«Škaduju, što jana nie paśpieła ŭziać jaje ŭ ruki». Pradali 15000 ekzemplaraŭ knihi Nadziei Mialeški, jakaja zmahałasia z ankałohijaj
Muž Nadziei Mialeški, były chakieist zbornaj Biełarusi Dźmitryj Mialeška apublikavaŭ na staroncy Nadziei ŭ instahramie raniej napisany joju post, prymierkavany da vychadu knihi, jakuju jana nie paśpieła pabačyć.
«Ja paśpieła. Maja kniha «Ranica nadychodzić zaŭsiody» ŭbačyła śviet. Hety post byŭ napisany daŭno i čakaŭ svajoj hadziny, kali kožny čałaviek zmoža ŭziać u ruki «Knihu Nadziei» i znajści tam niešta kaštoŭnaje dla siabie. U druk jana pojdzie, chutčej za ŭsio, užo bieź mianie…
Viedajecie, pra što ja maru? Kab vy ŭziali ŭ ruki hetuju knihu i napoŭnilisia. Prahaj žyć i tvaryć, maryć šyroka i dziejničać śmieła», — pisała Nadzieja.
Jana mierkavała, što jaje kniha — «pra ščaście nasupierak usiamu i pra vielizarnaje kachańnie da hetaha dziŭnaha žyćcia».
Dźmitryj Mialeška patłumačyŭ, što hety post Nadzieja napisała paśla pračytańnia źviarstanaj knihi, jakuju ŭ elektronnym vyhladzie joj dasłała vydaviectva.
Pavodle jaho, tyraž bolš jak u 15000 asobnikaŭ užo amal skončyŭsia, ale novaja partyja voś-voś pastupić u prodaž.
Nadzieja Mialeška, papularnaja biełaruskaja błohierka, pamierła miesiac tamu. U studzieni 2020 hoda ŭ jaje vyjavili rak hrudziej treciaj stadyi. Nadzieja stvaryła dabračynny fond u padtrymku ankachvorych.
Usio zdaryłasia na Novy hod. Śmierć samaj publičnaj supracoŭnicy minskaha AMAPa dahetul pakidaje pytańni17
Kamientary