«Hałoŭnaje nie zabyvać padzaradžać nie tolki telefon, ale i siabie samoha». Jak ukrainski vajskoviec žyvie z dvuma elektrastymulatarami. I što ŭ jaho z seksam?

Michaił Damaskin pryjšoŭ słužyć u 2019 hodzie, padpisaŭšy kantrakt z Desantna-šturmavymi vojskami Ukrainy. Jašče da pačatku poŭnamaštabnaj vajny jon staŭ adnym ź pieršych ukrainskich vajskoŭcaŭ, chto pačaŭ sistemna ŭkaraniać bieśpiłotnuju avijacyju ŭ armii. Jon prajšoŭ navučańnie ŭ Turcyi na apieratara Bayraktar i ŭdzielničaŭ u raźvićci novaha dla taho času kirunku raźviedki.

Mienavita praz hetuju dziejnaść jaho imia stała viadomym i pa toj bok frontu. Pavodle słoŭ Damaskina, jašče ŭ 2020 hodzie na rasijskich resursach jon fihuravaŭ jak «asabliva niebiaśpiečny» ŭkrainski vajskoviec.

Poŭnamaštabnaje ŭvarvańnie Rasii zastała jaho na Chiersonščynie. Pavodle słoŭ Damaskina, ciažkaje ranieńnie jon atrymaŭ padčas adnaho sa šturmaŭ, kali ŭkrainskaje padraździaleńnie paśla boju było vymušana adychodzić na novyja pazicyi. Michaił byŭ apošnim u kałonie.

Paśla čarhovaj čarhi z varožaj bajavoj mašyny jon pabieh, kab pieraadoleć adkryty ŭčastak miascovaści. U hety momant kula kalibru 12,7 mm trapiła ŭ braniapłaścinu jaho broniekamizelki. Braniu nie prabiła, adnak prylot byŭ pad takim vuhłom, što enierhija kuli pieradała mahutny impuls u chrybiet.

Tetraparez — dziŭny stan

U vyniku ŭdaru Michaił atrymaŭ ciažkuju traŭmu chrybta, jakaja pryviała da paškodžańnia śpinnoha mozhu ŭ šyjnym adździele. Paźniej niejrachirurh rastłumačyŭ jamu, što takija ranieńni mahčymyja navat biez pramoha prabićcia broni. Pavodle słoŭ Damaskina, kali b kula trapiła ŭ jaho niepasredna, šancaŭ vyžyć nie zastałosia b.

Jak zhadvaje Michaił, spačatku jon navat nie ŭśviedamlaŭ, nakolki ciažkim było ranieńnie. Niahledziačy na bol, jon samastojna sieŭ na tank, paśla pierasieŭ u aŭtamabil i svaimi nahami zajšoŭ u špital. Adnak užo praz karotki čas pačaŭ imkliva hublać adčuvalnaść u rukach i nahach. Padčas abśledavańnia jon jašče moh imi ruchać, ale ŭžo amal nie adčuvaŭ ich.

Na nastupny dzień daktary paviedamili, što ŭ vyniku paškodžańnia śpinnoha mozhu ŭ jaho raźviŭsia tetraparez (stan, kali słabiejuć abiedźvie ruki i nahi). Pavodle słoŭ Michaiła, levaja naha zachavała ruchomaść, ale amal straciła adčuvalnaść, a pravaja funkcyjanuje vielmi abmiežavana. U šyjnym adździele śpinny mozh atrymaŭ mocny ŭdar, a nižej paškodžańnie było nastolki ciažkim, što, pavodle acenki daktaroŭ, zachavałasia kala 10% niervovych vałoknaŭ.

Spačatku Damaskin uspryniaŭ dyjahnaz spakojna i navat dumaŭ, što praź niekalki tydniaŭ zmoža viarnucca na front. Adnak stan nie lepšaŭ: adčuvalnaść nie viartałasia, a nieŭzabavie jon užo nie moh ruchać bolšaj častkaj cieła.

Zamiest taho kab źmirycca z hetym, jon całkam zasiarodziŭsia na reabilitacyi. Michaił pravodziŭ doŭhija hadziny ŭ spartyŭnaj zale, umacoŭvajučy myšcy vierchniaj častki cieła. Nastupnym etapam stała reabilitacyja ŭ Łatvii, dzie vykarystoŭvalisia rabatyzavanyja kompleksy i ekzaškilety. Tam jaho vučyli kampiensavać adsutnaść adčuvańniaŭ z dapamohaj zroku i śviadomaha kantrolu kožnaha ruchu. Heta dazvoliła jamu značna lepš aryjentavacca va ŭłasnym ciele i adnavić častku ruchalnych funkcyj.

Adzin pracent na pośpiech

Paźniej ukrainskija niejrachirurhi prapanavali Michaiłu ekśpierymientalnuju mietodyku niejrastymulacyi, aceńvajučy šancy na pośpiech tolki prykładna na 1%.

Michaiłu spačatku biaspłatna ŭstalavali niejrastymulatar ukrainskaj raspracoŭki. Adnak jon prasłužyŭ niadoŭha, paśla čaho jaho zamianili na sistemu amierykanskaj vytvorčaści. Pavodle słoŭ Damaskina, dziaržava apłaciła samu apieracyju, ale nie niejrastymulatar, jaki kaštavaŭ prykładna 27 tysiač dalaraŭ. Dla hetaha jon vykarystaŭ ułasnyja źbieražeńni. Michaił raskazvaŭ, što jašče da vajny ŭkłaŭ hrošy ŭ IT-kampaniju, zasnavanuju jaho siabram, što dazvoliła atrymlivać pasiŭny dachod.

Pavodle jaho słoŭ, ukrainski niejrastymulatar nieabchodna było zaradžać prykładna kožnyja try hadziny. Paśla zamieny na amierykanskuju sistemu hety intervał pabolšaŭ da dvanaccaci hadzin.

Choć apieracyja dapamahła Michaiłu znoŭ stać na nohi, takaja mietodyka pakul nie stała standartam ukrainskaj miedycyny. Pavodle jaho słoŭ, sistema niejrastymulacyi ŭsio jašče znachodzicca na etapie vyprabavańniaŭ. Kab jaje pryznali efiektyŭnaj i pačali šyroka vykarystoŭvać, patrebna bolš paśpiachovych vypadkaŭ.

Michaił śćviardžaje, što jaho vynik staŭ unikalnym. Pavodle jaho słoŭ, da hetaha ni ŭ adnaho pacyjenta ŭ śviecie takaja sistema nie dała nastolki vyjaŭlenaha efiektu. Sam jon ličyć heta nie tolki zasłuhaj daktaroŭ i šmathadovaj reabilitacyi, ale i vialikaj udačaj.

Žyćcio na zaradcy patrabuje datrymańnia ałharytmaŭ

Michaił kaža, što paśla impłantacyi niejrastymulatara daktary nie davali jamu padrabiaznych tłumačeńniaŭ pra toje, jak sistema moža reahavać na roznyja elektronnyja pryłady. Razam z tym jon viedaje pra niekalki važnych abmiežavańniaŭ. Nielha prachodzić mahnitna-rezanansnuju tamahrafiju na MRT-aparatach z mahnitnym polem 3 tesły, bo heta moža paškodzić impłantavanuju sistemu. Daśledavańnie na aparacie z mahnitnym polem 1,5 tesły, jak jon śćviardžaje, dapuščalnaje.

Što da inšych mahčymych ryzyk, to Michaił pryznajecca, što nie viedaje ŭsich adkazaŭ. Naprykład, jon nie ŭpeŭnieny, jak u vypadku nieabchodnaści reanimacyi vykarystańnie defibrylatara moža paŭpłyvać na pracu niejrastymulatara.

Pra žyćcio ź niejrastymulataram Michaił havoryć z humaram. Žartuje, što ŭ jaho ŭžo sfarmavałasia sapraŭdnaja «čarha na zaradku»: treba svoječasova padzaradzić telefon, noŭtbuk, hadzińnik, paŭerbank, pult ad niejrastymulatara i siabie samoha.

Paśla poŭnaha hajeńnia paślaapieracyjnych rubcoŭ jon navat płanuje zrabić tatuiroŭki kala miescaŭ padklučeńnia datčykaŭ — z adnaho boku namalavać znak «220 V», a z druhoha — «USB Type-C».

Impłant, pa słovach Michaiła, nie viarnuŭ jamu stračanaj adčuvalnaści, ale dazvoliŭ padtrymlivać myšcy ŭ pastajannym tonusie.

Navat levaja naha, jakaja zachavała ruchomaść paśla ranieńnia, ciapier pracuje inakš. Sam Michaił tłumačyć, što raniej moh ruchać joju tolki miechanična, pastajanna kantralujučy kožny krok vačyma, bo nie adčuvaŭ, jak stupnia dakranajecca da ziamli. Paśla apieracyi myšcy stali macniejšymi, adnak nieabchodnaść pastajannaha vizualnaha kantrolu zastałasia. Jon pa-raniejšamu nie adčuvaje pavierchniu pad nahami, tamu kožny krok patrabuje kancentracyi.

Nie dumajcie, što dobra, kali zusim nie adčuvaješ bolu

Damaskin raskazvaje, što paśla atrymanaha ranieńnia praktyčna nie adčuvaje tempieratury i bolu. Jon nie moža zrazumieć, ci haračy pradmiet, tamu časam traplaje ŭ niebiaśpiečnyja situacyi.

Jašče padčas lačeńnia jon pa vosiem-dziesiać hadzin zapar hulaŭ na noŭtbuku, nie zaŭvažajučy, jak mocna nahravajecca korpus. U vyniku atrymaŭ surjozny apiok na nazie, šnar ad jakoha paźniej daviałosia zakryć tatuiroŭkaj.

Kab paźbiehnuć takich vypadkaŭ, Michaił vypracavaŭ ułasnyja praviły biaśpieki. Kali jość sumnieńni, prosić inšych ludziej pieršymi pravieryć tempieraturu pradmieta abo vady. Pierad tym jak zajści ŭ duš, spačatku padstaŭlaje pad strumień hałavu, bo tam adčuvalnaść zachavałasia. Mienavita tak jon razumieje, ci nie zanadta haračaja vada.

Sam Michaił žartuje, što pastupova stanovicca «čałaviekam z kibierpanku». Paśla ciažkaha ranieńnia i niekalkich apieracyj jon užo nie ŭsprymaje svajo cieła tak, jak raniej.

Mužčyna nie tolki nie adčuvaje bolu, ale i zvyčajnaj čałaviečaj stomy. Jon pryznajecca, što jašče da ranieńnia amal nie dazvalaŭ sabie adpačynku, a ciapier heta adčuvańnie źnikła amal całkam.

Adnak takaja asablivaść maje i advarotny bok. Čałaviek, jaki nie adčuvaje bolu, nie zaŭsiody razumieje, kali arhanizm užo pracuje na miažy svaich mahčymaściaŭ.

Pra heta jamu nahadała surjoznaja traŭma kalena. Padčas adnaho z ruchaŭ jon niaŭdała paviarnuŭsia, i źviazki nie vytrymali nahruzki. U vyniku byli razarvanyja try z čatyroch asnoŭnych źviazak kalena. Bolu jon amal nie adčuŭ. Prosta ŭ niejki momant zrazumieŭ, što bolš nie moža abapiercisia na nahu.

Pra toje, što zarad zakančvajecca, jon razumieje nie pa indykatarach, a pa stanie ŭłasnaha cieła. Pavodle jaho słoŭ, nohi stanoviacca słabiejšymi, myšcy ŭžo nie trymajuć nahruzku tak, jak musili b.

Adnojčy heta pryviało da surjoznaj traŭmy. Paśla intensiŭnaj treniroŭki jon pajšoŭ u kramu, raźličvajučy, što zaradu jašče chopić. Adnak myšcy rassłabilisia raniej, čym jon čakaŭ. Prosta na ściežcy jon upaŭ i złamaŭ nahu ŭ troch miescach.

Sam Michaił spačatku navat nie padumaŭ, što heta pierałom. Z-za adsutnaści bolu jon vyrašyŭ, što, musić, paškodziŭ źviazki. Ležačy prosta na vulicy, jon dastaŭ zaradnuju pryładu, padklučyŭ niejrastymulatar na niekalki chvilin, kab chapiła sił dajści dadomu, paśla čaho ŭžo pajechaŭ u traŭmatałahičnaje adździaleńnie. Tam renthien pakazaŭ pierałom małabiercavaj kostki ŭ troch miescach. Pavodle jaho słoŭ, jamu jašče paščaściła, bo asnoŭnaja nahruzka pry chadzie prypadaje na vialikabiercavuju kostku.

Druhi niejrastymulatar — dla pozyvaŭ u tualet

Damaskin raskazvaje, što paśla paškodžańnia śpinnoha mozhu straciŭ zdolnaść adčuvać naturalnyja pozyvy da mačavypuskańnia i aparažnieńnia kišečnika. Tamu jon pahadziŭsia na jašče adnu apieracyju, padčas jakoj jamu ŭstalavali druhi niejrastymulatar, jaki dapamahaje kantralavać funkcyi orhanaŭ małoha taza.

Jon raskazvaje, što ciapier uvažliva sočyć za svaim charčavańniem i vypracavaŭ strohi rasparadak dnia. Nieabchodnaść naviedać tualet jon vyznačaje nie pa adčuvańniach, a pa ŭskosnych prykmietach i z dapamohaj samakantrolu. Pavodle jaho słoŭ, takaja sistema dazvalaje jamu vieści samastojnaje žyćcio biez surjoznych bytavych ciažkaściej.

Michaił taksama adkryta havoryć pra toje, jak traŭma paŭpłyvała na jaho intymnaje žyćcio. Pavodle jaho słoŭ, erekcyja zachavałasia, adnak jon amal całkam straciŭ fizičnuju adčuvalnaść. Damaskin pryznajecca, što ciapier usprymaje blizkaść najpierš praz emocyi, zrok i dušeŭnuju suviaź z partniorkaj.

Niejrastymulatar, jaki dapamahaje jamu chadzić, taksama patrabuje pastajannaha kantrolu. Michaił raskazvaje, što apošnim časam sistema pačała pracavać niestabilna: časam nohi mohuć niečakana słabieć, a praces stymulacyi zamiest zvyčajnych tryccaci chvilin raściahvajecca na niekalki hadzin i supravadžajecca mocnym dyskamfortam u vobłaści pazvanočnika.

Daktary miarkujuć, što niekatoryja elemienty mahli paškodzicca, bo paśla apieracyi jon nie tolki chodzić, ale i biehaje, zajmajecca siłavymi treniroŭkami, sportam i rychtujecca viarnucca na vajskovuju słužbu.

U suviazi z hetym jamu, mabyć, spatrebicca jašče adna apieracyja, padčas jakoj miedyki vyznačać, ci patrebnaja zamiena sistemy. Pavodle acenki Michaiła, košt novaha niejrastymulatara razam ź nieabchodnymi kampanientami dla śpiny i kalena moža skłaści kala 11 tysiač dalaraŭ.

Vajna navučyła žyć siońniašnim dniom

Razvažajučy pra budučyniu, Michaił pryznajecca, što vajna navučyła jaho žyć siońniašnim dniom. Pavodle jaho słoŭ, minułaha ŭžo nielha źmianić, a budučynia nie harantavanaja, tamu hałoŭnaje — canić toj momant, jaki jość ciapier.

Jon nie buduje dalokich płanaŭ, ale ŭsio ž maje niekalki prostych maraŭ. Choča dačakacca dnia, kali zmoža advieści svaju małodšuju dačku ŭ dziciačy sadok, paśla — u škołu, a kali jana skončyć vučobu — stancavać ź joj na vypusknym.

Hałoŭnaj ža metaj dla siabie Damaskin nazyvaje viartańnie na vajskovuju słužbu. Pavodle jaho słoŭ, jon choča znoŭ słužyć, kab jaho dzieci mahli žyć u biaśpiečnaj i niezaležnaj Ukrainie.

• 3
• 0
• 0
• 0
• 0
• 2
• 0
• 2