Prakuratura horadu Miensku raspačała kryminalnuju spravu pa artykule 193‑1 KK Respubliki Biełaruś suprać pradstaŭnika relihijnaj arhanizacyi. 25‑hadovaha žychara stalicy Jaŭhiena Voŭkava abvinavačvajuć u dziejnaści ad imia niezarehistravanaha «Ruchu jadnańnia» (Carkva Muna).
Jak adznačaje pradstaŭnik PC «Viasna» Valancin Stefanovič, pravaabaroncy zaniepakojenyja viartańniem uładaŭ da praktyki vykarystańnia hetaha artykuła.
‑ Treba adznačyć, što z 2006 hodu, kali ŭstupiŭ u dziejańnie artykuł 193‑1, heta pieršaja kryminalnaja sprava suprać pradstaŭnikoŭ niezarehistravanych relihijnych arhanizacyjaŭ.
I, naturalna, my jak pravaabaroncy vykazvajem vielmi vialikuju zaniepakojenaść hetym. Ułady peŭny pieryjad nie vykarystoŭvali hety artykuł, byŭ taki niejki maratoryj na jaho vykarystańnie. Jak usie my pamiatajem, u minułym hodzie była pryciahnutaja da kryminalnaj adkaznaści Kaciaryna Sałaŭjova, aktyvistka Maładoha Frontu z Połacku. I paśla hetaha faktyčna kryminalny artykuł 193‑1 nie vykarystoŭvaŭsia. I voś zaraz pa im uzbudžanaja novaja sprava, — kaža Valancin Stefanovič.
Pravaabaroncy padkreślivajuć, što nastojvajuć na admienie artykuła 193‑1 KK Respubliki Biełaruś.
‑ U krainie raspačałasia kampanija za admienu hetaha artykuła, inicyjavanaja Asamblejaj NDA. I my ličym, što, pa‑pieršaje, heta haniebna — mieć taki artykuł u Kryminalnym kodeksie krainy. A pa‑druhoje, vyklikaje ździŭleńnie, što paśla zajavaŭ i Parłamienckaj Asamblei Rady Jeŭropy, i mižnarodnych pravaabarončych arhanizacyjaŭ, u jakich značycca patrabavańnie da ŭładaŭ krainy ab admienie hetaha artykuła, 193‑1 u Biełarusi pa‑raniejšamu vykarystoŭvajecca. My spadziajemsia, što našym uładam chopić rozumu nie davaodzić hetuju spravu da sudovaha raźbiralnictva, — adznačaje pravaabaronca.
Pavodle V. Stefanoviča, adnosna dadzienaj kryminalnaj spravy niama dokazaŭ taho, što dziejnaść Carkvy Muna ŭjaŭlaje niejkuju pahrozu.
Artykuł 193‑1 KK jakraz‑taki i nie patrabuje dakazvańnia škody ad dziejnaści jakoj‑niebudź arhanizacyi. Tut prosta farmalny skład złačynstva — «dziejnaść ad imia niezarehistravanaj arhanizacyi», niezaležna ad taho, čym hetaja arhanizacyja zajmajecca.
‑ Što datyčycca kankretna Carkvy Muna, nakolki mnie viadoma, pravodziłasia ekśpiertyza ŭ dadzienaj kryminalnaj spravie, jakaja nie ŭstanaviła taho, što dziejnaść hetaj arhanizacyi nosić charaktar raspalvańnia relihijnaj varožaści. I ja padazraju, što nriama nijakich aficyjnych dakumientaŭ, jakija b zabaraniali dziejnaść hetaj carkvy na terytoryi Biełarusi.
Ale dla nas tut važna mienavita vykarystańnie hetaha artykuła, pakolki jon nie patrabuje dakazvańnia niejkaj škody. I tak možna pradstaŭnika luboj arhanizacyi padvieści pad kryminalnuju adkaznaść, — padkreślivaje Stefanovič.
Da taho ž, pravaabaronca źviartaje ŭvahu, što śledčy ŭ kryminalnaj spravie suprać Jaŭhiena Voŭkava — asoba nievypadkovaja. Im pryznačany starejšy śledčy pa najvažniejšych spravach prakuratury Miensku małodšy savietnik justycyi Hrachoŭski S.V., jaki pieraśledavaŭ aktyvistaŭ Maładoha Frontu — Pałažanku, Korbana, Fiedaruka, Hareckaha i Janušeŭskaha.
29 červienia śledčy Hrachoŭski admoviŭ Iharu Valuku, jaki prachodzić śviedkam pa kryminalnaj spravie, u mahčymaści prysutnaści advakata ŭ dopycie. Pra heta paviedamiŭ advakat Pavieł Sapiełka, ź jakim u I.Valuka zaklučana adpaviednaje pahadnieńnie. Hetaja admova rasceńvajecca jak supraćdziejańnie akazańniu pravavoj dapamohi i z'ŭlajecca niedapuščalnaj. Dziejańni śledčaha hruba parušajuć artykuł 62 Kanstytucyi RB, jaki harantuje kožnamu hrmadzianinu «prava na jurydyčnuju dapamohu dla ažyćciaŭleńnia i abarony pravoŭ i svabodaŭ, u tym liku prava karystacca u luby momant dapamohaj advakataŭ u sudzie i inšych dziaržaŭnych orhanach».
Ciapier čytajuć
Marata Markava pierasunuli z pasady ministra infarmacyi ŭ ministry kultury30
Kamientary