Rasijskaja i biełaruskaja prapahanda stała nastojliva paŭtarać, što Polšča staić za arhanizacyjaj pratestaŭ u Kazachstanie. Heta źviazana ŭ tym liku z radykalnaj rytorykaj telehram-kanała Ściapana Puciły, piša polski analityk Vitald Juraš.
Naŭprost abvinavaciŭ Polšču ŭ datyčnaści da kazachskich pratestaŭ u svajoj aŭtarskaj prahramie prapahandyst Uładzimir Sałaŭjoŭ i pryvioŭ arhumient na svaju karyść: «Niechta» z terytoryi Polščy staŭ davać instrukcyi pa viadzieńni vuličnaha boju. I polskija ŭłady nijak nie adreahavali».
Abvinavacili Ściapana Puciłu ŭ kaardynacyi kazachskich pratestaŭ i prapahandysckija resursy EurAsia Daily, Russia Today, Rubaltic.ru.
Prezident Centra stratehičnaha analizu Vitold Juraš na partale onet.pl piša, što rasijskija i biełaruskija ŚMI daŭno naŭprost abvinavačvajuć redakcyju «Niechta» ŭ finansavańni z boku polskich śpiecsłužbaŭ.
Pra heta kazaŭ na kamieru i były hałoŭny redaktar kanała Raman Pratasievič, vykradzieny biełaruskimi ŭładami z samalota, jaki nakiroŭvaŭsia ŭ Vilniu. Kaniečnie, adznačaje analityk, davier da biełaruskich i rasijskich dziaržaŭnych ŚMI nikčemna mały. Słovy Pratasieviča, uličvajučy jaho stanovišča (pahroza šmathadovaha źniavoleńnia, aryšt jaho dziaŭčyny Safii Sapieha i ślady źbićcia), taksama nie vyklikajuć davieru.
Heta nie mianiaje taho faktu, što nie tolki na ŭschodzie, ale i na Zachadzie, uklučajučy akredytavany ŭ Varšavie dypłamatyčny korpus ES i NATO, raspaŭsiudžanaje mierkavańnie, što «Niechta» padtrymlivajecca i finansujecca polskaj dziaržavaj, choć i nie abaviazkova polskimi śpiecsłužbami.
«Heta nie mianiaje taho faktu, što ŭsio, što robić «Niechta», usprymajecca — padabajecca nam heta ci nie — jak dziejańnie, sankcyjanavanaje abo naŭprost zamoŭlenaje Polščaj», — ličyć Vitald Juraš.
Čytajcie taksama: Čamu padziei ŭ Kazachstanie nielha paraŭnoŭvać ź biełaruskimi, ale što ź ich łohiki treba zapomnić
«Navat biehły analiz kantentu, jaki pieradajecca ŭ apošnija niekalki dzion «Niechtam», pakazvaje na toje, što hety kanał u dačynieńni da padziej u Kazachstanie nie zachavaŭ nijakaj niejtralnaści abo žurnalisckaj abjektyŭnaści. Redaktary kanała adkryta zaklikali kazachaŭ vyjści na vulicu. U vyniku hetaha rasiejcy vinavaciać Polskuju Respubliku ŭ tym, što jana stajała za pratestami», — źviartaje ŭvahu analityk.
«Dazvalajučy biełaruskamu infarmacyjnamu kanału, jaki pracuje z našaj terytoryi, adkryta zaklikać kazachaŭ da vychadu na vulicu, my ryzykujem atrymać toje, što Rasija ŭžo robić, heta značyć ukazvać na Polšču jak na dziaržavu, jakaja destabilizuje situacyju ŭ rehijonie i sprabuje zrynuć režymy», — pieraścierahaje Vitald Juraš.
Ciapier čytajuć
Rasijskija prapahandysty vydumali ŭdar drona pa turystyčnym aŭtobusie. Ale ŭ historyi jość zahadkavyja fury4
Kamientary