Raźviedka Estonii: Pucin ciahnie čas, miarkujučy, što Ukraina i Zachad źniasilacca raniej, čym Rasija
Pucin miarkuje, što čas — na jaho baku ŭ vajnie suprać Ukrainy, bo ŭ Rasii dastatkova resursaŭ dla padsiłkoŭvańnia vajennaj mašyny. Pra heta paviedamlaje Bloomberg sa spasyłkaj na spravazdaču Słužby zamiežnaj raźviedki Estonii. Taksama ŭ raźviedcy ličać, što rasijskija elity całkam razumiejuć nieadekvatnaść Pucina, adnak bajacca dziejničać. Adzinyja, chto hatovy zmahacca, — radykały kštałtu Pryhožyna i Kadyrava.
U spravazdačy havorycca, što, niahledziačy na niaŭdačy Rasii ŭ pieršy hod uvarvańnia i na toje, što jana naŭrad ci dasiahnie «jakasnaha skačka» ŭ svajoj zdolnaści vieści vajnu, Pucin nie spynicca. Rasijski prezident pierakanany, što zmoža bombami prymusić Ukrainu sieści za stoł pieramovaŭ.
Klučavy faktar dla jaho heta pasłableńnie padtrymki Ukrainy z boku sajuźnikaŭ, takich jak ZŠA i NATA.
Adznačajecca, što, choć rasijskich vajennych stratehaŭ i ahałomšyła zdolnaść Ukrainy abaraniacca, a taksama maštaby sankcyj ZŠA i ES, urad Pucina ŭsio ž nie demanstruje prykmiet słabaści i całkam zdolny razharnuć instrumienty «prapahandysckaha impieryjalizmu».
Pry hetym rasijskaja elita ŭsio bolš zaniepakojenaja tym, što Pucin «straciŭ rozum, ale bolšaści ź ich nie chapaje mužnaści zrabić realnyja kroki da pieramien», havorycca ŭ spravazdačy.
U patencyjnaj postpucinskaj Rasii niama nivodnaj značnaj hrupoŭki, jakaja padzialała b demakratyčnyja kaštoŭnaści, zatoje za ŭładu zmahajucca kiraŭniki «radykalnych» frakcyj, takija jak Jaŭhien Pryhožyn, jaki kantraluje najomnikaŭ hrupoŭki Vahniera, i kiraŭnik bajevikoŭ u Čačni Ramzan Kadyraŭ.
Estonskija raźviedčyki nazvali aŭtarytarny režym Pucina Savieckim sajuzam 2.0, u jakim na haryzoncie «niama novaha Harbačova, nie kažučy ŭžo pra Jelcyna».
Aŭtary dakładu zaniepakojenyja tym, što ŭvarvańnie pavysiła ryzyku vajennaha kanfliktu ŭ krainach Bałtyi, bo dalejšaja mabilizacyja i zapłanavanyja maštabnyja rasijskija vajennyja vučeńni, jakija adbuducca sioleta, jak čakajecca, uzmocniać napružanaść na ŭschodnim fłanhu NATA.
Razhladajučy krainy Bałtyi jak samy ŭraźlivy rehijon u NATA, Rasija «ź vialikaj imaviernaściu» daść pryjarytet adnaŭleńniu svaich uzbrojenych sił pablizu Estonii. Adznačajecca, što heta moža zaniać da čatyroch hadoŭ.
Ciapier čytajuć
«Ciapier mnie čužaja sama kancepcyja ŭžyć niešta, čaho ty nie viedaješ». Vialikaja hutarka ź Ivanam Šyłam pra biznes, zarablańnie z dapamohaj ŠI, žančyn i botaks5
Kamientary