Jak mahli «pamiłavać» preskłubaŭcaŭ, kali ich jašče nie asudzili? Tłumačym

Fihurantaŭ spravy «Pres-kłuba» abvinavacili va ŭchileńni ad spłaty padatkaŭ u asabliva bujnym pamiery i saŭdziele ŭ złačynstvie (č.2 art. 243 KK), ich zatrymali ŭ śniežni 2020 hoda. Pa spravie prachodzili zasnavalnica «Pres-kłuba» Julija Słuckaja, dyrektar Siarhiej Alšeŭski, prahramny dyrektar Ała Šarko, apieratar Piotr Słucki i dva byłyja supracoŭniki BT, jakija paśla vybaraŭ syšli na znak pratestu i chacieli zasnavać niezaležny telekanał — Ksienija Łuckina i Dzianis Sakałoŭski.

Užo ŭ pačatku studzienia svajaki abvinavačanych pieraličyli na rachunak Śledčaha kamiteta amal 107 tysiač rubloŭ — takuju sumu naličyli siłaviki. 

Praces vyzvaleńnia, pa infarmacyi «Našaj Nivy», zaniaŭ niekalki miesiacaŭ, užo navat paśla taho, jak hrošy byli spłačany, a patrebnyja pakazańni atrymanyja. Inicyjatyva Vaskrasienskaha dačynieńnia da hetaha nie maje. Viadoma, što Ksienija Łuckina admoviłasia padpisvać prašeńnie ab pamiłavańni, pryznavać siabie vinavataj i iści na supracoŭnictva sa śledstvam. 

Ci mahli pamiłavać inšych fihurantaŭ? Pa zakonie, pamiłavać mohuć užo asudžanaha čałavieka. Heta značyć, sud pavinien vynieści abvinavaŭčy prysud, jaki jašče pavinien ustupić u zakonnuju siłu (art. 96 KK). I tolki paśla hetaha ŭžo asudžany moža pisać prašeńnie ab pamiłavańni. Zajavu razhladaje admysłovaja kamisija pry Administracyi prezidenta. 

Ci jość inšyja sposaby vypuścić čałavieka da suda? Jość, naprykład, vyzvaleńnie ad kryminalnaj adkaznaści ŭ suviazi z dobraachvotnaj kampiensacyjaj naniesienaj škody, vypłataj dachodu, atrymanaha złačynnym šlacham (art. 88-1 KPK). Havorka idzie pra złačynstvy, dzie naniesieny ŭron dziaržaŭnaj ułasnaści ci ŭłasnaści jurasoby ź dziaržaŭnaj dolaj, a taksama pra ŭron dziaržaŭnym ci hramadskim intaresam. Ale złačynstva nie pavinna spałučacca z pasiahalnictvam na žyćcio i zdaroŭje čałavieka. Za ŭchileńnie ad spłaty padatkaŭ vyzvalić takim čynam možna. Ale jość niekalki abaviazkovych ŭmoŭ:

• kampiensavać naličany ŭron;
• pieraličyć kryminalna-pravavuju kampiensacyju (za ekanamičnyja złačynstvy — 100% ad złačynnaha dachoda, pa inšych złačynstvach — 200%);
• vykanać inšyja ŭmovy vyzvaleńnia (vyznačaje śledstva ŭ adpaviednaści z zakonam).

Paśla vyzvaleńnia ad kryminalnaj adkaznaści čałaviek prosta vychodzić na svabodu, nijakich dadatkovych abmiežavańniaŭ niama, sudzić jaho ŭžo nie buduć. 

Takim čynam, sudzić pa spravie «Pres-kłuba» buduć Ksieniju Łuckinu i Dzianisa Sakałoŭskaha. Vyzvalenyja fihuranty mohuć być dapytanyja na pracesie ŭžo jak śviedki. 

Čytajcie taksama:

Historyja Ksienii Łuckinaj, jakaja 15 hod pracavała na BT, a ciapier apynułasia ŭ SIZA za sprobu stvaryć alternatyŭny kanał

• 0
• 0
• 0
• 0
• 0
• 0