Kali vy zasumavali pa biełaruskamoŭnym aŭdyjakantencie, prapanujem vam na vybar siem padkastaŭ. My staralisia vybirać niezakinutyja prajekty, jakija jašče mohuć paradavać novymi vypuskami.
«Zabi ziapu»
Papularny (4,5 tysiačy padpisčykaŭ u instahramie) padkast pra, cytujem, «składanuju realnaść, jakaja zvaliłasia na ŭsich nas». Nazva jaho maje sumny sens: «zabi ziapu» — hrubaja prośba zamoŭknuć. Jak kažuć aŭtary prajekta, heta tyja słovy, jakija časam prychodzicca čuć u svoj adras biełaruskamoŭnym ludziam.
Padkast viaduć maładziony Daša i Uładź, jakija niekali razam vučylisia ŭ licei BDU, razam pastupili ŭ maskoŭskuju Vyšejšuju škołu ekanomiki i znoŭ-taki razam pačali hutaryć pa-biełarusku. U padkaście jany trenirujuć rodnuju movu praz pošuk adkazaŭ na važnyja dla ŭsich pytańni: hutarać pra soram, talent, vieru, prablemy ŭ adnosinach i emihracyju.
Šukajcie padkast tut.
«Biełaruskija bajki»
Hety prajekt viadzie prafiesar EHU Alaksandr Kałbaska. Spadar Alaksandr zapisvaje jaho dla svajoj dalokaj unučcy, što žyvie razam z baćkami ŭ Italii.
U vypuskach, pamier jakich redka pieravyšaje 20 chvilin, aŭtar raspaviadaje roznyja historyi pra rečy, ludziej i padziei, tak ci inakš źviazanyja ź Biełaruśsiu. Apošni na siońnia vypusk, naprykład, pryśviečany Sałaŭkam dy Biełamorkanału. Jość tut historyi pra Kalady i śviatoha Mikałaja, draniki i piva, Chaima Sucina i Jazepa Drazdoviča i navat pra Sanćjaha de Kampasteła (viedajecie, jak hety šlach źviazany ź Biełaruśsiu?).
Adzin z samych doŭhich vypuskaŭ (37 chvilin) pryśviečany raźbitamu sercu Tadevuša Kaściuški i jaho pryhodam. Šukajcie hety i inšyja epizody prajekta tut.
Slodky Stony
Hety videapadkast robić biełaruskaja jutub-zorka Mikita Miełkazioraŭ, viadomy pa kanału ź videaintervju «Žyćcio-malina». Kali šukajecie całkam biełaruskamoŭny prajekt, mahčyma, heta nie dla vas: tut za rodnuju movu adkazvaje tolki Miełkazioraŭ, haściam ža dazvolena havaryć na luboj movie.
Ale ž i hości tut jak na padbor. Zaraz dastupnyja piać sieryj prajekta (pahladzieć ich možna tut), dzie ź Mikitam hutarać arhanizatarka žanočych maršaŭ — 2020 Nasta Kaściuhova, topavaja pijarščyca Taćciana Kurbat, kiraŭnik BySol Andrej Stryžak, kulturołah Maksim Žbankoŭ i hramadskaja dziajačka Nina Šydłoŭskaja.
«Technavuka»
Maleńki, ale duža cikavy biełaruskamoŭny padkast pra technałohii, navuku i kosmas, dzie vam raskažuć pra ŭsie mahčymyja naviny navukovaha i technałahičnaha śvietu. Tut i epapieja z kuplaj Iłanam Maskam Tvitara, i fota čornaj dzirki, i śmierć čałavieka ź pierasadžanym śvinym sercam, i navat historyja sa štučnym intelektam, jaki nibyta ažyŭ u ścienach Google.
Zaraz dasiažnyja čatyry vypuski prajekta — spadziajemsia, što nieŭzabavie ich budzie bolš. Znajści spasyłki na padkast možna tut.
«Šlachieckija siemji Biełarusi»
Hety padkast razam robiać internet-časopis 34mag.net i MTS. U ich atrymaŭsia prajekt pra samyja viadomyja šlachieckija biełaruskija rody: Sapiehi, Radziviły, Ahinskija, Pusłoŭskija. Raskažuć nam i pra spadčynu, jakuju kožnaja z hetych siemjaŭ pakinuła Biełarusi.
Vypuski «Šlachieckich siamjaŭ» pradstaŭlenyja na ruskaj i biełaruskaj movach, daŭžynia — da 15 chvilin. Na siońnia vyjšła šeść epizodaŭ padkastu, znajści ich možna pa spasyłcy.
«Doktar Martaŭ. Na vajnie z COVID-19»
Na sajcie «Radyjo Svaboda» jość dosyć padkastaŭ na luby žyćciovy vypadak: pra historyju krainy, žanočy pohlad na padziei, padarožžy, movu, aŭdyjaknihi i inšaje. Siońnia zhadajem asabisty prajekt, jaki viadzie doktar-reanimatołah Uładzimir Martaŭ ź Viciebska, chto adnym ź pieršych biełaruskich miedykaŭ raspavioŭ praŭdu pra stanovišča z kavidam u krainie.
Adpaviedna, padkast miedyka — heta apovied pra pieršuju chvalu kavidu, stvorany z nakidaŭ budučaj knihi Martava pra tyja padziei. Zaraz vychodzić druhi siezon prajekta, jaki raspaviadaje ŭžo pra druhuju pałovu 2020 hoda i pra paślavybarčy čas. Pasłuchać padkast možna pa spasyłcy.
VANDRA
Z nadychodam pandemii, jak tłumačać aŭtary hetaha prajekta, biełarusy pačali bolš cikavicca rodnymi miaścinami, ale ž usio roŭna šmat čaho zastajecca nieviadomym. Dla taho, kab raspavieści pra ŭsio heta, i stvorany padkast VANDRA — historyja pra turyzm u Biełarusi, spadčynu našaj krainy, biełaruskuju pryrodu i ludziej.
Tut jość vypuski jak na ruskaj movie, tak i pa-biełarusku. Źviarnicie ŭvahu na epizody padkasta pra paleskija historyi, draŭlanuju spadčynu Biełarusi i aŭtastop pa rodnaj krainie — zdajecca, z takim kreatyvam pra ajčynny turyzm redka raskazvajuć. Šukajcie epizody prajekta tut.
«Naša Niva» — bastyjon biełaruščyny
PADTRYMAĆ«Biełaruskuju movu nie treba rabić seksi — jana ŭžo takaja». Parady ad tych, chto pačaŭ razmaŭlać pa-biełarusku
Mikita Miełkazioraŭ zapuściŭ videa-padkast pa-biełarusku ź intryhoŭnaj nazvaj
Žyvahłod pryznała rassyłku praz čat-bot «Sumlennych ludziej» karystalnikam u Biełarusi: Ale nie ŭ pracoŭny čas, paśla 18 hadzin3
Kamientary