Šviecyja ad siońnia admianiaje amal usie abmiežavańni, uviedzienyja ŭ suviazi z pandemijaj karanavirusa. Siarod inšaha admianiajucca abmiežavańni na kolkaść udzielnikaŭ hramadskich i pryvatnych mierapryjemstvaŭ, spyniaje dziejničać rekamiendacyja pracavać dystancyjna, paviedamlaje Deutsche Welle.
Pry hetym tym, u kaho jość simptomy, rekamiendujecca zastavacca doma i praviaracca na karanavirus. Ludziam, jakija nie prajšli poŭnuju vakcynacyju, rajać zachoŭvać dystancyju i paźbiahać šmatludnych mierapryjemstvaŭ.
«Usio, što robicca ciapier, zasnavana na tym, što ŭ Šviecyi vysoki ŭzrovień vakcynacyi. Kab my adčuvali siabie ŭ biaśpiecy, jana pavinna być jašče vyšejšaj. Kali vy jašče nie vakcynavanyja, to samy čas zrabić heta ciapier», — zajaviŭ hałoŭny dziaržaŭny epidemijołah Šviecyi Anders Tehnieł.
Pa danych Ahienctva hramadskaj achovy zdaroŭja Šviecyi, 83,6% žycharoŭ krainy atrymali jak minimum adnu dozu vakcyny ad karanavirusa, 76,5% pryščeplenyja całkam.
Usiaho ŭ Šviecyi z pačatku pandemii było vyjaŭlena 1 151 173 vypadki karanavirusa, ad nastupstvaŭ zaražeńnia pamierli 14 850 čałaviek.
Jašče 25 vieraśnia bolšaść antykaranavirusnych abmiežavańniaŭ admianiła Narviehija. «Jak hramadstva, my pavinny vučycca žyć ź virusam. Tamu važna, kab tyja, chto nie byŭ vakcynavany, zrabili heta», — zajaviła premjer-ministr krainy Erna Sulbierh.
Ułady Danii admianili ŭsie karanavirusnyja abmiežavańni z 10 vieraśnia. Urad zajaviŭ, što bolš nie ličyć SARS-CoV-2 niebiaśpiečnaj dla hramadstva infiekcyjaj.
Ciapier čytajuć
«Ja dumaŭ, mianie nie moža ničoha ździvić». Na fudkorcie ŭ minskim HC zrabili płatnyja stały4
Kamientary