Što viadoma pra maładziečanca, jakoha trymajuć u turmie z ankałohijaj čaćviortaj stadyi za kamientaryi
Vosieńniu 2020 hoda ŭ 27-hadovaha maładziečanca Paŭła Kučynskaha znajšli ankałohiju. Aficyjny dyjahnaz: kłasičnaja limfoma Chodžkina. Chłopiec prajšoŭ niekalki kursaŭ lačeńnia, ale chvaroba prahresavała. U studzieni 2022-ha jon pavinien byŭ jechać u Baraŭlany na čarhovy kurs chimijaterapii, ale jaho zatrymali za kamientaryi ŭ internecie — spačatku na try hadziny, potym na troje sutak, ale tak i nie vypuścili. Stan zdaroŭja mužčyny za kratami tolki paharšajecca, i svajaki bjuć tryvohu: Pavieł moža nie dačakacca navat suda.
Siastra Paŭła Jana raspaviała pra jaho stan, adpiski śledčych i prakuratury i pra maci, jakaja pastareła za hetyja miesiacy, jak za hady.
Jana — małodšaja siastra Paŭła. Dziaŭčyna raskazvaje, što vialikaja častka ich žyćcia prajšła pry kaściole — tam jany znachodzili siabroŭ, pravodzili vychadnyja. Pavieł skončyŭ muzyčnuju škołu pa kłasie fartepijana, hraŭ u ansambli na ŭdarnych. Chłopiec vielmi lubić čytać i hulać u nastołki.
«Paśla navučańnia brat pracavaŭ na «Intehrale». Da taho, jak zachvareŭ, aktyŭna vučyŭ niamieckuju movu i źbiraŭ hrošy, bo chacieŭ pasprabavać pajechać za miažu i tam papracavać. Ale ŭ jaho vyjavili ankałohiju: čaćviortaja stadyja, druhaja hrupa invalidnaści, i jon bolšuju častku času pamiž lačeńniem pravodziŭ ź siamjoj. Žyŭ z babulaj i dziadulem niedaloka ad Maładziečna», — raskazvaje Jana.
Paŭła ŭziali «za kamientaryi ŭ telehram-kanałach». Papiarednie jaho abvinavačvajuć u abrazie dvuch sudździaŭ, Łukašenki, supracoŭnika RAUS, a taksama ŭ pahrozach sudździam i Łukašenku. U spravie fihuruje ceły šerah artykułaŭ: 361, 364, 368, 369 KK.
«Nakolki ja viedaju, za hety čas vyjavili ažno 18 vypadkaŭ pa hetych čatyroch artykułach. Niedzie ŭ rehijanalnych čacikach kamientaryi pakidalisia, moža, jašče dzie. Darečy, zatrymali jaho mienavita ŭ Maładziečnie pa prapiscy: jon zajechaŭ da maci, moža, na jakich paŭhadziny, nie byŭ da hetaha doma niekalki miesiacaŭ. Pryjšli z orderam na vobšuk, ahledzieli kvateru i telefony našy. Ciapier jon u žodzinskaj turmie, apošni raz byŭ u Maładziečnie, kali pravodzilisia śledčyja dziejańni».
Niahledziačy na pazityŭnyja listy ad Paŭła (jakija choć i iduć z Žodzina niekalki tydniaŭ, ale prychodziać), dzie jon raskazvaje, što siadzić z dobrymi ludźmi, i na toje, što chłopcu dajuć leki, siamja bje tryvohu: jaho stan u turmie staŭ jašče horšym, jamu patrebnaja chimijaterapija. Heta paćvierdziła niadaŭniaje abśledavańnie ŭ Baraŭlanach — svajaki damahlisia, kab Paŭła tudy zvazili.
«U maci matulinaha muža taksama vyjavili ankałohiju na čaćviortaj stadyi, jak u Pašy. Jana admoviłsia ad lačeńnia i pamierła za paŭhoda. I heta było vielmi pakutliva. Maci ŭsio heta bačyła, i tamu vielmi ciapier pieražyvaje. Za hetyja niekalki miesiacaŭ z momantu zatrymańnia Pašy jana vielmi pastareła — imkliva paharšajecca vizualna. Jana starajecca trymacca, kaža: «Ja ž nie zrablu Pašy lepiej, kali budu płakać». Ale joj dajecca ŭsio heta ciažka», — dzielicca Jana.
«Kali Paša zachvareŭ, jon pierastaŭ chadzić kudyści, usio doma byŭ, vielmi vypaŭ. I voś tolki apošnija niekalki miesiacaŭ zdavałasia, što jamu stała lepš maralna, a tut jaho zatrymali… Nie viedaju, jak jon daść usiamu rady… Kali maci pryviezła vyniki abśledavańnia śledčaj z prośbaj akazać dapamohu, taja skazała, što jon nie skardzicca. Ën, moža, i nie skardzicca, i nam śpiecyjalna ničoha drennaha nie piša ŭ listach, ale abśledavańnie śviedčyć, što jaho stan pahoršyŭsia, pačalisia zapalenčyja pracesy, patrebnaja chimija, ukoły. U turmie nichto nie zmoža zabiaśpiečyć narmalnaje lačeńnie».
Čytajcie taksama:
«U tych, chto raspačaŭ jaje pieraśled, nie była zadavolenaja praha pomsty». Hutarka z mužam žurnalistki Andrejevaj, jakuju ciapier abvinavačvajuć u «zdradzie dziaržavie»
-
Aficer-pahraničnik, jaki prajšoŭ praz turmu, raskazvaje pra žyćcio «da» i «paśla» dyj nie škaduje słoŭ pahardy dla amapaŭcaŭ
-
Danosy, bojka z Daškievičam, zavyšeńnie pakazčykaŭ u BRSM — jak prałažyŭ sabie šlach deputat-kamunist Siarhiej Kliševič?
-
Pratasievič kaža, što jeździŭ u Dubaj nie tolki na adpačynak
Kamientary