Pamierła śpiavačka i adzinaje dzicia «karala rok-n-roła» Liza Mary Preśli. Joj było 54 hady. Da hetaha jana była dastaŭlena ŭ balnicu paśla spynieńnia serca, paviedamlajuć amierykanskija ŚMI.
Jak paviedamlaje vydańnie TMZ, 54-hadovaja dačka Ełvisa Preśli była znojdzienaja biez prytomnaści ŭ svaim domie ŭ Kalifornii. Paviedamlajecca, što ŭ śpiavački spyniłasia serca, i joj byŭ zrobleny ŭkoł adrenalinu, kab adnavić puls, piša Bi-bi-si.
Paźniej maci Lizy Mary Pryscyła Preśli paćvierdziła, što jaje dačka pamierła. «Ź vielizarnym bolem ja vymušana paviedamić žachlivuju navinu, što maja cudoŭnaja dačka Liza Mary nas pakinuła», — skazała jana. Pryscyła Preśli nie paviedamiła pra pryčyny śmierci dački.
Liza Mary Preśli naradziłasia ŭ 1968 hodzie ŭ Miemfisie i stała adzinaj spadčyńnicaj svajho baćki va ŭzroście dzieviaci hadoŭ, kali Ełvis raptoŭna pamior.
U 2003 hodzie jana vypuściła pieršy solny albom To Whom It May Concern, jaki razyšoŭsia nakładam niekalki sotniaŭ tysiač asobnikaŭ i byŭ niadrenna sustrety krytykami. U 2005 hodzie vyjšaŭ jaje druhi albom Now What, a ŭ 2012-m — treci i apošni Storm and Grace.
Liza Mary Preśli była zamužam čatyry razy.
U 1994 hodzie jana vyjšła zamuž za śpievaka Majkła Džeksana, heta adbyłosia ŭsiaho praz 20 dzion paśla razvodu ź jaje pieršym mužam — śpievakom Deni Kia. U 1996-m, kali Džeksan zmahaŭsia suprać abvinavačvańniaŭ u seksualnym hvałcie nad dziećmi, jany raźvialisia.
U 2002 hodzie jana vyjšła zamuž za akciora Nikałasa Kiejdža, jaki byŭ vialikim prychilnikam jaje baćki. Ale Kiejdž padaŭ na razvod usiaho praz čatyry miesiacy paśla viasiella.
Čaćviorty šlub Lizy Mary Preśli — ź jaje hitarystam i muzyčnym pradziusaram Majkłam Łokvudam — skončyŭsia razvodam u 2021 hodzie.
U jaje było troje dziaciej, adzin ź jakich (Biendžamin Kia) skončyŭ žyćcio samahubstvam u 2020 hodzie.
Apošni raz Liza Mary Preśli źjaŭlałasia na publicy ŭ aŭtorak padčas cyrymonii ŭručeńnia «Załatych hłobusaŭ» u Łos-Andželesie.
Tady jana razam sa svajoj maci sa ślazami na vačach nazirała za tym, jak Ościn Batler atrymaŭ pryz, syhraŭšy jaje baćku, za najlepšuju mužčynskuju rolu ŭ filmie «Ełvis» Baza Łurmana.
Padčas cyrymonii akcior padziakavaŭ siamji Ełvisa Preśli za dapamohu ŭ pracy nad bajopikam.
«Dziakuj vam vialiki za toje, što adkryli dla mianie svaje serca, svaje ŭspaminy i svoj dom, — skazaŭ Batler. — Liza Mary, Pryscyła, budu vas lubić zaŭsiody!»
Jakija źviestki pra nas zachoŭvaje Telegram i što moža źmianicca dla karystalnikaŭ, kali jon stanie raskryvać ich śpiecsłužbam?2
Kamientary