Kali nadychodzić čas šukać zamienu spartovym arenam, niekatoryja atlety vybirajuć šlach na TB. «Naša Niva» raskazvaje pra tych, chto niekali prynosiŭ krainie miedali, a ciapier milhaje na łukašenkaŭskich kanałach.
Luboŭ Čarkašyna («Naša ranica», ANT)
35-hadovaja Čarkašyna ŭ svoj čas była adnoj z topavych biełaruskich himnastak. Bieraściejka pryvoziła miedali z čempijanataŭ Jeŭropy i śvietu, a letam 2012 hoda vyjhrała ŭ Łondanie bronzu Alimpijady, prajhraŭšy tady tolki dźvium rasijankam — Jaŭhienii Kanajevaj i Darji Dźmitryjevaj. Nahadajem, što da dyskvalifikacyi rasijskich spartsmienaŭ ź mižnarodnych spabornictvaŭ tyja ličylisia ŭ mastackaj himnastycy praktyčna niepieramožnymi.
Luboŭ syšła ź vialikaha sportu ŭ kancy 2012 hoda. Eks-himnastka znajšła siabie ŭ trenierstvie: ciapier jana — staršaja trenierka biełaruskaj zbornaj pa mastackaj himnastycy, a taksama člen vykankama Nacyjanalnaha alimpijskaha kamiteta.
Znachodziačysia ŭ sistemie dziaržsportu, Čarkašyna demanstruje joj svaju łajalnaść. Naprykład, u 2015-m hodzie jana stała davieranaj asobaj Łukašenki na prezidenckich vybarach, a paśla prysutničała na jaho inaŭhuracyi. Paśla 2020-ha žančyna taksama siabie prajaviła — zhadajem chacia b jaje podpis pad adkrytym praŭładnym listom spartoŭcaŭ, a taksama toje, što jašče sa śniežnia 2020-ha čynoŭnica pad sankcyjami jak adna z členaŭ vykankama NAK.
Viadoma, nie ŭsie biełarusy zhodnyja z takim mierkavańniem svajoj byłoj zorki. Niekatoryja dachodziać i da chejtu ŭ jaje adras, i Čarkašyna pryznavałasia: takija kamientary čyścić, ale nie zabyvaje rabić ich skrynšoty, i jany nibyta «čakajuć svajho času».
U sakaviku minułaha hoda Čarkašyna dałučyłasia da kamandy «Našaj ranicy», što na ANT. Eks-himnastka viadzie vypuski, što vychodziać pa subotach, i novaja praca joj pryjšłasia daspadoby: «Mnie vielmi padabajecca farmat prahramy. Da mianie ŭ studyju prychodziać hości z absalutna roznych śfier, i heta tak zdorava!»
Luboŭ Čarkašyna ŭ toj ža čas zastajecca adnoj z trenierak nacyjanalnaj zbornaj pa himnastycy. Hetaksama, jak jaje padnačalenyja, žančyna pieražyvaje nastupstvy spartovych sankcyj u adras Biełarusi — za saŭdzieł łukašenkaŭcaŭ u vajnie va Ukrainie biełaruskija atlety adchilenyja ad mižnarodnych turniraŭ šmat u jakich vidach sportu. Padpisantka praŭładnaha lista vydała nakont hetaha šmat pieražyvańniaŭ: «Dziaŭčatki [sa zbornaj] sačyli za tranślacyjami [čempijanatu śvietu pa himnastycy], i niekatoryja hetymi dniami ź ciažkaściu prymušali siabie vychodzić na treniroŭki. Vielmi razdražniała razumieńnie, što ty moh i pavinien byŭ zaraz być tam i zmahacca za miedali. Hetyja dumki z hałavy vyhnać niemahčyma. Kryŭdna ŭśviedamlać, što himnastki, jakija hatovyja pakazvać na suśvietnym dyvanie cudoŭnyja vaŭ-efiekty, na čempijanat nie dapuščany».
Jaŭhien Hutarovič (VeloLove, «Biełaruś 5»)
Niekali biełaruski viełasport niabłaha vyhladaŭ na suśvietnym uzroŭni, i Hutarovič byŭ adnym z tych, chto rabiŭ jamu słavu. Praŭda, u adroźnieńnie ad bolš zornych Cylinskaj ci Kiryjenki, Jaŭhien pryvoziŭ miedali z turniraŭ druhoha ešałona, a voś na vialikich honkach nakštałt «Tur de Frans» ci «Vuelty» jon ni razu nie trapiŭ navat u vynikovyja top-100.
Amal usiu karjeru Hutarovič pravioŭ u Francyi, ale ŭ 2016-m hodzie, kali jamu było 32 hady, syšoŭ na adpačynak i viarnuŭsia na radzimu. Ciapier eks-honščyk pracuje trenieram u viełakłubie «Minsk» i asistuje tam ža spartovamu dyrektaru, a taksama viadzie maleńkuju pieradačku VeloLove na «Biełaruś 5» — viadoma, pra viełasport.
Ciapier vyjšła ŭžo dva siezony prahramy. Samy papularny na Youtube vypusk nabraŭ 3100 prahladaŭ, u im zorka biełaruskaha viełasportu Jaŭhien Karalok spaborničaje na rovary ź viadomym aŭtahonščykam Siarhiejem Viazovičam na elektrakary — i naadvarot.
Hutarovič — nie nadta vialiki amatar publičnych vykazvańniaŭ, tym bolš na hramadska značnyja temy, ale ž temu spartovych sankcyj jon nie abyšoŭ bokam. Sankcyi Jaŭhien pradkazalna nie ŭchvalaje, adnak śćviardžaje, što biełaruskamu sportu jany tolki na karyść:
«Heta podła. Što da spartsmiena piersanalna, jon pryjšoŭ u 11 hadoŭ zajmacca sportam, usio žyćcio jamu addaŭ i, uvohule, rychtavaŭsia da niejkich peŭnych spabornictvaŭ, da Alimpijskich hulniaŭ, čempijanataŭ śvietu ci Jeŭropy. Padvodziŭ siabie na praciahu 15—20 hadoŭ da niejkaj, moža, adnoj-adzinaj honki ŭ svaim žyćci, kab u joj pieramahčy, a ŭ jaho skrali hetuju mahčymaść. Ale pry hetym, biezumoŭna, u nas kankurencyja stanovicca bolš jarkaj, vyšejšaj».
Kaciaryna Vandarjeva («Naviny sportu», STB)
Tajbaksiorcy Vandarjevaj niekali dali mianušku Barbi, namiakajučy na jaje lalečna pryhožuju źniešnaść. Adnak bjecca hetaja Barbi nie pa-kazačnamu: Kaciaryna — nieadnarazovaja čempijonka śvietu i Jeŭropy, a taksama pieramožca šmatlikich inšych turniraŭ. U krasaviku atletka apublikavała ŭ instahramie fota sa zdymačnaj placoŭki ekstremalnaha realici-šou na BT «Hieroi. Pierazahruzka» — jaho minuły siezon viała ŭnučka Alaksandra Łukašenki Darja.
Sama ž Kaciaryna viadzie naviny sportu, što vychodziać na kanale STB. Pra svaju pracu jana kaža z adčuvalnym zadavalnieńniem: «Dla mianie hetaja prapanova [papracavać na telebačańni] stała niečakanaściu. Usie, chto mianie viedaje, u kursie, što razmaŭlaju ja jak zvyčajnaja spartoŭka — na zvykłym dla nas žarhonie. Raniej nie ŭjaŭlała siabie televiadučaj, ale zaraz tyja, chto hladzić, kažuć: «U ciabie tak vydatna atrymlivajecca, my nie vierym, što ty tak havoryš». I heta pry tym, što ja nie prachodziła nijakich kursaŭ i nidzie hetamu nie vučyłasia. Usio pryjšło z praktykaj. Ja atrymlivaju asałodu ad hetaj pracy. Mnie, jak spartsmiency, padabajecca, kali našy pieramahajuć. Viedaju, što adčuvaje spartoviec u hety momant i tamu nie čytaju banalna, a imknusia danieści emocyi i sens».
Ksienija Sankovič (rubryka ŭ «Našaj ranicy», ANT)
Hetaja eks-himnastka brała bronzu AH-2008 i srebra AH-2012, abodva razy ŭ hrupavym šmatborji. U adnoj zbornaj ź joj spaborničała Natalla Leščyk, adna sa spartovak, jakaja paśla pratestaŭ-2020 adkryta vykazałasia suprać hvałtu i źjechała za miažu.
Sankovič pajšła zusim inšym šlacham. Jana padpisała adkryty praŭładny list spartoŭcaŭ, zajmaje salidnuju pasadu ŭ NAK (vykonvaje abaviazki hiensaka), a taksama rehularna naviedvaje praŭładnyja mierapryjemstvy: voś, naprykład, Sankovič na navahodnim bali z Alaksandram Łukašenkam, a voś jana biažyć na Minskaj łyžni ŭ adnoj kamandzie ź Viktaram Łukašenkam — i heta daloka nie poŭny śpis. I, viadoma, u 2019 hodzie Ksienija razam ź inšymi dziaŭčatami źbirała kavuny z Alaksandram Łukašenkam — tyja fota «kavunovaha bataljona» šyroka razyšlisia ŭ siecivie.
Razam z hetym niekalki hadoŭ tamu Sankovič źjaviłasia na ANT. U eks-himnastki pačała vychodzić svaja rubryka ŭ telešou «Naša ranica», dzie jana stała vučyć hledačoŭ zaradcy. Niekali hetym ža ŭ teleefiry zajmałasia vybitnaja Mielicina Staniuta, ale hetaja eks-himnastka, u adroźnieńnie ad Sankovič, vystupiła za narod. Sankovič ža, zhodna ź jaje profilem u instahramie, i dahetul zastajecca viadučaj na ANT.
«Naša Niva» — bastyjon biełaruščyny
PADTRYMAĆ«Nie ŭjaŭlaju, jak adčuvajuć siabie ludzi, jakija śviadoma žyvuć pry Łukašenku 26 hadoŭ». Hutarka z alimpijskaj pryziorkaj pa mastackaj himnastycy, jakaja asudziła hvałt i represii
Čarkašyna patłumačyła, navošta pajšła ŭ davieranyja asoby Łukašenki
Iryna Laparskaja: U Juryja Čyža i Ksienii Sankovič dakładna było kachańnie
Pamior dzied Koli Łukašenki — były viazień HUŁAHa, asudžany za dapamohu «banderaŭcam»5
Kamientary