Virus pandemičnaha hrypu A (H1N1) daminuje siarod hrypapadobnych

Ciapier virus pandemičnaha hrypu A (H1N1) daminuje siarod hrypapadobnych zachvorvańniaŭ, paviedamiŭ kiraŭnik biuro SAAZ u Biełarusi Jahor Zajcaŭ na pres-kanfierencyi ŭ Minsku 17 listapada.

Jon adznačyŭ, što ŭ bolšaści pacyjentaŭ zachvorvańnie praciakaje lohka i nie patrabuje śpiecyjalnaha lačeńnia, a nieščaślivyja kliničnyja zychody «źviazany ŭ asnoŭnym ź niasvoječasovym zvarotam pa miedycynskuju dapamohu».

Namieśnik hałoŭnaha ŭrača Respublikanskaha centra hihijeny, epidemijałohii i hramadskaha zdaroŭja Ludmiła Narojčyk zajaviła, što nie hatova paviedamić apieratyŭnuju infarmacyju «ab vypadkach zachvorvańnia na hryp A (H1N1) i vypadkach śmierci ad jaho, tamu što tema pres-kanfierencyi zajaŭlena jak «Pavyšeńnie infarmavanaści nasielnictva Respubliki Biełaruś ab mierach prafiłaktyki i abarony ad siezonnaha i pandemičnaha hrypu». Pavodle słoŭ Narojčyk, bolšaść łabaratorna paćvierdžanych vypadkaŭ hrypu źviazana sa źmiašanaj infiekcyjaj. «Nikoli nie byvaje, kab cyrkulavaŭ tolki adzin uzbudžalnik VRVI», — skazała jana.

«My nie viedajem, kolki ludziej chvarejuć na hryp A (H1N1)», — adznačyła pradstaŭnik centra.

Na jaje dumku, heta i nie treba viedać, pakolki «ŭ łabaratornym paćviardžeńni ŭsich vypadkaŭ niama nieabchodnaści», bo pryncypy lačeńnia ŭsich form hrypu adnolkavyja. Jahor Zajcaŭ taksama zajaviŭ, što «niama nieabchodnaści va ŭsich vypadkach hrypu rabić łabaratornaje paćviardžeńnie».

Pavodle źviestak Ministerstva achovy zdaroŭja, na 16 listapada ŭ Biełarusi było zarehistravana 165 vypadkaŭ zachvorvańnia na pandemičny hryp A (H1N1). Zhodna z aficyjnymi źviestkami (na 4 listapada), z pačatku ŭzdymu zachvorvańnia 19 kastryčnika ad pnieŭmanii ŭ Biełarusi pamierła 19 čałaviek, u siami ź ich łabaratorna paćvierdžana najaŭnaść virusu hrypu A (H1N1).

Havoračy pra vypadki pnieŭmanii, Narojčyk adznačyła, što raniej hetamu zachvorvańniu nie nadavali takoha značeńnia, jak ciapier, i hetaja tema nie «vynosiłasia na abmierkavańnie ŚMI». Miž tym ad pnieŭmanii pamirajuć štohod, padkreśliła jana.

U toj ža čas kiraŭnik biuro SAAZ u Biełarusi adznačyŭ, što asablivaściu virusu hrypu A (H1N1) źjaŭlajecca vierahodnaść raźvićcia ciažkich uskładnieńniaŭ, u pryvatnaści, pnieŭmanii. Ryzyka raźvićcia ŭskładnieńniaŭ źnižajecca,

a lačeńnie hrypu najbolš efiektyŭnaje, kali pacyjent źviarnuŭsia pa miedycynskuju dapamohu na praciahu dvuch sutak ad pačatku zachvorvańnia, skazaŭ Zajcaŭ.

• 0
• 0
• 0
• 0
• 0
• 0
• 0
• 0