Raspracoŭščyki «EpiVakKarony» zajaŭlajuć pra jaje vysokuju efiektyŭnaść suprać usich štamaŭ. Ekśpierty piarečać

Vakcynu «EpiVakKarona» raspracavaŭ rasijski dziaržaŭny navukovy centr virusałohii i bijatechnałohii «Viektar». U skład vakcyny ŭvachodziać try pieptydy, jakija kapijujuć častki spajkavaha białku karanavirusa. Pa zajavie navukoŭcaŭ, jakija raspracavali vakcynu, «EpiVakKarona» zabiaśpiečvaje vypracoŭku vuzkaśpiecyjalizavanych antycieł na śpiecyfičnyja antyhieny, što ŭtrymlivaje vakcyna.

Pieptydy — heta štučna sintezavanyja asobnyja frahmienty białku virusa. Jany raspaznajucca imunnaj sistemaj, u vyniku čaho na ich vypracoŭvajecca imunny adkaz arhanizma. Pieptydy złučanyja ź białkom-nośbitam i zamacavanyja na dapamožnym rečyvie.

Na pačatak 2021 hoda nie isnavała nivodnaj pieptydnaj vakcyny, jakaja b šyroka vykarystoŭvałasia ŭ miedycynskaj praktycy. Pa słovach doktara bijałahičnych navuk Kanstancina Čumakova, pieptydnyja vakcyny mahčymyja tolki ŭ teoryi i dziejničajuć tolki ŭ łabaratoryi ŭ prabircy, ale niama nivodnaj pieptydnaj vakcyny, jakaja pakazała b efiektyŭnaść na žyvych arhanizmach.

«EpiVakKaronaj» pačali pryščaplać da taho, jak skončyłasia druhaja faza kliničnych vyprabavańniaŭ. Miarkujecca, što treciaja faza vyprabavańniaŭ budzie zavieršana ŭ lipieni-žniŭni 2021 hoda. Paśla hetaha stanie viadoma, ci abaraniaje vakcyna ad kavidu.

Efiektyŭnaść vakcyny, a taksama fakt jaje vypusku ŭ hramadzianski abarot da zaviaršeńnia kliničnych vyprabavańniaŭ krytykujecca šeraham zamiežnych i rasijskich śpiecyjalistaŭ.

Pa słovach kiraŭnika «Viektara» Alaksandra Siamionava, u pryščeplenych «EpiVakKaronaj» antycieły vypracoŭvajucca ŭ 94% vypadkaŭ. Zhodna z paviedamleńniem Rasspažyŭnahladu, pa vynikach dźviuch faz kliničnych vyprabavańniaŭ efiektyŭnaść «EpiVakKarony» skłała 100%. Vysnovy pra 100-adsotkavuju efiektyŭnaść byli apublikavanyja ŭ časopisie «Infiekcyja i imunitet» (pakazalnik cytavanaści časopisa prykładna ŭ sto razoŭ mienšy za pakazalnik časopisa «The Lancet»).

Pakul niama nivodnaj navukovaj publikacyi, jakaja b paćviardžała vypracoŭku vuzkaśpiecyjalizavanych antycieł u vakcynavanych ci demanstravała efiektyŭnaść suprać roznych štamaŭ karanavirusa. Ale sami raspracoŭščyki śćviardžajuć, što «EpiVakKarona» efiektyŭnaja suprać usich štamaŭ, u tym liku ad indyjskich «Delta» i «Delta plus».

21 traŭnia 2021 hoda Rasspažyŭnahlad apublikavaŭ źviestki, zhodna ź jakimi 807 jaho supracoŭnikaŭ prajšli poŭny kurs vakcynacyi «Epivakkaronaj». 37 z vakcynavanych zachvareli, a dvoje pamierli. Pakolki kantrolnaja hrupa adsutničała, dakładna aceńvać efiektyŭnaść vakcyny z hetych ličbaŭ niemahčyma.

Antycieły, jakija musiać utvarycca paśla vakcynacyi, vyznačaje tolki adzin test, što raspracavaŭ sam «Viektar». Pry hetym sistema nie maje prazrystaści, bo centr nie raskryvaje, jakija mienavita antycieły vyjaŭlaje ich test.

Doktar miedycynskich navuk, prafiesar NIC epidemijałohii i mikrabijałohii imia Hamalei, virusołah Anatol Altštejn ličyć, što rehistracyja vakcyny i zapusk treciaj fazy vyprabavańniaŭ byli pamyłkami, bo «EpiVakKarona» nie vyklikaje ŭtvareńnie antycieł, jakija mohuć abaraniać ad karanavirusa. Na jaho dumku, ludzi, pryščeplenyja «EpiVakKaronaj» buduć tak ža chvareć i pamirać, jak i niepryščeplenyja.

Padobnaje mierkavańnie vykazaŭ doktar bijałahičnych navuk Piotr Čumakoŭ: «EpiVakKaronu ja liču ŭ cełym bieskarysnaj, jana nie daje achovu, paśla jaje ŭ arhaniźmie nie vypracoŭvajucca achoŭnyja antycieły».

Volha Matviejeva, malekularny bijołah i zasnavalnica bijatechnałahičnaj kampanii Sendai Viralytics u ZŠA, nazyvaje «EpiVakKaronu» pustyškaj. Jany sumniavajecca ŭ mahčymaści karektnaj acenki efiektyŭnaści vakcyny paśla zaviaršeńnia treciaj fazy kliničnych vyprabavańniaŭ, bo ŭ hetym etapie ŭdzielničajuć usiaho 3 tysiačy čałaviek (u vyprabavańniach «Sputnik V» udzielničali 21 977 čałaviek, u «Pfizer» — 43 998 čałaviek).

Taksama Volha Matviejeva sumniavajecca ŭ pravilnaści vybaru pieptydaŭ dla vakcyny. Na jaje dumku, navukovyja artykuły pakazvajuć, što adpaviednyja pieptydam frahmienty šypavidnaha białku nie bačnyja imunnaj sistemie čałavieka. Tamu pieptydy nie mohuć vyklikać vypracoŭku antycieł, zdolnych abaranić ad virusa. Taho ž mierkavańnia prytrymlivajecca kandydat bijałahičnych navuk Marharyta Ramanienka, jakaja raniej pracavała ŭ «Viektary».

18 studzienia 2021 hoda ŭdzielniki vyprabavańniaŭ «EpiVakKarony» napisali adkryty list, dzie zajavili, što ŭ 50% udzielnikaŭ antycieły nie ŭtvarylisia paśla vakcynacyi, a ŭ astatniaj pałovy kolkaść antycieł niaznačnaja. Pry hetym vałanciory dadali, što admoŭny vynik na antycieły pakazała mienavita raspracavanaja «Viektaram» test-sistema.

Paźniej vałanciory znoŭ apublikavali vyniki ŭłasnych daśledavańniaŭ ź niezaležnych rasijskich łabaratoryj. Pa vynikach testaŭ inšych vytvorcaŭ antycieły nie byli vyjaŭlenyja ni ŭ koha. Bolš za toje, byli tyja, chto pierachvareŭ na kavid u ciažkoj formie paśla vakcynacyi.

• 0
• 0
• 0
• 0
• 0
• 0