Ad karanavirusa pamior 39-hadovy vykładčyk Vajskovaj akademii. U siamji zastałosia troje dziaciej
Padpałkoŭniku ź Minska Alaksieju Smarodzinu było 39 hod. Jon vykładaŭ na kafiedry tyłavoha zabieśpiačeńnia Vajskovaj akademii. Mužčyna pamior ad karanavirusa ŭ paniadziełak, 22 červienia, paśla dvuch miesiacaŭ znachodžańnia ŭ balnicy.
U vajennyja Alaksiej pajšoŭ pa śladach baćki. Skončyŭ Vajskovuju akademiju. Byŭ kamandziram aeradromnaj ekspłuatacyjnaj roty ŭ avijabazie «Mačuliščy», paśla — kiraŭnikom pieršaha adździeła zachoŭvańnia ŭzbrajeńnia, vajennaj i śpiecyjalnaj techniki. Vykładać u Akademii jon staŭ z 2018-ha.
Z žonkaj Taćcianaj jany byli razam 20 hod. Ciapier jana zastałasia adna z tryma dziećmi: małodšaj dziaŭčyncy siem hod, siaredniamu synu — 9, starejšaj dačce — 17.
U balnicu Alaksiej trapiŭ jašče 25 krasavika. Spačatku byŭ u vajennym špitali, paśla jaho pieraviali ŭ Minski NPC chirurhii, transpłantałohii i hiematałohii.
«Zarazicca moh paŭsiul… Analizy na karanavirus uziali 25 krasavika, 2 maja zrabili pieralivańnie płazmy z antyciełami, kab vyratavać, choć vynik testu jašče byŭ nieviadomy. 5 maja pryjšoŭ stanoŭčy vynik. Uvieś hety čas muž byŭ u reanimacyi i ŭ kisłarodnaj mascy», — uspaminaje Taćciana.
Apošni raz jana čuła hołas Alaksieja 14 maja.
«Jon koratka paviedamiŭ, što jaho padklučajuć da ŠVŁ i jon usich lubić, usio budzie dobra», — uspaminaje tuju razmovu žonka. Jana tolki niadaŭna viarnułasia z pachavańnia.
Niahledziačy ni na što, Taćciana ŭdziačnaja miedykam, jakija zmahalisia za žyćcio muža:
«Asabliva daktary NPC na Siamaški. Jany rabili ŭsio mahčymaje i niemahčymaje. Ale nie atrymałasia…»
Na sustrečy Snapkova ź biznesam adzin z zaprošanych zaklikaŭ źniać videazvarot «Nado!» Jak adreahavali astatnija?10
Kamientary