«Achova ptušak Baćkaŭščyny» źviarnułasia da prezidenta z prośbaj sadziejničać chutčejšamu spynieńniu ŭ Biełarusi viasnovaha palavańnia na vodna‑bałotnych ptušak
22 studzienia hramadskaja arhanizacyja «Achova ptušak Baćkaŭščyny» (APB) pieradała ŭ Administracyju prezidenta zvarot z prośbaj sadziejničać chutčejšamu spynieńniu ŭ Biełarusi viasnovaha palavańnia na vodna‑bałotnych ptušak.
Jak paviedamiŭ BiełaPAN śpiecyjalist pa ekałahičnaj adukacyi APB Rusłan Šajkin, svaje podpisy pad zvarotam z prośbaj zakryć viasnovaje palavańnie na vodna‑bałotnych ptušak pastavili zvyš za 20 tys. hramadzian Biełarusi.
Hetuju kampaniju padtrymali, u pryvatnaści, supracoŭniki navukova‑praktyčnaha centra Nacyjanalnaj akademii navuk Biełarusi pa bijaresursach, Biełaruskaja pravasłaŭnaja i Rymska‑katalickaja cerkvy, udzielniki hurtoŭ N.R.M., «Krambambula», «Krama», hrodzienski bard Viktar Šałkievič.
Jak zaznačyŭ R.Šajkin,
viasnovaje palavańnie zabaroniena paŭsiudna ŭ Jeŭropie. Vučonyja dakazali, što jano nanosić značna bolšy ŭron papulacyi vodna‑bałotnych ptušak, čym vosieńskaje: viasnoj adstrelvajucca ptuški, jakija pierazimavali i pavinny ŭdzielničać u razmnažeńni.Ptuški, jakija hniazdujucca, taksama adčuvajuć pastajanny stres ad znachodžańnia ŭ ich uhodździach palaŭničych, sabak, ad strełaŭ. Heta viadzie «da źnižeńnia pośpiechu ich razmnažeńnia», hibieli kładak i vyvadkaŭ. Viasnovaje palavańnie niehatyŭna adbivajecca i na redkich i źnikajučych vidach ptušak, jakich zabaroniena zdabyvać. Redkija vidy sielacca pobač z masavymi, i nastupstvy palavańnia taksama zhubnyja dla ich. Jak vynik — kolkaść šerahu vidaŭ vodna‑bałotnych ptušak u Biełarusi ŭ apošnija dziesiacihodździ pastajanna źnižajecca.
«Źbiadnieńnie papulacyi mnohich vidaŭ vodna‑bałotnych ptušak adznačajuć nie tolki vučonyja, heta ŭsio čaściej i čaściej pryznajecca i samimi palaŭničymi», — padkreśliŭ R.Šajkin. Tak, u liku padpisantaŭ zvarotu — hanarovyja členy hramadskaha abjadnańnia «Biełaruskaje tavarystva palaŭničych i rybałovaŭ».
«My spadziajemsia, što zvarot da prezidenta adyhraje svaju rolu, i budzie pryniata rašeńnie ab admienie viasnovaha palavańnia na vodna‑bałotnych ptušak», — zaznačyŭ śpiecyjalist.
Pavodle jaho słoŭ, ciapier u Biełarusi naličvajecca 34 vidy vodna‑bałotnych ptušak, niekatoryja ź ich tolki pralatajuć cieraz terytoryju krainy. U liku vodna‑bałotnych ptušak — husi, kački, kazarki, lebiedzi, savuki. Zhodna z apošnimi źviestkami ŭliku ptušak u krainie, kolkaść samaha masavaha vidu kačak — kryžanki — aceńvałasia pryblizna ŭ 60—100 tys. asobinaŭ, šerych husiej — u 50—250 par.
SK nazvaŭ imiony tych, chto skinuŭ vybuchoŭku na bazu AMAPa ŭ Minsku ŭ 2021 hodzie9
Kamientary