Amnesty International pryznała fihurantaŭ «spravy 14‑ci» viaźniami sumleńnia

Mižnarodnaja pravaabarončaja arhanizacyja Amnesty International pryznała ŭdzielnikaŭ «pracesu 14‑ci» viaźniami sumleńnia. Pra heta havorycca ŭ aficyjnym liście, jaki mižnarodnaja arhanizacyja nakiravała na imia hienieralnaha prakurora Biełarusi R. Vasileviča.

Pradstaŭnik Amnesty International Nikala Dakvars (Nicola Duckworth), dyrektar pa spravach rehijonaŭ Jeŭropy i Centralnaj Azii, u svaim zvarocie da hienprakurora Biełarusi ŭ pryvatnaści adznačyŭ:

«Ja pišu vam z nahody spravy 11 maładych ludziej, jakija byli padvierhnutyja abmiežavańniu voli za ŭdzieł u akcyi pratestu 10 studzienia 2008 hodu ŭ Miensku.

Amnesty International upeŭnienaja, što jany byli padvierhnutyja pakarańniu za mirnaje ažyćciaŭleńnie svajho prava na svabodu mirnych schodaŭ i svabodu vykazvańnia mierkavańniaŭ.

U svaim paviedamleńni Amnesty International nazyvaje 11 fihurantaŭ «spravy 14‑ci» — Arcioma Dubskaha, Michasia Paškieviča, Taćcianu Ciškievič, Paŭła Vinahradava, Alaksieja Bondara, Michasia Kryvava, Alesia Stralcova, Alesia Čarnyšova, Michasia Subača, Maksima Dašuka, Alaksandra Barazienku. Viaźniami sumleńnia arhanizacyja pryznała tych, chto na dadzieny momant adbyvaje pakarańnie ŭ vyhladzie abmiežavańnia voli. Zaraz jany faktyčna znachodziacca pad chatnim aryštam, pad vielmi pilnym nazirańniem, i pry samym drobnym parušeńni ŭ luby momant mohuć apynucca za kratami.

Nahadajem, što jašče dva fihuranty hetaj kryminalnaj spravy Antoś Kojpiš i Uładzimir Siarhiejeŭ byli pakaranyja štrafami.

Nikala Dakvars u svaim zvarocie da hienprakurora Vasileviča zaklikaje vyzvalić pieraličanych fihurantaŭ «spravy 14‑ci» ad pakarańnia, a taksama pravieści rasśledavańnie nakont źbićcia Alaksandra Barazienki aficeram milicyi, što adbyłosia 23 sakavika.

U suviazi z hetym faktam, Amnesty International patrabuje ad hienprakurora kantralavać dziejańni supracoŭnikaŭ milicyi, jakija niasuć adkaznaść za kantrol adpaviednaści umovaŭ abmiežavańnia voli, i harantavać, što da pieraličanych arhanizacyjaj 11 čałaviek buduć stavicca spraviadliva i biesstarońnie.

«Sprava 14‑ci» — kryminalnaja sprava pa art. 342 KK Respubliki Biełaruś u dačynieńni da ŭdzielnikaŭ mirnaj akcyi pratestu pradprymalnikaŭ, jakaja adbyłasia ŭ Miensku 10 studzienia 2008 hodu.

Amnesty International — heta suśvietny ruch, jaki abjadnoŭvaje 2,2 miljony čałaviek z bolš čym 150 krainaŭ i terytoryj, jakija damahajucca spynieńnia hrubych parušeńniaŭ pravoŭ čałavieka.

• 0
• 0
• 0
• 0
• 0
• 0
• 0
• 0