U siaredzinie 2000-ch hadoŭ było zapłanavana pabudavać na hetym miescy kulturna-zabaŭlalny centr, ale znajšoŭsia bolš prybytkovy dla zabudoŭščykaŭ varyjant. Prajekt nidzie nie publikavaŭsia.
Na pustyry ŭ adnym z dvaroŭ žyłoha rajona Labiadziny ŭ Minsku pačali ŭzvodzić dom, infarmacyja pra jaki trymajecca ŭ sakrecie zabudoŭnikami i čynoŭnikami.
Tryvohu žychary zabili jašče ŭ listapadzie 2023 hoda, kali nieviadomyja rabočyja pryjšli i abharadzili pad budoŭlu placoŭku pamiž damami №16 i 20 na vulicy Miastraŭskaj.
Žychary spadziavalisia, što tut pabudujuć abjekt sacyjalna-bytavoha pryznačeńnia, jakija ŭ rajonie ŭ deficycie. Pierad tym, jak zasialicca ŭ siaredzinie 2010-ch hadoŭ u svaje damy, navasioły cikavilisia, što jašče moža źjavicca ŭ ichnim rajonie, i tady im patłumačyli, što ŭ hetym miescy, pamiž dvuma damami-słupkami, pa płanie musić vyraści šmatfunkcyjanalny centr.
Mienavita kampaktny hramadski budynak namalavany na eskizie zabudovy z detalovaha płana rajona. Pra źjaŭleńnie na hetaj terytoryi płoščaj 0,8 ha šmatfunkcyjanalnaha centra z kinateatram u 2019 hodzie, spasyłajučysia na inviestycyjny atłas, pisała i dziaržaŭnaje ahienctva «Minsk-Naviny».
Ale žycharoŭ čakała rasčaravańnie, kali na aharodžy vakoł budoŭli źjaviŭsia pašpart abjekta. Vyjaviłasia, što budavać tut buduć zusim nie šmatfunkcyjanalny centr, a šmatpaviarchovy žyły dom. U prastorny rajon pa praśpiekcie Pieramožcaŭ pryjšło ŭščylnieńnie.
Ludzi nie mahli pavieryć u taki padman i źviarnulisia da miascovych uładaŭ z kalektyŭnym listom, kab im patłumačyli, jak heta mahło adbycca. Tym bolš, što nidzie pra płany pabudavać na hetym učastku žyły dom nie zhadvałasia. I navat na publičnaj kadastravaj karcie značyłasia «Ziamielny ŭčastak dla budaŭnictva abjekta «Kulturna-zabaŭlalny centr z kinateatram №20 (pa hienpłanie) u žyłym rajonie Lebiadziny».
Kamitet architektury i horadabudaŭnictva Minharvykanama adkazaŭ koratka: na hetym učastku płanujecca budaŭnictva šmatkvaternaha žyłoha doma, bo pa prajekcie detalnaha płanavańnia žyłoha rajona Lebiadziny, zaćvierdžanym u vieraśni 2004 (u inšym adkazie 2007), ziamielny ŭčastak znachodzicca ŭ kvartale žyłoj zabudovy.
Žycharam udałosia taksama razdabyć rendar i vyśvietlić, što dom budzie mieć bolš jak 400 kvater i składacca z troch siekcyj pa 12, 16 i 25 pavierchaŭ. 25 pavierchaŭ majuć susiednija damy-słupki.
Niama čaho i kazać pra parušeńnie architekturnaj kampazicyi, jakuju zakładali horadabudaŭniki pry prajektavańni rajona, ale jak ža pytańni insalacyi kvater u susiednich dvarach i na dziciačych placoŭkach, zabiaśpiečanaści parkovačnymi miescami, miescami ŭ dziciačych sadkach, škołach, paliklinikach? Usio heta padzie ciažaram na ŭžo pierahružanuju infrastrukturu rajona.
Miarkujučy pa płanie, jaki źmieščany na schiemie ruchu vakoł budoŭli, dom budzie mieć nievialiki padziemny parkinh na 2 pavierchi, jaki nie zdolny zabiaśpiečyć patreby 400 kvater.
Jak taki hihancki abjekt mahli dazvolić biez hramadskaha abmierkavańnia?
Pavodle biełaruskaha zakanadaŭstva, kali ty buduješ žyły dom na terytoryi, jakaja pa detalnym płanie rajonie adviedziena pad žyłuju zabudovu (jana moža być źmiašanaj, to-bok uklučać jak žyłyja, tak i hramadskija abjekty), to praviadzieńnia hramadskaha abmierkavańnia nie patrabujecca. Usio, tak by mović, «pa zakonie».
Sproby žycharoŭ susiednich damoŭ atrymać choć jakuju infarmacyju ad Minhavykankama pra toje, jakim budzie dom, akazalisia biezvynikovymi.
Na ŭsie zvaroty pa hetaj budoŭli čynoŭniki adkazvali adpiskaj, spasyłajučysia na toje, što davańnie infarmacyi parušyć «pravy, svabody i (abo) zakonnyja intaresy inšych asob». Čyje?
Zamoŭcam budaŭnictva na pašparcie abjekta značycca TAA «SMU-87», prajektnaj arhanizacyjaj — architekturnaja studyja «ArchNuvo», techničny nahlad ažyćciaŭlaje «Datč Star».
«ArchNuvo» — davoli viadomaje architekturnaje biuro, čyje prajekty adroźnivajucca nietryvijalnym rašeńniem fasadaŭ u duchu bijamarfizmu. Razdabyty žycharami rajona rendar adlustroŭvaje šmatpaviarchovik z zusim niecharakternymi dla biuro strohimi hieamietryčnymi fasadami.
«Datč Star» viadomy mnohim minčanam jak zabudoŭnik mikrarajona pobač ź mietro «Hrušaŭka». Z žyłym kompleksam «Hrand Chaus», jaki zabudoŭščyk uzvodziŭ u hetym rajonie, byŭ źviazany hučny skandał apošnich hadoŭ. Uźviadzieńnie častki kompleksu praduhledžvała źniščeńnie častki Hrušaŭskaha skviera. Miascovyja žychary vyrašyli adstojvać apošniuju zialonuju zonu ŭ rajonie. Supraciŭ byŭ takim mocnym, što ŭłahodžvać žycharoŭ u 2020 hodzie pryjazdžała Kačanava. Rašeńnie ab zachavańni skviera prymaŭ asabista Łukašenka, haradskim uładam daviałosia šukać dla zabudoŭnika novy ŭčastak u jakaści kampiensacyi.
Samaj zahadkavaj z trojki źjaŭlajecca kampanija «SMU-87», jakaja vystupaje zabudoŭnikam.
Nazva kampanii mimikruje pad abrevijatury dziaržaŭnych arhanizacyj u budaŭničaj halinie, jakija isnujuć jašče z savieckich časoŭ, jaje možna było b navat rasšyfravać jak «budaŭniča-mantažnaje ŭpraŭleńnie» ci «śpiecyjalizavanaje mantažnaje ŭpraŭleńnie».
Ale nasamreč heta pryvatnaja kampanija, jakaja była zarehistravana tolki ŭ lutym 2023 hoda. Užo ŭ listapadzie taho ž hoda «SMU-87» abniesła aharodžaj smačny kavałačak ziamli ŭ prestyžnym staličnym rajonie i pačała budaŭnictva 25-paviarchovaha hmacha.
Sakret pośpiechu kampanii vydaje jurydyčny adras, pa jakim jana zarehistravana — praśpiekt Dziaržynskaha, d.19, pam. 1510. Heta adras taho samaha skandalnaha doma «Hrand Chaus» u Hrušaŭcy. U hetym ža domie raźmiaščajecca «Datč Star» sa svaim ofisam prodažaŭ kvater u žyłym kompleksie «Hrand Avieniu». Pavodle ekśpiertaŭ pa nieruchomaści, «SMU-87», «Datč Star» i «HrandChauzInženirynh», jaki buduje «Kvartał» u Hrušaŭcy, uvachodziać u hrupu kampanij «Hrand Deviełapmient». Heta tłumačyć chutki ŭźlot nieviadomaj nikomu na rynku staličnaj nieruchomaści kampanii.
Zahadkavy šmatpaviarchovik na Miastraŭskaj vulicy zabudoŭnik płanuje skončyć tolki ŭ listapadzie 2026 hoda.
«Naša Niva» — bastyjon biełaruščyny
PADTRYMAĆBrescki deputat pabudavaŭ elitny dom na nabiarežnaj. Ceny mohuć šakavać navat minčukoŭ
«U kvatery pa styku ciače vada, a mnie kažuć, što heta nie prablema». U Smalavičach dva hady nie mohuć zdać dom na paŭsotni kvater
Kamu pa kišeni? Ahlad kredytaŭ na nieruchomaść ad biełaruskich bankaŭ
Kvatery jeŭrafarmatu nabirajuć papularnaść u Biełarusi
«Skazaŭ: ja tut ničoha prasić nie budu». Žonka raskazała, jak Vieramiejčyka pryznali pahrozaj u Litvie18
Kamientary