Ścipły razmach i rasijskaja kvazi-baza. Što treba viedać pra vajennyja vučeńni «Zachad-2021»
Pačalisia vajennyja vučeńni «Zachad-2021», častka ź jakich projdzie na terytoryi Biełarusi z asobnaj lehiendaj. Zhodna ź biełaruskaj častkaj lehiendy, źniešnija siły paśla niaŭdałaj sproby źmianić palityčnaje kiraŭnictva respubliki «Paleśsie», za jakoj chavajecca Biełaruś, pryniali rašeńnie dabicca mety vajennym čynam. U abaronie «Paleśsiu» dapamahie «Paŭnočnaja Fiederacyja» — Rasija.
U vučeńniach zadziejničana 12 800 sałdataŭ, ź ich 2 500 z Rasii i 50 kazachaŭ. Padčas pieršaha etapu adbyvajecca adpracoŭka abarony, padčas druhoha — nastupleńnia.
Zadziejničana 350 adzinak bronietankavaj techniki, u tym liku 140 tankaŭ, 110 adzinak artyleryi i RZSA, bolš za 30 samalotaŭ i viertalotaŭ.
Kali apuścić techničnyja momanty i hlanuć palityčna, to takoha masštabu vučeńniaŭ nie było z savieckich časoŭ — u momant kulminacyi na ŭsich palihonach budzie 96 tysiač čałaviek. Heta šmat.
Biełaruskaja častka vučeńniaŭ z adnaho boku łakalnaja i niesurjoznaja ŭ ahulnym masštabie, jana pierakryvajecca padziejami ŭ Rasii. Ale, kali viekapomnuju «Viejšnoryju» paraŭnoŭvali z DNR, to «Paleśsie» vypadaje paraŭnać chutčej z samim Łukašenkam.
Vielmi aktyŭna ŭ anonsach vučeńniaŭ padkreślivałasia nibyta ŭzrosłaja pahroza ad NATA — raniej heta było nie tak vyrazna.
Ale vajenny ahladalnik Alaksandr Alesin ličyć, što lehienda vučeńniaŭ nie maje asablivaha značeńnia.
«Heta dekaracyja, bo faktyčna zaŭsiody adpracoŭvajecca adnoje i toje ž: nastupleńnie, abarona, baraćba z dyviersijnymi hrupami praciŭnika, źniščeńnie braniravanych abjektaŭ», — kaža jon.
Analityk ličyć, što sioletnija vučeńni mała čym admietnyja i blaknuć na fonie navat letašniaj aktyŭnaści.
«Letaś, padčas dekłaratyŭna anty-terarystyčnych vučeńniaŭ «Słavianskaje braterstva — 2020» usio vyhladała bolš masštabna: letam u Biełarusi vysadžvalisia apieratyŭna-taktyčnyja hrupy rasijskich desantnych dyvizij, u Biełaruś pierakidvalisia dalnija bambardziroŭščyki, stratehičny bambardziroŭščyk Tu-160 rabiŭ ablot miežaŭ. U Biełarusi było 20 vajenna-transpartnych samalotaŭ Rasii i da piaci tysiač rasijskich vajennych», — kaža Alesin.
— Adzinaje, na što možna źviarnuć uvahu — adpracoŭka pa baraćbie ź bieśpiłotnikami, heta naviejana vopytam vajny ŭ Karabachie, dzie tureckija «Bajraktary» akazalisia surjoznym praciŭnikami dla artyleryjskich sistem i techniki. Taksama pašyrana ŭžyvańnie avijacyi, heta techničnyja admiestnaści».
Alesin ličyć, što sioleta masštab źmienšany śpiecyjalna.
«Heta dastatkova rucinnyja vučeńni, kab nie abvastrać tut situacyju. Ź inšaha boku miažy bujnyja kantynhienty — avijacyja lotaje z ubrajeńniami na borcie. Naŭradci ŭ Biełarusi chtości choča, kab zdaryŭsia sapraŭdny incydent. Tamu asnoŭnyja padziei razhornucca na palihonach Rasii — prymianieńnie taktyčnych rakiet, reaktyŭnych sistem vialikaj dalokaści, zapusk kryłatych rakiet i rakiet marskoha baziravańnia», — kaža jon.
Imaviernaść taho, što piachotnyja rasijskija vojski zastanucca ŭ Biełarusi, jon ličyć mizernaj.
«Ja saču za biełaruska-rasijskimi vučeńniami z 2009-ha i kožny raz hety matyŭ hučyć. U zaściarohi patryjatyčnaj biełaruskaj publiki smały padlivajuć rasijanie, bo adnačasova z vučeńniami ŭ rasijskaj presie źjaŭlajucca zakliki, maŭlaŭ: dobra było b pakinuć tam svaje vojski, bo i Łukašenka nierašučy ŭ pytańniach intehracyi, i Zachad naroščvaje vajennuju prysutnaść, voś pakiniem vojski, a tam i Łukašenka vyznačycca ź intehracyjaj.
Ale ja liču tak: Rasija pretenduje na ŭzmacnieńnie svajho ŭpłyvu va ŭsich byłych sajuznych respublikach, a nie tolki Biełarusi. Za dužkami chiba što krainy Bałtyi i Ukraina.
Kab nie napałochać Kazachstan, Uźbiekistan i Turkmienistan, jakija majuć važnaje stratehičnaje značeńnie i surjoznyja vajennyja siły, Rasija vymušana aściarožna siabie pavodzić na biełaruskim kirunku, inačaj z raptoŭnaj inkarparacyjaj Biełarusi na jaje płanach upłyvu ŭ Siaredniaj Azii budzie pastaŭleny kryž. Ja dumaju, hety praces «intehracyi» budzie mieć doŭhi i zaciažny charaktar, biez takoha elemientu jak prymusovaje pakidańnie vojskaŭ», — kaža jon.
Ale ŭ hety ž momant adbyłasia tryvožnaja padzieja: u Biełaruś nibyta dla pracy ŭ farmacie abjadnanaha vučebnaha centra prybyli rasijskija samaloty i rakietny kompleks S-400. Usia technika kirujecca rasijanami.
Analityki ličać, što heta možna ličyć źjaŭleńniem rasijskaj vajennaj kvazi-bazy na terytoryi Biełarusi.
«Siońnia stała jasna, što rasijskaja vajennaja prysutnaść bajavych čaściej u Biełarusi finalizavałasia», — piša ahladalnik Jahor Lebiadok, kamientujučy źjaŭleńnie S-400.
«Najaŭnaść S-400 — heta i sposab dalejšaha pašyreńnia prysutnaści. Možna, naprykład, jak u vypadku z rasijskim vuzłom suviazi ŭ Vilejcy — uzmacnić kompleksami REB. Dalej, dla zabieśpiačeńnia biaśpieki ad dyviersijnych hrup možna dasłać rotu achovy i hetak dalej. Zrešty, jak u vypadku z rasijskimi vajennymi abjektami ŭ Kyrhyzstanie ŭ 2017 hodzie, mahčyma abjadnańnie dvuch abjektaŭ u nas i vučebna-bajavych centraŭ u adzinuju rasijskuju bazu.
Darečy, nikoli nie bačyŭ sensu z raździaleńni rasijskich vajennych abjektaŭ i vajennych baz — heta farmalistyka dla pravavoj publicystyki, važnaja tolki sutnaść — znachodžańnie rasijskich vojskaŭ», — kaža jon i reziumuje, što centry mohuć być źviernuty ŭ zaležnaści ad handlu Łukašenki i Pucina.
Byłoha supracoŭnika kontrraźviedki KDB aryštavali za zdradu dziaržavie9
Kamientary