Muzykantku z Mazyra pasadzili za niehatyŭnyja vykazvańni pra milicyju
Homielski abłasny sud 16 listapada vynies prysud palitźniavolenaj z Mazyra Kryścinie Čarankovaj. Dziaŭčynu abvinavacili ŭ raspalvańni sacyjalnaj varožaści pavodle č. 1 art. 130 Kryminalnaha kodeksa, paviedamlaje «Viasna».
Sudovy praces vioŭ sudździa Alaksiej Chłyščankoŭ.
Kryścinu Čarankovu zatrymali 22 sakavika ŭ Mazyry ŭ miežach kryminalnaj spravy za niekalki pastoŭ u instahram-akaŭncie, što mieŭ 15 tysiač padpisčykaŭ. U im Kryścina publikavała fatahrafii, pryśviečanyja subkulturnaj modzie, nie chavała svaich palityčnych pohladaŭ. A paśla napadu Pucina na Ukrainu jana vykarystoŭvała svoj akaŭnt dla vykazvańnia antyvajennych łozunhaŭ.
U homielskim SIZA-3 dziaŭčynu pastavili na ŭlik jak «schilnuju da ekstremizmu».
U pieršy dzień suda 10 listapada Kryścina admoviłasia davać pakazańni, tamu na sudzie začytali jaje śviedčańni na dopytach.
Abvinavačanaja patłumačyła, što ŭ žniŭni 2020 hoda milicyja zatrymała baćkoŭ jaje muža, ich bili. Tamu jana pačała niehatyŭna stavicca i pisać pra milicyju.
Na sud vyklikali ekśpiertku. Taja musiła patłumačyć, što aznačajuć niekatoryja vyrazy. Ekśpiertka zaznačyła, što pad słovam «musora» majucca na ŭvazie supracoŭniki milicyi, słova maje niehatyŭnuju afarboŭku, źjaŭlajecca pahardlivym, jano jość u słoŭniku ruskaj movy Ožahava. A voś pra ličby «1312» ekśpiert ničoha nie mahła patłumačyć, bo nie viedała ich sensu.
Siońnia ŭ sudovym pasiadžeńni Kryścina vystupiła z apošnim słovam.
Sud pryznaŭ jaje vinavataj i pryznačyŭ pakarańnie ŭ vyhladzie pazbaŭleńnia voli terminam na dva z pałovaj hady va ŭmovach ahulnaha režymu. Pradstaŭnik abvinavačańnia na papiarednim sudovym pasiadžeńni zapatrabavaŭ bolej — try hady pazbaŭleńnia voli.
Padtrymajcie Kryścinu: SIZA №3. 246003, Homiel, Knižnaja, 1A, Kryścina Alaksandraŭna Čarankova.
Ciapier čytajuć
Daišnik, jakoha źbiŭ mašynaj piensijanier pad Minskam, pamior u balnicy. Jamu zładzili pyšnaje pachavańnie18
Kamientary