Łukašenka i Juščanka sustrakalisia ŭ sieradu ŭ Homieli.
U treciaj dekadzie maja premjer-ministr Biełarusi Siarhiej Sidorski naviedaje Kijeŭ.
Pra heta damovilisia Alaksandr Łukašenka i Viktar Juščanka na pieramovach u Homieli 6 maja.
"My damovilisia ab tym, što ŭ mai budzie ažyćcioŭleny vizit biełaruskaha premjer-ministra va Ukrainu, dzie ŭsie napracoŭki, jakija sioleta byli abmierkavanyja na prezidenckim uzroŭni i raniej padrychtavanyja ministerstvami zamiežnych spraŭ, ministerstvami enierhietyki, — adpaviedna hetyja dakumienty na ŭradavym uzroŭni buduć padpisany ŭ chutkim časie", — zajaviŭ prezident Ukrainy (stenahrama apublikavana na sajcie ŭkrainskaha prezidenta).
Pradmietam pieramoŭ u Homieli, pavodle słoŭ V.Juščanki, byli pytańni dvuchbakovych adnosinaŭ, rehijanalnaj palityki, adnosinaŭ u miežach Uschodniaha partniorstva.Ukrainski bok asabliva cikaviła supracoŭnictva ŭ enierhietyčnaj śfiery, uklučajučy tranzit i prysutnaść na biełaruskim enierhietyčnym rynku.
"My šmat času nadali TEA (technika-ekanamičnamu abhruntavańniu. — BiełaPAN.) pastavak kaśpijskaj nafty ŭ krainy ES, u Biełaruś, va Ukrainu. Inšymi słovami, ubačyć novyja mahčymaści i nie stracić šanc, kab Ukraina, Biełaruś, našy partniory vykarystali hetuju mahčymaść dla ŭzajemnaha raźvićcia ekanomik krain, našych narodaŭ", — zajaviŭ V.Juščanka.
Pavodle jaho słoŭ, Ukraina i Biełaruś źjaŭlajucca prychilnikami libieralizacyi handlovych adnosinaŭ, vizavaha režymu. "U nas niama razychodžańniaŭ pa hetym pytańni ź biełaruskim bokam. Tamu kali my ŭ najbližejšym časie zavieršym pracu, pačynajučy ad pahadnieńnia ab vizavym režymie, readmisii, zakančvajučy pytańniami asabliva śfiery enierhietyki, — my zavieršym praktyčna našy damoŭlenaści", — zaznačyŭ ukrainski prezident.
"My damovilisia ab tym, što abaviazkova našy premjery pavinny sustrecca ŭ treciaj dekadzie hetaha miesiaca, a napiaredadni mižuradavaja kamisija razhledzić usie pytańni, jakija tut spadar prezident pieraličyŭ, i premjery pavinny prajści svoj šlach. Jany pavinny pierš za ŭsio pryniać rašeńni pa ekanamičnych i navat humanitarnych prablemach", — zajaviŭ A.Łukašenka.
Jon vykazaŭ udziačnaść V.Juščanku za padtrymku ŭdziełu Biełarusi va Uschodnim partniorstvie."My biarem udzieł u jeŭrapiejskich spravach i inšych nie suprać kahości. Heta naš intares, žyćciova važnyja intaresy, vyhadnyja dla našych narodaŭ i pierš za ŭsio dla našych ekanomik. My z hetaha budziem zychodzić i zaŭtra ŭ Prazie, kali budziem vieści dyjałoh na jeŭrapiejskim uzroŭni", — zajaviŭ A.Łukašenka.
Pavodle słoŭ V.Juščanki, inicyjatyva "Uschodniaje partniorstva" moža zakranać "mnohija baki, u tym liku našaha ekanamičnaha žyćcia". Razmova idzie ab raźvićci prajektaŭ, jakija mahli b atrymać finansavańnie ź biudžetu Jeŭrasajuza, zaznačyŭ prezident Ukrainy.
Ustanoŭčaja kanfierencyja Uschodniaha partniorstva, jakaja projdzie ŭ Prazie 7 maja, daść mahčymaść "vyjści na piać kankretnych kirunkaŭ adpaviednych prajektaŭ, i z hetych kirunkaŭ možna budzie budavać naša dvuchbakovaje supracoŭnictva", skazaŭ V.Juščanka.
Minułym razam prezidenty dźviuch krain sustrakalisia 20 studzienia ŭ Čarnihavie. Jany damovilisia ab sustrečy premjer-ministraŭ na praciahu najbližejšych dziesiaci dzion, adnak Siarhiej Sidorski i Julija Cimašenka nie sustrelisia dahetul.
Ciapier čytajuć
«Retranślatary vyklučyć, źniać i pakazać nam, što jany źniatyja». Zialenski patłumačyŭ, čamu pastaviŭ ultymatum i što maje zrabić Minsk45
Kamientary