Aryšt rasijskich špijonaŭ u Bałharyi: siarod ich zadač byŭ zbor infarmacyi na biełaruskuju tematyku
Na minułym tydni ŭłady Bałharyi paviedamili, što im udałosia rassakrecić rasijskuju špijonskuju hrupoŭku.
Bałharski ŭrad abnarodavaŭ videazdymku, dzie adzin z čynoŭnikaŭ Ministerstva abarony Bałharyi fatahrafuje ŭ svaim pracoŭnym kampjutary sakretnyja vajskovyja dakumienty ź infarmacyjaj pra źniščalniki F-16. Hetyja fotazdymki čynoŭnik źbiraŭsia pieradać kiraŭniku rasijskaj špijonskaj hrupoŭki.
Prakuratury ŭdałosia pierachapić razmovu mierkavanaha kaardynatara špijonskaj hrupoŭki i bałharskaha čynoŭnika: «Minuły raz vy pieradali až čatyry padborki. Ja bačyŭ, što na fłešcy. Karysny materyjał».
Prakuratura aryštavała piać mužčyn i adnu žančynu, jakich abvinavačvajuć u špijanažy na karyść Rasii. Adznačajecca, što heta najvialikšaje vykryćcio špijonaŭ u Bałharyi z časoŭ chałodnaj vajny.
Rasija karystajecca svaimi daŭnimi suviaziami ź niekatorymi členami NATA i ES, kab stvarać u hetych krainach špijonskija sietki i atrymlivać sakretnuju infarmacyju. Byłaja kamunistyčnaja Bałharyja kaliści była nadziejnym sajuźnikam SSSR, adnak u 2004 hodzie ŭstupiła ŭ NATA, a ŭ 2007 — u ES. Ale dziakujučy ekanamičnym suviaziam i adnosinam bałharskich palitykaŭ, biznesmienaŭ i kiraŭnikoŭ śpiecsłužbaŭ z Maskvoj, Rasija da hetaha času maje ŭpłyŭ na ŭnutranyja spravy i raźviedvalnyja słužby bałkanskaj dziaržavy, piša The Wall Street Journal.
Apublikavanyja prakuraturaj materyjały pakazvajuć, što ŭ epochu raźvitaha kibieršpijanažu Maskva pa-raniejšamu vykarystoŭvaje ahienturu.
«Rasija pa-majstersku vykarystoŭvaje byłyja sietki śpiecsłužbaŭ, jakija dziejničajuć navat praz tryccać hadoŭ paśla padzieńnia kamunistyčnaha režymu», — adznačaje Marcin Uładzimiraŭ (Martin Vladimirov), staršy analityk Safijskaha analityčnaha centra pa vyvučeńni demakratyi.
Sudova-miedycynskija dokazy, siarod jakich aŭdyjazapisy, videazdymka i dakumienty, detalova pakazvajuć rasijskuju špijonskuju dziejnaść. Na adnym videa padazravany ŭ špijanažy ličyć za pracoŭnym stałom zapłačanyja jamu dalary. U druhim videa padazravanyja sustrakajucca ŭviečary na tenisnym korcie dla pieradačy infarmacyi. U inšych materyjałach lidar hrupoŭki (bałharskija śledčyja nazyvajuć jaho «Rezident») daje instrukcyi, jak maskiravać špijonskaje abstalavańnie pad padarunak.
U špijanažy była taksama zadziejničanaja žonka kiraŭnika, jakaja maje dvajnoje bałharskaje i rasijskaje hramadzianstva. Jana była pasiarednicaj pamiž špijonskaj hrupoŭkaj i rasijskim pasolstvam. Na videa bačna, jak žančyna ŭvachodzić u rasijskaje pasolstva, a praz hadzinu pakidaje jaho. Jaje zadačaj było pieradavać atrymanuju infarmacyju i zabirać hrošy. Žančynu aryštavali jak saŭdzielnicu.
Safijski vajenny sud pastanaviŭ pakinuć pad aryštam piaciarych padazravanych. Šostaha adpuścili pad zakład paśla pryznańnia viny i supracoŭnictva z bałharskimi ŭładami. Taksama Bałharyja vysłała dvuch rasijskich dypłamataŭ u suviazi z hetaj spravaj.
MUS Rasii nazvała hetuju spravu «čarhovym abvastreńniem antyrasijskaj špijonamanii ŭ Bałharyi na fonie ŭzdymu rusafobii na Zachadzie i pierš za ŭsio ŭ ZŠA».
Imiony aryštavanych aficyjna nie razhałošvajucca. Advakat adnaho z abvinavačanych zajaŭlaje, što rašeńnie suda nieapraŭdanaje, tamu jon budzie padavać apielacyju.
«Prakuratura nie adznačaje, jakuju infarmacyju sabraŭ moj klijent i inšyja asoby dla pieradačy ŭ Rasiju. Tady paŭstaje pytańnie, ci źjaŭlajecca heta infarmacyja dziaržaŭnaj tajamnicaj», — adznačaje advakat.
Za apošnija hady Bałharyja vysłała niekalkich rasijskich dypłamataŭ za mierkavany špijanaž. Letaś Čechija i Słavakija abvinavacili rasijskich dypłamataŭ u niezakonnaj dziejnaści i taksama ich vysłali.
Bałharski ŭrad adznačaje, što členy špijonskaj hrupoŭki mieli dostup da sakretaŭ NATA, ES i Bałharyi, bo pracavali ŭ Ministerstvie abarony, vajennaj raźviedcy i parłamiencie. Usie jany zajmali vysokija pasty i mieli dostup da sakretnaj infarmacyi.
Prakuratura paviedamiła, što «Rezidentam» byŭ vysokapastaŭleny supracoŭnik vajskovaj raźviedki Bałharyi. Pa pohladach jon stalinist. U jaho za plačyma — vučoba ŭ škole rasijskaj vajennaj raźviedki ŭ Maskvie. «Rezident» raskazaŭ, što prapanoŭvaŭ inšym ahientam za ich pracu $1800 u miesiac.
Na adnym z aŭdyjazapisaŭ čuvać, jak «Rezident» kaža svaim ahientam: «Kali jość štości sakretnaje, fatahrafujcie. Cikaviać materyjały pra Rasiju, Blizki Uschod, Irak, łakalnyja kanflikty nakštałt Nahornaha Karabacha. Ukraina i Biełaruś taksama».
Prakurory pakul nie vyznačali, jak daŭno pačała dziejničać hrupoŭka. Miarkujučy pa aŭdyjazapisach, hałoŭnaj matyvacyjaj dla ahientaŭ byli hrošy. Płacili im pieravažna ŭ bałharskich levach, bo, jak tłumačyć «Rezident» na adnym z aŭdyjozapisaŭ, «abmien vami valuty moža pryciahnuć da vas uvahu».
Kamientary