Maci palitviaźnia raskazała, što taho amal usio leta pratrymali ŭ ŠIZA
Prajekt «1906» pahavaryŭ z maci Uładzisłava Kareckaha. My publikujem hety tekst.
Uładzisłavu Kareckamu 26 hadoŭ. Chłopiec žyŭ u Minsku, pracavaŭ aśviatlalnikam na «Biełaruśfilmie».
U junactvie Uładzisłaŭ byŭ čempijonam Biełarusi pa hreka-rymskaj baraćbie, a apošnija niekalki hadoŭ zacikaviŭsia tancami.
Jak aśviatlalnik, jon braŭ udzieł u zdymkach filma «Uroki farsi» režysiora Vadzima Pierelmana. Karcinu vyłučyli na premiju «Oskar» 2021 hoda ad Biełarusi. Ale na premjeru chadziła tolki maci Uładzisłava, sam jon z 14 žniŭnia 2020-ha znachodzicca za kratami.
U 2020 hodzie Uładzisłaŭ staŭ vałancioram štaba Viktara Babaryki. Chłopiec źbiraŭ za jaho podpisy. Praz šeść dzion paśla prezidenckich vybaraŭ Uładzisłava razam ź inšymi vałanciorami — Iharam Jarmołavym, Mikałajem Sasievym, Dźmitryjem Kanapielkam —zatrymali ŭ ramkach spravy ab masavych biesparadkach.
Uładzisłava i astatnich abvinavačvali pavodle dvuch kryminalnych artykułach — č. 2 art. 293 («Udzieł u masavych biesparadkach»), č. 3 art. 293 («Navučańnie abo inšaja padrychtoŭka asob da ŭdziełu ŭ masavych biesparadkach, abo finansavańnie hetaj dziejnaści»).
Dziaržabvinavačańnie śćviardžała, što kožny z čaćviarych «mieŭ namier asabista ŭdzielničać u masavych biesparadkach, častkova pradastaviŭ nieŭstanoŭlenym asobam ź liku ŭdzielnikaŭ masavych biesparadkaŭ u metach prymianieńnia ŭkazanyja vyšej pradmiety».
Pradmietami, jakija na dumku abvinavaŭcaŭ pavinny byli stać pryładami złačynstvaŭ, źjaŭlajucca dva ślasarnyja małatočki, nie mienš jak 90 łaziernych ukazak, dźvie zapalnički, dva piratechničnyja vyraby.
Advakaty abvinavačanych nastojvali, što sami łaziernyja ŭkazki nie mohuć być zbrojaj, tamu što nie adpaviadajuć aznačeńniu hetaha termina, adznačanamu ŭ artykule 1 zakona «Ab masavych mierapryjemstvach u RB». Tam skazana, što zbroja — heta pryłady i pradmiety kanstruktyŭna pryznačanyja dla paražeńnia žyvoj ci inšaj celi. A ŭkazki nie mohuć ich paražać, pryčyniać cialesnyja paškodžańni ci jakim-niebudź inšym čynam być pryładaj uzbrojenaha supracivu.
Sudździa Śviatłana Bandarenka vyrašyła zadavolić zapyt staršaha pamočnika prakurora Maskoŭskaha rajona Minska Ramana Biziuka i pryznać usich čaćviarych vinavatymi. Kožnamu prysudzili pa 5 hadoŭ pazbaŭleńnia voli z adbyvańniem u kałonii ŭzmocnienaha režymu.
Uładzisłaŭ Karecki ciapier adbyvaje pakarańnie ŭ papraŭčaj kałonii №1 u Navapołacku.
Jaho maci raskazała prajektu «1906», pra što piša chłopiec joj ŭ listach i jak jana tryvaje bieź jaho ŭžo dva hady.
«6 vieraśnia musiła być sustreča ź im. Za dzień da hetaha ja patelefanavała ŭ kałoniju, mnie skazali, što jon u niejkim štrafnym atradzie. Mužu adkazali, što jon u ŠIZA.
Nasamreč, usio było inakš: 5 vieraśnia jon vyjšaŭ adtul, 6-ha jon nas čakaŭ ceły dzień. Spadziavaŭsia, što my pryjedziem. Pra heta jon napisaŭ u liście», — raskazvaje maci palitviaźnia Iryna.
Za leta ad Uładzisłava joj prapuścili tolki 5 listoŭ.
Kolki razoŭ chłopiec byŭ u ŠIZA, nieviadoma.
«22 červienia mnie treba było addać jamu pieradaču. Znoŭ nie ŭdałosia, tamu jon znoŭ byŭ u ŠIZA. Potym jon mnie patelefanavaŭ i skazaŭ pryjazdžać 8 ci 17 lipienia.
My patelefanavali 7-ha ŭ kałoniju, nam adkazali, što jon u ŠIZA. I 17-ha jon znoŭ tam byŭ. Moža, jaho vypuskali adtul na paru dzion, — nie viedaju.
U toj dzień, 22 červienia, ja chacieła trapić da načalnika kałonii. Mianie nie puścili, skazali pisać zajavu i tady budzie sustreča ź im. Toje, što ad Minska heta 300 kiłamietraŭ, a ja invalid — heta nikoha nie chvaluje», — kaža jana.
Letam Uładzisłaŭ pisaŭ maci, što jaho pieraviaduć «u inšuju turmu z žorstkimi ŭmovami».
«Nakolki ja viedaju ad inšych ludziej, palityčnych u takich turmach vielmi mocna prasujuć, — raskazvaje žančyna. — Jon mnie ŭ listach piša, što ŭsio narmalna, ale ja razumieju, što nie.
Jon nie tłumačyŭ, za što jaho ŭvieś čas sadziać u ŠIZA. Takoje ŭ liście nie napišaš. Viedaju, što tam karajuć za absalutna drobiaznyja rečy: nie tudy pastaviŭ kubak, nie zašpiliŭ adzieńnie.
Čałavieka, jaki prachodziŭ razam z Uładam pa hetaj spravie, taksama rezka pieraviali ŭ kałoniju ŭ Vićbie. Baćki miesiac nie mahli nijak ź im źviazacca, a potym pryjšoŭ list».
Apošniaje spatkańnie u Iryny z synam było 5 krasavika ŭ haścinicy pry kałonii.
«Nie mahu skazać, što tam ludzi byli niejkija žorstkija. Naadvarot, jany bolš-mienš łajalna da nas stavilisia. Haścinica, u jakoj my z synam u kałonii sustrakalisia, vielmi prystojnaja. Nie adčuvała, što znachodžusia ŭ turmie.
U nas było šmat razmoŭ u toj dzień. Jon pytaŭsia pra siabroŭ. Raskazvała jamu, što ŭ ich, u našych blizkich. Pra niešta inšaje nie havaryli, tamu što ja vydatna razumieła, što lišniaha kazać nielha», — uspaminaje maci.
«Naša Niva» źviarnułasia da pravaabaroncy Paŭła Sapiełki. Jon patłumačyŭ, chto niasie adkaznaść za źmiaščeńnie źniavolenaha ŭ ŠIZA.
«Nijakich normaŭ, kolki čałavieka mohuć trymać tam, kolki razoŭ jaho tudy mohuć sadzić za niejki čas, nie isnuje, — kaža jon. — Naprykład, prabyŭ 15 sutak, adviali na ahlad da doktara i znoŭ pasadzili ŭ ŠIZA.
Pa kryminalna-vykanaŭčym kodeksie jość tolki praviła, što pamier samoha spahnańnia pavinien być u miežach 15 sutak. Ich pryznačajuć prosta adny za adnymi.
U takim režymie siadzieŭ były palitviazień Michaś Žamčužny.
Źmiaščajuć tudy za parušeńnie ŭnutranaha rasparadku. Dalej administracyja vybiraje spahnańnie, jakoje adpaviadaje ciažkaści ŭčynku. Na adny i tyja ž dziejańni asudžanych mohuć reahavać pa-roznamu.
Adkaznaść za heta niasie administracyja kałonii, za źmiaščeńnie ŭ ŠIZA — jaje načalnik ci namieśnik», — kaža pravaabaronca.
Ci moža z časam toje, što robiać z palitźniavolenymi ŭ łukašenkaŭskich turmach, sudom być pryznanaje katavańniami?
Heta stanie jasna paśla vychadu palitviaźniaŭ na svabodu, kali ŭdasca sabrać bolš śviedčańniaŭ.
«Jak minimum tut možna kazać pra žorstkaje, biesčałaviečnaje staŭleńnie», — kaža Pavieł Sapiełka.
Čytajcie taksama:
«Pieršaja piaciorka»: chto tyja biełarusy, jakich buduć sudzić zavočna
Zatrymali jašče adnaho byłoha siłavika
Suprać śpiavački Meryjem Hierasimienka ŭsio ž zaviali kryminalnuju spravu i źniali ź joj videa
«Bolš za ŭsio paskudstvaŭ pryčyniaje jaŭrejonyš». Dziciačaja doktarka ź Minska šakavała antysiemickimi vykazvańniami36
Kamientary