Miarkujecca, što jany buduć uviedzienyja ź lipienia. Raniej nazyvałasia data 30 krasavika.
Pa słovach ministra ŭnutranych spraŭ Ivana Kubrakova, raniej ahučany termin vydačy dakumientaŭ — 30 krasavika — pieranosicca na bolš poźni termin, z ulikam pastaŭlenych na naradzie Alaksandram Łukašenkam zadač, paviedamlaje «Interfaks».
Ministr unutranych spraŭ Ivan Kubrakoŭ paviedamiŭ paśla narady, što padnačalenaje jamu viedamstva hatova da vydačy novaha vidu dakumientaŭ.
«Źviartałasia ŭvaha na zručnaść dla nasielnictva pry atrymańni, vykarystańni bijamietryčnych dakumientaŭ, — dadaŭ Ivan Kubrakoŭ. — My dałažyli kiraŭniku krainy pra achovu piersanalnych danych, i jon pahadziŭsia z tym, što siońnia technična pryvatnyja źviestki abaronieny», piša «Źviazda».
Ministr suviazi i infarmatyzacyi Biełarusi Kanstancin Šulhan paviedamiŭ, što techničnaja sistema dla ŭviadzieńnia bijamietryčnych dakumientaŭ u vysokaj stupieni hatoŭnaści, ale pytańnie, na jakim zasiarodzili ŭvahu na naradzie, — zručnaść navacyj dla nasielnictva.
«Kali vy nie zachočacie pierachodzić na novyja dakumienty, vy pavinny mieć mahčymaść sa zvyčajnym pašpartam atrymlivać toje, što praduhledžana [ID-kartkaj]», — skazaŭ ministr.
Nakont terminaŭ vydačy Kanstancin Šulhan adznačyŭ: usie viedamstvy zacikaŭleny skončyć pracu ŭ samy karotki čas, i prapanujecca varyjant zapusku sistemy ź lipienia. Ministr dadaŭ, što starym pašpartam možna budzie karystacca da skančeńnia termina jaho dziejańnia.
«Naprykład, vaš stary pašpart patrabuje zamieny. Vy prychodzicie, atrymlivajecie ID-kartu jak unutrany pašpart, a kali płanujecie vyjezd za miažu, plus da ID-kartki atrymlivajecie jašče i bijamietryčny pašpart», — tłumačyć Kanstancin Šulhan.
Pa jaho słovach, prapracoŭvajecca sistema vydačy novych pašpartoŭ ź bijamietryčnym čypam dla vyjezdaŭ za miažu, ale kab novy pašpart byŭ pry hetym jurydyčna značny i ŭnutry krainy.
«Kab heta praduhledzić, treba viarnucca da pytańnia technałahičnaha. Tamu što zadumka była — u pieršuju čarhu atrymlivać ID-kartu, a da jaje bijamietryčny pašpart. A kali hramadzianin choča atrymać tolki «knižačku» (bijamietryčny pašpart dla vyjezdu) treba razhledzić technałohiju vydačy. Ale abjadnańnia dakładna nie budzie», — kanstatavaŭ ministr.
Ciapier čytajuć
Vaziŭ nataŭcaŭ u Afhanistan i skidvaŭ humanitarku ŭ Sudanie, a potym trapiŭ u turmu pa danosie siabra z Ukrainy2
Kamientary