«Heta byŭ emacyjny ŭsplosk». Minčuka sudziać za abrazu eks-namieśnika ministra ŭnutranych spraŭ Barsukova

Sud Maskoŭskaha rajona raźbiraje kryminalnuju spravu ab publičnaj abrazie pradstaŭnika ŭłady ŭ suviazi z vykanańniem im słužbovych abaviazkaŭ. Abvinavačany — 25-hadovy pradaviec-kansultant Ivan Artus, paciarpieły — Alaksandr Barsukoŭ, były namieśnik ministra ŭnutranych spraŭ, a ciapier pamočnik Alaksandra Łukašenki pa Minsku, piša Tut.by.

Pavialičyć

Sprava zaviedzienaja pa artykule 369 KK RB (Abraza pradstaŭnika ŭłady). Ivan Artus na praces pryjšoŭ sam — małady čałaviek nie pad vartaj. Alaksandr Barsukoŭ na sud nie pryjechaŭ.

Da taho, jak prakuror začytaŭ abvinavačvańnie, Ivan paprasiŭ dałučyć da spravy jaho chadajnictva. U im jon rastłumačyŭ, što letam u adnym z «destruktyŭnych telehram-kanałaŭ» chtości z karystalnikaŭ apublikavaŭ fota jahonaj žonki, jakaja pracuje ŭ adździele infarmacyi i hramadskich suviaziaŭ HUUS Minharvykankama. Ludzi stali vyśviatlać jaje asabistyja źviestki. Kab adsočvać situacyju, Ivan taksama zarehistravaŭsia ŭ hetym čacie. Tut ža paźniej jon i skłaŭ kamientar, z-za jakoha akazaŭsia ŭ sudzie.

U pratakole napisana, što 14 žniŭnia ŭ adnym z čataŭ u telehram Ivan «naŭmysna padrychtavaŭ i apublikavaŭ» kamientar, u jakim u nieprystojnaj, hrubaj formie vykazaŭsia na adras Alaksandra Barsukova.

Pa słovach maładoha čałavieka, u čacie było kala 3000 čałaviek. U niejki momant adzin z udzielnikaŭ zapościŭ videa z Alaksandram Barsukovym. Na zapisie namieśnik ministra ŭnutranych spraŭ vychodziŭ ź CIP na Akreścina. Chtości la ŭvachodu spytaŭ u jaho pra «ździeki na Akreścina». Barsukoŭ adkazaŭ: ździekaŭ tut nie było.

Da taho momantu, raspavioŭ abvinavačany, jon užo bačyŭ fota źbitych ludziej. U vyniku, «pad uździejańniem emocyj napisaŭ kamientar», — rastłumačyŭ svaje dziejańni Ivan.

Praz try tydni, praciahnuŭ abvinavačany, uśviadomiŭšy, što zrabiŭ niešta nie tak, svoj zapis jon vydaliŭ. Zdaryłasia heta, adznačyŭ Ivan u chadajnictvie, da taho, jak jon daviedaŭsia, što praz kamientar raspačataja pravierka.

— Nijakaj mety [pry napisańni] nie pieraśledvaŭ, — paviedamiŭ abvinavačany, dadaŭšy, što ŭ toj momant adčuvaŭ «emocyi da ŭsioj situacyi».

— Čamu nie vydalili [kamientaryi] raniej, — udakładniła sudździa.

— Prosta napisaŭ i zabyŭsia.

Raniej padčas dopytu, praciahnuła sudździa, małady čałaviek paviedamlaŭ, što chacieŭ vykazać niazhodu sa skazanym Barsukovym, pakolki ličyŭ, što heta niapraŭda. Tady Ivan nie admaŭlaŭ, što razumieŭ: Barsukoŭ źjaŭlajecca namieśnikam ministra ŭnutranych spraŭ i vykonvaje peŭnyja abaviazki. Z hetymi pakazańniami Ivan zhodny i ciapier, vinu jon pryznaje i raskajvajecca.

U sudzie taksama abviaścili piśmovyja pakazańni Alaksandra Barsukova. U ich paciarpieły pakazaŭ, što z 13 na 14 žniŭnia 2020 hoda byŭ u CIP na Akreścina i mieŭ razmovu z zatrymanymi. Zatym u šerahu ŚMI źjaviŭsia jahony kamientar z nahody znachodžańnia ŭ CIP ludziej, jakija byli zatrymanyja na niesankcyjanavanych masavych mierapryjemstvach, i dziejańniaŭ supracoŭnikaŭ pravaachoŭnych orhanaŭ.

U kastryčniku Alaksandru Barsukovu pradstavili skrynšoty z čata. Tam pad videa z paciarpiełym — kamientar Ivana.

— Kamientar vidavočna abraźlivaha charaktaru, jaki źmiaščaje nieprystojna vyraz na moj adras, — začytała sudździa.

Što mienavita napisaŭ Ivan pad videa, u sudzie nie ahučvałasia. Padčas sprečak prakuror rastłumačyŭ, pavodle zaklučeńnia linhvistyčnaj ekśpiertyzy, zapis «maje nienarmatyŭnuju formu vyražeńnia niehatyŭnaj acenki da Barsukova». Na dumku samoha paciarpiełaha, tekst hetaha paviedamleńnia abražaje jaho jak asobu, słužbovuju asobu i pradstaŭnika ŭłady, a taksama prynižaje jaho honar i hodnaść i padryvaje aŭtarytet i prafiesijnyja jakaści.

— Nastojvaju na pryciahnieńni Artusa da kryminalnaj adkaznaści, — začytaŭ słovy Alaksandra Barsukova sudździa.

U chadajnictvie, jakoje Ivan Artus pieradaŭ sudu, jon paviedamiŭ, što dapamahaŭ śledstvu, i rastłumačyŭ: «Ja nie pieraśledvaŭ mety prynižeńnia honaru i hodnaści Alaksandra Barsukova. Heta byŭ emacyjny ŭsplosk».

— Maja žonka pracuje ŭ adździele infarmacyi i hramadskich suviaziaŭ HUUS Minharvykankama. Jana adkazny i inicyjatyŭny rabotnik, — skazaŭ Ivan. Žonka, praciahnuŭ jon, płanuje atrymać aficerskaje zvańnie. Adnak, kali ŭ muža budzie sudzimaść, to šlach da atestacyi na aficerskuju pasadu dla jaje budzie zakryty.

Padčas sprečak pradstaŭnik abvinavačvańnia skazaŭ, što vina maładoha čałavieka dakazanaja, i paprasiŭ pryznačyć Ivanu dva hady abmiežavańnia voli biez nakiravańnia ŭ vypraŭlenčuju ŭstanovu adkrytaha typu.

— Ja pryznaju svaju vinu i raskajvajusia, — skazaŭ u apošnim słovie małady čałaviek. — Heta majo pieršaje złačynstva, i nadalej takoha nie paŭtorycca. Kali b mnie pradstaviłasia mahčymaść asabista paprasić prabačeńnia pierad Alaksandram Barsukovym, ja b abaviazkova heta zrabiŭ. Prašu nie sudzić mianie stroha. Ja małady, niadaŭna ažaniŭsia, u mianie siamja, ja chaču jaje budavać jak paŭnavartasnuju jačejku hramadstva.

• 0
• 0
• 0
• 0
• 0
• 0
• 0
• 0