Labiedźka nazvaŭ, chto moh by być dobrym prezidentam dla Biełarusi
Anatol Labiedźka ŭ intervju «Tok» parazvažaŭ pra mahčymy scenar vyzvaleńnia Biełarusi, vartyja kandydatury na pasadu prezidenta i toje, ci mohuć pastavić kiravać krainaj Mikałaja Łukašenku.
Umova vyzvaleńnia Biełarusi — vajennaja i palityčna paraza Maskvy
Anatol Labiedźka ličyć, što scenarom vyzvaleńnia Biełarusi i pierachodu da demakratyi źjaŭlajecca paraza Pucina, i ŭdakładniaje:
«Nie prosta padpisańnie niejkich pahadnieńniaŭ ab status-kvo, a mienavita paraza. Tolki heta daje nam šaniec i pierśpiektyvu».
Palityk adznačaje, što siońnia treba vykarystoŭvać toj šaniec čorna-biełaj situacyi i pierakonvać jeŭrapiejcaŭ i amierykancaŭ, što biez demakratyčnaj Biełarusi niemahčyma biaśpiečnaja Jeŭropa.
«Heta treba, kab było ŭ hałavie kožnaha jeŭrapiejskaha palityka. Kali budzie vajennaja paraza Pucina i kali budzie absalutna sfarmavana žadańnie bačyć Biełaruś jak častku Jeŭrapiejskaha sajuza, zychodziačy ŭ pieršuju čarhu z pytańniaŭ biaśpieki, to tady ŭ nas jość šaniec».
Palityk udakładniaje, što pad parazaj Pucina jon bačyć viartańnie Ukrainy ŭ svaje miežy i padpisańnie kapitulacyi Rasii. Važna nie tolki vajennaja paraza, ale i palityčnaja. Apošniaja aznačaje niemahčymaść viartańnia Maskvoju raniejšaj mižnarodnaj subjektnaści i mahčymaściaŭ supracy ź mižnarodnaj supolnaściu.
«Kali Pucin i ŭ vajennym płanie, i ŭ palityčnym zastaniecca bankrutam, to toj achoŭny kupał, jaki ciapier isnuje nad biełaruskim režymam, prosta źniknie. I tady vialikaja mahčymaść taho, što ŭ Biełarusi znoŭ mohuć pačacca pratesty. U takich umovach Łukašenka moža pasprabavać pieradać kamuści ŭładu. Heta moža pryvieści da vyzvaleńnia ŭsich palityčnych viaźniaŭ. Tady mohuć pačacca pracesy adnaŭleńnia taho, što my stracili za apošnija try hady».
Kamu Łukašenka moža addać uładu
Palityk upeŭnieny, kali nie budzie režymu Łukašenki, vybary ŭ Biełarusi buduć svabodnyja i sumlennyja. A ŭ 2025 hodzie Łukašenka budzie sprabavać zastacca va ŭładzie. Ale heta nielha nazvać vybarami. «Ich navat moža i nie być. Ja padtrymlivaju prapanovu ab ich admienie. Heta sekanomić hrošy. Tamu što toje, što adbyvajecca, heta imitacyja, fejk. Łukašenka i vybary — niesumiaščalnyja».
Sam ža Łukašenka, jak ličyć Labiedźka, nikomu nie hatovy addać uładu.
«U jaho ŭ hałavie taki scenar — pražyć jak maha bolš i zachoŭvać za saboju poŭny kantrol. A potym kab na łafiecie ad Muzieja Vialikaj Ajčynnaj vajny da sarkafaha. I kab pieršy vianok na mahiłu pastaviŭ druhi prezident Biełarusi — Mikałaj Łukašenka. Heta jaho idealny varyjant. Kab jon da apošniaha dnia, pakul chodzić, pakul havoryć, kab jon zachoŭvaŭ palityčnuju ŭładu».
Druhi scenar — u vypadku prablem sa zdaroŭjem, na dumku Labiedźki, Łukašenka moh by padzialicca ŭładaj z synam Viktaram.
Palityk nie biarecca pradkazać, da kaho piarojdzie ŭłada, kali Łukašenka niečakana pamre:
«Jość farmalnyja pravavyja ŭmovy, ale mohuć być samyja roznyja scenary».
Jon dumaje, što va ŭład niama kankretnaha scenara na taki vypadak. «Łukašenka prosta nie dazvolić publična ci ŭ niejkaj zakrytaj prastory farmulavać zadačy ci abmaloŭvać scenary na toj vypadak, kali jaho niama. Dla jaho heta moža vyhladać jak paraza. Dla jaho heta psichałahična vielmi drennaje pasłańnie. Navat kali jamu budzie vielmi drenna, jon musić demanstravać, što jon mocny, što zachoŭvaje kantrol».
Labiedźka dadaje:
«Kali hetaha nie budzie, to heta budzie vielmi adčuvalna. Naprykład, kali da kartežu Viktara Łukašenki paciahnucca aŭtamabili, buduć čaściej zvanić siłaviki i budzie žadańnie zrabić lepšyja padarunki na dzień narodzinaŭ, to heta aznačaje, što «praces pajšoŭ». Siłaviki i čynoŭniki buduć intuityŭna adčuvać, što ź Viktaram treba siońnia adbudoŭvać. I hetaha nie schavaješ u publičnaj prastory».
Natalla Kačanava — koń, jaki ŭsio ciahnie
Na dumku Anatola Labiedźki, piersona Natalli Kačanavaj vielmi vyhadnaja Łukašenku. Na jaho pohlad, heta abumoŭlena tym, što Kačanava addanaja Łukašenku i nie stvaraje prablem. Palityk, vybačyŭšysia pierad žančynami, paraŭnoŭvaje Kačanavu z kaniom, jakoha nahruziš i jon budzie ciahnuć i ciahnuć.
«Jana dla jaho absalutna kamfortnaja. Jana nie stvaraje prablem i sprabuje vyrašyć tyja prablemy, jakija zjaŭlajucca kala Łukašenka. I jon joj u poŭnym sensie daviaraje», — ličyć Labiedźka.
Chto byŭ by dobrym prezidentam
Cudoŭnym prezidentam novaj Biełarusi, na dumku Labiedźki, zmahli b być Aleś Bialacki, Śviatłana Cichanoŭskaja, Viktar Babaryka.
«Pa novaj Kanstytucyi, jakuju my padrychtavali, — udakładniaje jon. — Z abmiežavanymi paŭnamoctvami, z mahčymaściu pradstaŭlać Biełaruś na mižnarodnaj arenie».
Ci moža stać prezidentam Mikałaj Łukašenka
Na pytańnie ab tym, ci mohuć hramadzianie Biełarusi paśla rasčaravańnia ŭ novych uładach va ŭmovach demakratyčnaj Biełarusi vybrać prezidentam Mikałaja Łukašenku, adznačaje, što pa novaj Kanstytucyi, jakaja budzie ŭ demakratyčnaj Biełarusi, instytut prezidenctva nie budzie mieć takich paŭnamoctvaŭ, jak ciapier. Hałoŭnym u novaj sistemie budzie parłamient. Zatym urad. I potym prezident.
Palityk akcentuje ŭvahu na tym, što ŭ novaj Biełarusi važna budzie zachavać raŭnavahu sistemy. Na jaho dumku, varyjant Kanstytucyi 1994 hoda taksama niebiaśpiečny, bo praduhledžvaje prezidenckuju formu palityčnaha ŭładkavańnia, pry jakoj prezident zjaŭlajecca i kiraŭnikom dziaržavy, i kiraŭnikom vykanaŭčaj ułady.
«Zaŭsiody budzie spakusa heta vykarystać. Chto b ni pryjšoŭ da ŭłady, zjaviacca daradcy, jakija jamu skažuć, što treba bolš paŭnamoctvaŭ. Naprykład z-za taho, što treba supraćstajać Rasii, jakaja maje kavarnyja płany, ci dla praviadzieńnia reformaŭ, jakija zabuksavali ŭ parłamiencie.
Zdajecca, heta racyjanalna. Ale heta pryvodzić da taho, što kresła prezidenta stanovicca ŭsio bolš šyrokim. Jon usio mienš słuchaje inšych i choča ŭsio vyrašać chutka. I pastupova čałaviek branzavieje na hetaj pasadzie», — ličyć Labiedźka.
Hladzicie całkam:
Kubrakoŭ davodziŭ, što milicyjant Zhirski nie datyčny da bandy nalotčykaŭ. Ciapier taho sudziać — pahražaje da 20 hadoŭ3
Kamientary