U Mahilovie nabrali najbolšuju za 9 hadoŭ biełaruskamoŭnuju klasu. U siaredniaj škole № 1 pa-biełarusku buduć navučacca 6 pieršaklaśnikaŭ, piša Radyjo Svaboda.
Aproč šaści pieršaklaśnikaŭ, u SŠ № 1 pa-biełarusku vučacca jašče čaćviora treciaklaśnikaŭ. Jašče ŭ adnoj bazavaj škole ź biełaruskamoŭnymi klasami — 34-j — šaściora vučacca ŭ 4-j klasie i vaśmiora ŭ 2-j.
Na pieršuju liniejku z baćkami pryjšli Maryja Biełaja, Maryja Jermakova, Karalina Łukjanava, Arciom Alenski, Taisija Asipčyk dy Śviatasłaŭ Smalak. Ichnaja klasa — 1 «V».
Jaje kiraŭnica Taciana Mielnikava pryznajecca, što bolš jak za 30-hadovuju nastaŭnickuju karjeru joj upieršyniu davodzicca vučyć klasu z 6 vučniami. Nastaŭnica taksama chvalujecca. Kaža, što raniej u jaje byli zvyčajnyja klasy z 25—30 dziećmi. Spadziajecca, što vučniaŭ paboleje.
«Mnie, viadoma ž, chaciełasia b, kab klasa stała bolšaja, bo tady i kalektyŭ bolšy», — kaža jana.
Paśla liniejki pieršaklaśnikaŭ viaduć u klasy. Dla biełaruskaj vystaŭlenyja piać partaŭ. Try ź ich adrazu zajmajuć vučni.
Brat Taisii Asipčyk Valancin taksama vučycca ŭ biełaruskaj klasie. Dva hady tamu na liniejcy jon stajaŭ biez adnaklaśnikaŭ. Pa słovach jahonaj nastaŭnicy Natalli Aržanavaj, ciapier u treciaj klasie čaćviora vučniaŭ.
Baćka Taisii Ihar Alaksandravič zadavoleny navučańniem syna na biełaruskaj movie. Jon nie sumniavajecca, što i dačka budzie paśpiachovaj vučanicaj. Kiraŭnictva škoły zapeŭniła: navat kali budzie tolki adna zajava, biełaruskuju klasu adkryjuć.
«U syna niakiepska vychodzić vučycca na biełaruskaj movie. Vyrašyli praciahnuć pierajemnaść u navučańni», — tłumačyć Ihar Alaksandravič.
Jon pryznajecca, što sam «nia duža dobra» viedaje biełaruskuju movu, tamu «spaścihaje jaje razam z synam», a ciapier i z dačkoj.
Pavodle mužčyny, vučoba ŭ nievialikaj klasie daje bolš jakasnyja viedy, bo kožny vučań maje bolš uvahi ad nastaŭnika. Na jahonuju dumku, i sam nastaŭnik pavinien uličvać asablivaści pracy ŭ nievialikim vučnioŭskim kalektyvie.
Maci Maryi Biełaj Taciana Piatroŭna kaža, što ŭ siamji doŭha razvažali, u klasu ź jakoj movaj navučańnia addać dačku. Ni jana, ni muž movy nie vučyli. Doŭhi čas žyli ŭ Kazachstanie. Karani ž u ich biełaruskija. Pa słovach Taciany Piatroŭny, kali dačka daviedałasia, u jakuju klasu jaje addajuć, to ździviłasia.
Toje, što ŭ biełaruskaj klasie ŭsiaho šaściora vučniaŭ, surazmoŭnicu nie biantežyć. Jana kaža, što ŭ nievialikim kalektyvie da kožnaha dziciaci budzie indyvidualny padychod.
«Dačka patrabuje dadatkovaj uvahi, a ŭ vialikaj klasie jana budzie hublacca. Hetaja akaličnaść dla nas duža važnaja. A naahuł, čas pakaža, ci zmoža dačka vučycca na biełaruskaj movie», — tłumačyć Taciana Piatroŭna.
Jana kaža, što dačka ŭ sadku čuła biełaruskuju movu. Vychavacielka havaryła ź dziećmi pa-biełarusku. Tamu «Maryja budzie razumieć, što ad jaje choča nastaŭnica».
Taciana Piatroŭna spadziajecca, što prablemaŭ z navučańniem nia budzie, bo škoła «starajecca štohod nabirać dziaciej u biełaruskamoŭnuju klasu, i navučalny praces adładžany».
Maci Arcioma Alepskaha Śviatłana kaža, što pra navučańnie na biełaruskaj movie daviedałasia ad znajomaj, čyja dačka ŭžo vučycca ŭ biełaruskaj klasie.
«Mnie spadabałasia, što dziaciej vučać havorać pa-biełarusku. Jany jaje zasvojvajuć našmat chutčej, čym darosłyja», — kaža jana.
Śviatłana zadavolenaja, što ŭ klasie šaściora dziaciej, a tamu navučańnie budzie bolš efektyŭnaje, čym tam, dzie dziaciej bolš za 25.
Pavodle jaje, Arciom maje maŭlenčuju praktyku. U dziciačym sadku kožny čaćvier pryśviačali biełaruskaj movie. Niepakoić jaje toje, što ŭ inšych navučalnych ustanovach nacyjanalnaj movie nie pryśviačajuć stolki času. Na jaje dumku, heta prablema.
«Kali paśla 4 klasaŭ my navažymsia syści ŭ inšuju navučalnuju ŭstanovu, to jon budzie havaryć na biełaruskaj movie, a nastaŭniki tak nia zmohuć, — tłumačyć svaju pazycyju jana. — Tamu dla mianie duža važna, kab syn viedaŭ i rasiejskuju movu, jak biełaruskuju. Kali ŭbaču, što rasiejskaja mova adstaje, to źviarnusia pa dapamohu da repetytara. Kab syn u adnolkavaj stupieni viedaŭ dźvie movy i moh pieraklučacca z adnaje na druhuju».
Na pytańnie, čamu tady nie addali syna ŭ klasu z rasiejskaj movaj navučańnia, Śviatłana adkazvaje, što joj soramna, kali biełarus nia viedaje svajoj movy.
«Kali my pryjaždžajem niekudy i kažam što ź Biełarusi i nia viedajem svajoj nacyjanalnaj movy, to heta duža nehatyŭna ŭsprymajecca ludźmi», — kaža jana.
Maci Śviatasłava Smalaka Ludmiła kaža, što siamja nie razvažała lišnie, u jakuju klasu adpravić syna. Ludmiliny baćki taksama ŭ svoj čas addali jaje ŭ biełaruskuju klasu. Ciapier jana choča, kab i syn navučyŭsia havaryć na biełaruskaj movie.
Jana ličyć, što ŭ klasie z šaści vučniaŭ da kožnaha dziciaci budzie indyvidualny padychod.
«Buduć pad pryhladam i zaŭždy mohuć raźličvać na dapamohu nastaŭnika», — kaža Ludmiła.
Na jaje dumku, škoła maje specyjalistaŭ, zdolnych vučyć dziaciej na biełaruskaj movie. Praca ŭ biełaruskich klasach dazvolić nastaŭnikam udaskanalvać prafesijanalizm.
Kamientary