Ź Minska na ŭvieś śviet: na Voka projdzie anłajn-ekskursija pa vystavie Łazara Chidekiela
U Suśvietny dzień mastactva, 15 krasavika, na videasiervisie Voka pakažuć anłajn-ekskursiju pa vystavie Łazara Chidekiela «Nas zrazumiejuć praz 100 hod». Paznajomicca z tvorčaściu adnaho z zasnavalnikaŭ abjadnańnia UNOVIS, vybitnaha mastaka-avanhardysta, pieršaha ŭ śviecie suprematyčnaha architektara, jaki na stahodździe apiaredziŭ čas, usie achvotnyja zmohuć biaspłatna ź luboj kropki śvietu. Eskursija prymierkavana da zakryćcia vystavy ŭ Nacyjanalnym mastackim muziei Biełarusi. Efir pačniecca a 19-j hadzinie.
Ekskursija pravodzicca ŭ ramkach prajekta #UNOVIS100, jaki realizujecca Centram biełaruska-jaŭrejskaj spadčyny, Muziejem historyi Viciebskaha narodnaha mastackaha vučylišča i kampanijaj A1 pad patranatam Nacyjanalnaj kamisii pa spravach UNESCO ŭ Biełarusi. Pieršaja ŭ našaj krainie piersanalnaja vystava Łazara Chidekiela «Nas zrazumiejuć praz 100 hod» była adkrytaja ŭ dzień stahodździa tvorčaha abjadnańnia UNOVIS, stvoranaha pa inicyjatyvie Kazimira Maleviča ŭ Viciebsku.
Mienavita ŭ Viciebsku naradziŭsia Łazar Chidekiel, vučyŭsia ŭ Viciebskim narodnym mastackim vučyliščy ŭ Marka Šahała, Mścisłava Dabužynskaha, Łazara Lisickaha, a zatym i ŭ Maleviča. Užo ŭ 16 hadoŭ jon uznačaliŭ architekturnuju majsterniu vučylišča i mienavita architektury pryśviaciŭ svajo žyćcio.
Anłajn-ekskursiju praviadzie Kaciaryna Izafatava — adna z kurataraŭ vystavy, zahadčyca adździeła sučasnaha biełaruskaha mastactva Nacyjanalnaha mastackaha muzieja, kandydat mastactvaznaŭstva. Jana raspaviadzie, u čym značnaść tvorčaści Łazara Chidekiela, čamu jon apiaredziŭ svoj čas i što takoje suprematyčnaja architektura.
Śpiecyjalna dla vystavy ŭ Minsku ź Ńju-Jorka byli dastaŭlenyja kala 100 aryhinalnych rabot z asabistaha archiva siamji Łazara Chidekiela: rannija suprematyčnyja kampazicyi, eskizy kaśmičnych pasialeńniaŭ, płany «Horada-sada», «Aerahorada», «Akvahorada», pieršy architekturny ekałahičny manifiest «AERA», a taksama dakumienty UNOVISa. Anłajn-ekskursija dazvolić paznajomicca z tvorčaściu Łazara Chidekiela ŭsim, chto nie paśpieŭ naviedać ekspazicyju ŭ muziei.
Ekskursija 15 krasavika budzie dastupna z 19:00 u mabilnym dadatku Voka ci na sajcie voka.tv ź luboj pryłady i ŭ sietcy luboha apieratara Biełarusi dy inšych krain śvietu biez aŭtaryzacyi. U ramkach prajekta #UNOVIS100 da kanca hoda na siervisie taksama budzie dastupny biaspłatny prahlad dakumientalnaha filma Jaŭhiena Siaćko «UNOVIS», pryśviečanaha historyi abjadnańnia.
Kamientary