MUS patłumačyła, jak biełarusam-«ekstremistam» nie stracić hramadzianstva

Hramadzianie Biełarusi, asudžanyja za «ekstremisckuju» dziejnaść, mohuć viarnucca ŭ krainu i adbyć pryznačany termin pakarańnia, kab nie stracić hramadzianstva. Tak novyja pałažeńni zakona «Ab hramadzianstvie» na pres-kanfierencyi ŭ Nacyjanalnym pres-centry prakamientavaŭ načalnik Departamienta pa hramadzianstvie i mihracyi MUS Alaksiej Biahun. Jaho cytuje Reform.by.

«Navacyja, jakaja padviarhałasia krytycy z boku našych zamiežnych apanientaŭ, — uviadzieńnie novaj padstavy dla straty hramadzianstva Respubliki Biełaruś u suviazi z najaŭnaściu prysudu suda Respubliki Biełaruś, jaki ŭstupiŭ u zakonnuju siłu i paćviardžaje ŭdzieł asoby ŭ ekstremisckaj dziejnaści abo pryčynieńnie im ciažkaj škody intaresam Respubliki Biełaruś.

Tut u pieršuju čarhu, na što źviartaju ŭvahu, što, pa-pieršaje, pavinien być prysud suda Respubliki Biełaruś, jaki ŭstupiŭ u zakonnuju siłu i paćviardžaje ŭdzieł takoj asoby ŭ supraćpraŭnaj dziejnaści jak na terytoryi Respubliki Biełaruś, tak i za jaje miežami ŭ adnosinach da Respubliki Biełaruś u pieršuju čarhu. Nu, a druhi składnik — toj, što, biezumoŭna, asoba pavinna ŭchilacca ad vykanańnia prysudu», — patłumačyŭ Biahun.

Pavodle jaho słoŭ, kab nie stracić hramadzianstva, možna viarnucca i vykanać rašeńnie suda.

«Takaja nieabjektyŭnaja krytyka, što my budziem sparadžać vypadki źjaŭleńnia ŭ dziaržavie asob biez hramadzianstva, ale, pa-pieršaje, hetyja asoby nie znachodziacca na terytoryi našaj krainy. I, pa-druhoje, zaŭsiody jość vybar: ci viarnucca ŭ Respubliku Biełaruś i vykanać rašeńnie suda Respubliki Biełaruś, adbyć va ŭstalavanym paradku pakarańnie, jakoje za tyja złačynstvy, jakija ździejśnienyja na terytoryi našaj krainy, ci pa-raniejšamu znachodzicca za miežami krainy z usimi nastupstvami, tady jak heta hramadzianin Biełarusi, kali jon faktyčna ŭchilajecca ad vykanańnia zakonnaha rašeńnia suda», — rastłumačyŭ Biahun.

Akramia taho, ustupajuć u siłu normy zakona ab tym, što asoba pavinna paviedamlać kampietentnym orhanam ab atrymańni druhoha hramadzianstva, zamiežnaha dazvołu na žycharstva, a taksama inšych dakumientaŭ, jakija dajuć prava na lhoty ŭ inšaj dziaržavie.

Biahun dadaŭ, što ŭ pieršuju čarhu hetyja źviestki patrebnyja dla vykanańnia normaŭ zakanadaŭstva, jakija zabaraniajuć prymać na dziaržsłužbu i niekatoryja inšyja pasady asob, jakija majuć zamiežnaje hramadzianstva abo dazvoły na žycharstva.

«Akramia taho, heta infarmacyja pryznačanaja dla statystyčnaha zboru, dla taho, kab aceńvać na samaj spravie mabilnaść našych hramadzian, jakija hramadzianie majuć zamiežnaje hramadzianstva, a taksama ŭ metach farmiravańnia adpaviednaj mihracyjnaj palityki», — skazaŭ jon.

Pakul paviedamlać ab najaŭnaści DNŽ i inšych dakumientaŭ, jakija dajuć peŭnyja pravy ŭ zamiežnaj dziaržavie, treba ŭ dobraachvotnym paradku na praciahu troch miesiacaŭ paśla ich atrymańnia. Sankcyi za niepaviedamleńnie nie praduhledžana. 

Razam z tym ministerstva maje namier pahladzieć, jak biełarusy buduć vykonvać pałažeńni abnoŭlenaha zakona, i pry nieabchodnaści inicyjavać uviadzieńnie sankcyj. 

«Kali, viadoma, aktyŭnaść hramadzian budzie nie vielmi vialikaja, to ŭ lubym vypadku Ministerstva zamiežnych spraŭ uniasie prapanovy dla taho, kab niejak stymulavać hramadzian nakiroŭvać u naš adras adpaviednaje apaviaščeńnie: ci ŭviadzieńnie adpaviednaj adkaznaści, ci ŭstanaŭleńnie peŭnych kantrolnych mierapryjemstvaŭ u dačynieńni da hetych asob, jakija majuć adpaviednyja dakumienty», — skazaŭ Biahun.

• 3
• 0
• 51
• 33
• 1
• 3
• 46
• 0