U Vilejcy 29 vieraśnia zahadčyca reanimacyi Vilejskaj rajonnaj balnicy Viktoryja Siemiankovič praviała sustreču z rabotnikami darožnaha ramontna-budaŭničaha ŭpraŭleńnia, na jakoj raskazała pra situacyju z karanavirusam u rehijonie, a taksama paraŭnała ź situacyjaj u Maładziečnie i Słucku, paviedamlaje «Šlach pieramohi».
«U Vilejcy na siońnia składvajecca takaja situacyja, što ŭ čaćviortuju chvalu masava chvarejuć moładź i dzieci. Zachvorvańnie praciakaje vielmi chutka, stan ludziej paharšajecca za dva-try dni», — raspaviała na sustrečy Viktoryja Viktaraŭna.
Taksama jana raspaviała, što ich adździaleńnie reanimacyi pryščeplena na 100%: nichto z supracoŭnikaŭ nie chvareŭ ni ŭ adnu chvalu.
«Kali pryščepleny i chvareje, to ŭ lohkaj formie, nie traplajučy ŭ balnicu», — kaža doktar.
«U Vilejcy ŭ adździaleńni ciapier lažać 70 čałaviek, u reanimacyi — 9. Siarod ich niama nivodnaha pryščeplenaha čałavieka. Takuju statystyku my pryvodzim dla skieptykaŭ. U Maładziečnie lažyć 189 chvorych z COVID-19. U Słucku — za ŭčorašni dzień 393, nichto ź ich nie pryščepleny».
«Strašna, što chvarejuć maładyja ludzi, kožnaja novaja chvala amałodžvajecca. Vielmi šmat chvareje dziaciej. U Maładziečnie na bazie dziciačaj balnicy adkryta adździaleńnie na 50 łožkaŭ, usio adździaleńnie zaniata. Dzieci chvarejuć nie tak ciažka, jak darosłyja, ale jany vielmi mocna raspaŭsiudžvajuć infiekcyju» — padkreślivaje Viktoryja Siemiankovič.
Pa jaje słovach, usie ludzi, u jakich jość chraničnyja zachvorvańni, naprykład cukrovy dyjabiet, pavinny pryščaplacca ŭ pieršuju čarhu.
«Chvaroba praciakaje nie jak pnieŭmanija. U pacyjentaŭ masiŭnaje trombaŭtvareńnie, zabivajucca lohkija, ludzi nie mohuć zrabić ŭdych i nie mohuć adkašlacca», — kaža doktar.
Daišnik, jakoha źbiŭ mašynaj piensijanier pad Minskam, pamior u balnicy. Jamu zładzili pyšnaje pachavańnie18
Kamientary