«Mahčyma, heta ŭžo nie A-50, a banalny Ił-76». Vajskovy ekśpiert aceńvaje, u jakim stanie moža być rasijski samalot paśla dyviersii
Siońnia rasijski samalot A-50, jaki ŭčora prapahandysty pakazvali «cełym», palacieŭ u Rasiju. Ukrainski vajskova-palityčny ahladalnik Alaksandr Kavalenka ŭ kamientaryi «Našaj Nivie» razvažaje, u jakim stanie moža być samalot i nakolki 200 hramaŭ vybuchoŭki, pra jakija kazaŭ «Bajpoł», mahli jaho paškodzić.
Pavodle infarmacyi «Biełaruskaha Hajuna», samalot A-50, jaki niadaŭna, vierahodna, paškodzili biełaruskija partyzany, nakiroŭvajecca na 325-y Avijacyjny ramontny zavod, jaki znachodzicca ŭ Tahanrohu. Mienavita jon źjaŭlajecca pradpryjemstvam, jakoje ŭ tym liku zajmajecca ramontam ahrehataŭ samalotaŭ A-50.
Ekśpiert adznačaje, što mahčymaść palotu paśla naniasieńnia paškodžańniaŭ, pra jakija zajaŭlaŭ «Bajpoł», u A-50 mahła całkam zachavacca.
«Učora my bačyli, jak jon ruluje pa ŭźlotna-pasadačnaj pałasie, i faktyčna heta kaža pra toje, što mahčymaści kiravańnia hetym samalotam u ekipaža jość.
Inšaje pytańnie, ci maje jon mahčymaść vykonvać svaje asnoŭnyja funkcyi — dalokaha radyjorełakacyjnaha vyjaŭleńnia i kiravańnia. Kali hety kompleks atrymaŭ paškodžańni, navat nie niejkija hłabalnyja, a zusim nievialičkija, jakija źniešnie možna i nie ŭbačyć, to heta ŭžo nie A-50, a banalny Ił-76», — vobrazna paraŭnaŭ Alaksandr Kavalenka toje, što raźviedavalny samalot ciapier, mahčyma, prydatny tolki dla transparciroŭki.
Vybuchoŭki masaj navat da 200 hramaŭ dastatkova, kab nanieści paškodžańni, paśla jakich samalot budzie patrabavać ramontu, tłumačyć vajskovy ekpiert.
«Rasijanie dobra razumiejuć, što kali jany ciapier vyvieduć A-50 z terytoryi Biełarusi ŭ Rasiju, na ramontny zavod, usie heta ŭbačać. Heta budzie zafiksavana. I paćvierdzicca, što apieracyja pa naniasieńni ŭdaraŭ pa A-50 była paśpiachovaj», — miarkuje jon.
Jak drony, jakija nanosili paškodžańni, mahli trapić na terytoryju aeradroma, jaki achoŭvajecca?
«My ciapier bačym, jak pastajanna na terytoryi Rasii niešta adbyvajecca. Naprykład, incydent u Enhielsie. Tady ŭ hetym abvinavacili Ukrainu, chacia jana znachodzicca ad hetaha horada za 800 kiłamietraŭ. Jość ža ŭstalavanaje SPA, na aeradromie ŭ Mačuliščach taksama. Ale što zabaraniaje jaje abminać?
Paŭnamaštabnaja vajna va Ukrainie prademanstravała toje, nakolki, nasamreč, małaefiektyŭnaja rasijskaja SPA. Jana nie vykonvaje całkam svaje funkcyi, a jaje charaktarystyki značna zavyšanyja. Tamu ja nie sumniavajusia, što toj ci inšy dron maje ŭsie mahčymaści abminać rasijskuju SPA (a ŭ Biełarusi staić taksama jana), i ździajśniać takim čynam naloty na abjekty», — padsumoŭvaje Alaksandr Kavalenka.
Kiraŭnik «Bajpoł» Alaksandr Azaraŭ prakamientavaŭ «Jeŭraradyjo» siońniašni ŭźlot rasijskaha A-50, paškodžanaha ŭ Mačuliščach biełaruskimi partyzanami.
«Metaj ataki byli antena i abstalavańnie. Uźlot nie kaža pra pracu abstalavańnia. Kryły i ruchaviki nie byli paškodžanyja».
Kamientary