Sienat EHU razhledzieŭ list palitołahaŭ

28 kastryčnika adbyłosia pasiedžańnie Sienata EHU, na jakim razhladaŭsia adkryty list hrupy palitołahaŭ — vykładčykaŭ departamienta palitałohii Jeŭrapiejskaha humanitarnaha univiersiteta: Andreja Kazakieviča, Andreja Jahorava, Siarhieja Bohdana, Dzianisa Mieljancova, Alaksieja Dziermanta, Taćciany Čyžovaj i Taćciany Vadałažskaj.

U liście zhadanyja asoby abvinavačvali kiraŭnictva univiersiteta ŭ hrubym parušeńni «dekłaravanych EHU pryncypaŭ akademičnych svabod i samakiravańnia» i zajaŭlali ŭ suviazi z hetym «ab prypynieńni svajho ŭdziełu ŭ navučalnym pracesie da tych časoŭ, pakul hetyja rašeńni nie buduć pierahledžanyja, a pracedury pryznačeńnia słužbovych asob nie buduć pryviedzienyja ŭ adpaviednaść z dekłaravanymi pryncypami akademičnych svabod».

Pa słovach staršyni Sienata EHU, Paŭła Cieraškoviča, 1‑ha kastryčnika jon atrymaŭ list, padpisany hrupaj asobaŭ. «Ja asabista ŭziaŭ adkaznaść za jaho razhlad. U liście aŭtary vyrazili niazhodu z kadravymi pryznačeńniami na departamiencie palitałohii. Prypynili navučalny praces i zajavili, što adnoviać pracu pry ŭmovie kali Sienat zadavolić ich patrabavańni» — raspavieŭ «NN» spadar Cieraškovič.

Jon taksama adznačyŭ, što pasiedžańnie Sienata było adkrytym — na im prysutničali pradstaŭniki ŚMI, vykładčyki EHU, studenty i pradstaŭnik aŭtaraŭ lista — Andrej Jahoraŭ.

Pavodle P.Cieraškoviča, abmierkavańnie było vostrym. Usie prysutnyja mahli vykazać svaju dumku. Sienat paličyŭ, što kadravyja pryznačeńni na departamiencie palitałohii byli zroblenyja ŭ adpaviednaści sa statutam univiersiteta. Było taksama vyrašana adpravić aŭtaram lista aficyjny adkaz. Na momant atrymańnia zajavy Sienatam, u ich nie było nijakich damovaŭ ab pracy ź EHU. Sienat vykazaŭ škadavańnie z nahody taho, što adbyłosia. Było padkreślena, što aŭtary lista nie vykarystali pracedury vyrašeńnia kanfliktnych situacyj EHU. A taksama parušyli prafiesijnuju etyku pry aśviatleńni padziei u ŚMI» — adznačyŭ spadar Cieraškovič.

Adzin z padpisantaŭ adkrytaha lista — Dzianis Mieljancoŭ — tak prakamientavaŭ u razmovie z «NN» pasiedžańnie Sienata EHU: «Sienat faktyčna ŭchiliŭsia ad vyrašeńnia kanflikta. Pakolki sam fakt isnavańnia kanflikta tak i nie byŭ pryznany. Niama kanflikta — niama z kim i razmaŭlać. Hety list patraktavali jak list ad pryvatnych asob. A pierahladu spravy nie budzie — bo toje nie ŭ kampietencyi Sienata». Dz.Mieljancoŭ taksama zaznačyŭ, što «siońniašniaja administracyja EHU nie zacikaŭlenaja ŭ isnavańni salidarna dziejučych supolnaściaŭ va ŭniviersitecie. Usio zvodzicca da traktavańnia Statuta».

Niejtralnuju pazicyju ŭ sprečcy pamiž hrupaj palitołahaŭ i administracyjaj EHU pasprabavała zaniać studenckaja supolnaść.

Pradstaŭnik studentaŭ u Sienacie, Jaŭhien Hładki, zaznačyŭ, što «heta składanaja situacyja, kanfliktnaja. My sprabavali vyśvietlić, što adbyłosia, znajści placoŭku dla parazumieńnia. My nie padtrymlivali niejki bok. Adnak skłałasia ŭražańnie, što vykładčykam univiersiteta było ŭsio adno, jany ničoha nie rabili. Voś što było prykra. Vykładčyki mahli b bolš zrabić, kab razabracca ŭ situacyi.» Razam z tym, Jaŭhien Hładki adznačyŭ i nizkuju zacikaŭlenaść studentaŭ departamientu palitałohii skłaŭšajsia situacyjaj. «Ja asabista razasłaŭ infarmacyju pra pasiedžańnie Sienata i jaho temu. Studentam troch kursaŭ. Heta 50‑60 čałaviek. Ź ich na pasiedžańnie Sienata pryjšło 8‑9, plus niekalki čałaviek ź inšych departamientaŭ. Heta pakazalnik, pa‑mojmu» — tak prakamientavaŭ aktyŭnaść studentaŭ Ja.Hładki.

Nahadajem, što ŭ vieraśni hrupa vykładčykaŭ departamienta palitałohii EHU vykazała niazhodu z pryznačeńniem kiraŭnictva departamienta i abviaściła ab mahčymaści svajho sychodu z univiersiteta. Pavodle ich viersii, adbyłosia parušeńnie akademičnych svabod, nieabchodnych dla dziejnaści navučalnaj ustanovy.

• 0
• 0
• 0
• 0
• 0
• 0
• 0
• 0