija cikavicca pravami čałavieka i supracoŭničaje z «Pravavoj inicyjatyvaj». U asnoŭnym dziaŭčyna dapamahaje pisać skarhi, čaściej za ŭsio, na admovu ŭ jurydyčnaj dapamozie i na katavańni.
Probaŭ u kłasičnym vyhladzie nie było — treba było tolki dasłać niekalki videa režysioru.
«Nasamreč, atrymałasia cikavaja situacyja: ja nie akciorka i raniej ničym padobnym nie zajmałasia. Ale atrymałasia, što ja stała pieršaj, kaho dakładna ŭziali zdymacca ŭ sieryjale. Na toj momant navat hałoŭny aktor płanavaŭsia inšy, a astatnija roli tolki abmiarkoŭvalisia», — kaža Julija.
Jaje hierainia Zoja Nikicina — kolišniaja studentka. Jana tolki trapiła ŭ palicyju i jašče nie paśpieła paznajomicca z asablivaściami pracy. Heta zusim naiŭnaja dziaŭčyna, jakaja vieryć u zakon, spraviadlivaść i choča ŭsim dapamahčy.
«Ale z časam asimilujecca i sama pieratvarajecca ŭ monstra», — kaža Julija.
Niahledziačy na niavopytnaść Julii, zdymki davalisia joj nieskładana. U siarednim było ad 5 da 10 dublaŭ.
Składaniej za ŭsio joj davałasia scena katavańniaŭ.
»Katavać» treba było čałavieka, jaki značna vyšejšy za mianie, dy jašče i maje niejkuju fizičnuju padrychtoŭku. Vyhladała prosta śmiešna! Ale ŭ vyniku atrymałasia lepš, čym ja raźličvała», — kaža akciorka-amatarka.
Usie 10 sieryj «Ściapanyča» źjaviacca na YouTube-kanale «Pravavoj inicyjatyvy» 1 červienia, adrazu paśla prezientacyi. Taksama sieryjał možna budzie pahladzieć u sacsietkach.
Prezientacyja «Ściapanyča» adbudziecca 31 traŭnia ŭ prastory Imaguru.
«A što ŭ vas za prablemy? Daloka da Minska ci niama kamu padvieźci?» Publičnaja pikiroŭka Łukašenki i Pašyniana13
Kamientary