Швецыя ад сёння адмяняе амаль усе абмежаванні, уведзеныя ў сувязі з пандэміяй каранавіруса. Сярод іншага адмяняюцца абмежаванні на колькасць удзельнікаў грамадскіх і прыватных мерапрыемстваў, спыняе дзейнічаць рэкамендацыя працаваць дыстанцыйна, паведамляе Deutsche Welle.
Пры гэтым тым, у каго ёсць сімптомы, рэкамендуецца заставацца дома і правярацца на каранавірус. Людзям, якія не прайшлі поўную вакцынацыю, раяць захоўваць дыстанцыю і пазбягаць шматлюдных мерапрыемстваў.
«Усё, што робіцца цяпер, заснавана на тым, што ў Швецыі высокі ўзровень вакцынацыі. Каб мы адчувалі сябе ў бяспецы, яна павінна быць яшчэ вышэйшай. Калі вы яшчэ не вакцынаваныя, то самы час зрабіць гэта цяпер», — заявіў галоўны дзяржаўны эпідэміёлаг Швецыі Андэрс Тэгнел.
Па даных Агенцтва грамадскай аховы здароўя Швецыі, 83,6% жыхароў краіны атрымалі як мінімум адну дозу вакцыны ад каранавіруса, 76,5% прышчэпленыя цалкам.
Усяго ў Швецыі з пачатку пандэміі было выяўлена 1 151 173 выпадкі каранавіруса, ад наступстваў заражэння памерлі 14 850 чалавек.
Яшчэ 25 верасня большасць антыкаранавірусных абмежаванняў адмяніла Нарвегія. «Як грамадства, мы павінны вучыцца жыць з вірусам. Таму важна, каб тыя, хто не быў вакцынаваны, зрабілі гэта», — заявіла прэм'ер-міністр краіны Эрна Сульберг.
Улады Даніі адмянілі ўсе каранавірусныя абмежаванні з 10 верасня. Урад заявіў, што больш не лічыць SARS-CoV-2 небяспечнай для грамадства інфекцыяй.
Цяпер чытаюць
Хто той хлопец, які чакаў дзяўчыну пад дажджом у Мінску? Вы дакладна бачылі тое рамантычнае відэа14
Каментары